Êsai 6 - Nau Brah Ndu Ngơi 2023

Brah Ndu kuăl Y-Êsai ƀư nơm mbơh lor

¹ Năm hađăch Usia khĭt, gâp hŏ saơ Kôranh Brah gŭ ta du mlâm sưng hađăch dŭt prêh ngăn, ntôr ao jâr Păng ƀư bêng ngih brah.

² Phung sêraphim dâk pah kan jŭm Păng. Ăp nơm khân păng geh prao plơp năr, bar plơp nkŭm muh măt, bar plơp nkŭm jâng jêh ri bar plơp prăp mpăr.

³ Phung sêraphim troh ndrel jêh ri lah: “Kloh ueh, kloh ueh, kloh ueh yơh Brah Yêhôva ma phung tahan! Lam bri neh bêng ma nau chrêk rmah Păng.”

⁴ Bâr phung nter huy ngăn ƀư ma lĕ n'gâng mpông ta ntŭk mbong mpông sâr n'gơ, jêh ri ngih brah bêng ma nhhŭk ŭnh.

⁵ Gâp kuăl huy ro: “Rêh ni ngăn ma gâp! Gâp khĭt roh! Yorlah gâp jêng bunuyh geh mpiăt ƀơ̆ ƀơch ta nklang gŭ rêh ta nklang du phung ƀon lan geh mpiăt ƀơ̆ ƀơch, yorlah măt gâp saơ jêh Hađăch, jêng Brah Yêhôva ma phung tahan!”

⁶ Rnôk nây, du tâm phung sêraphim mpăr văch ta gâp, tâm ti djôt sa ônh rnga ŭnh sa ônh păng hŏ dŏng nkep tă bơh nơng ƀư brah.

⁷ Păng rbot trôm mbung gâp ma sa ônh rnga ŭnh sa jêh ri lah: “Aơ, ndơ nây hŏ rbot jêh ta trôm mbung may, bu jut lơi jêh nau kue may, nau tih may bu yô̆ an jêh.”

⁸ Rnôk nây, gâp tăng bâr nteh Kôranh Brah lah: “Mbu nơm gâp mra njuăl? Mbu nơm mra hăn an ma he?” Gâp lah: “Gâp ta aơ, dăn njuăl hom gâp hăn.”

⁹ Păng lah, “Hăn hom jêh ri lah ma phung ƀon lan aơ: ‘Iăt hom jêh ri thoi đŏng iăt, Ƀiălah khân may mâu mra gĭt rbăng ôh; Uănh hom khân may, Ƀiălah khân may mâu saơ ôh.’

¹⁰ Ƀư hom ma phung ƀon lan aơ rluk mâl, Tê̆k trôm tôr, nhêp măt; Klach lah măt khân păng dơi saơ, Tôr khân păng dơi tăng, Nuih n'hâm khân păng dơi gĭt rbăng, Jêh nây khân păng plơ̆ sĭt jêh ri bu ƀư bah!”

¹¹ Gâp ôp, “Ơ Kôranh Brah, kŏ tât ndah jŏ?” Păng plơ̆ lah: “Kŏ tât âk ƀon toyh jêng rngot njăp, Mâu geh bunuyh gŭ ôh, Ngih mâu geh bunuyh gŭ, Jêh ri lĕ bri neh plơ̆ jêng rngol lĕ ƀhiau;

¹² Kŏ tât Brah Yêhôva mprơh ngai phung ƀon lan, Jêh ri âk ntŭk tâm bri neh plơ̆ jêng rngot njăp.

¹³ Nđâp tơlah du kô̆ tâm jât hôm e tâm khân păng Bu mra ƀư rai lơi; Ƀiălah, nâm bu kăl jêh tơm n'ho, tơm guyh hôm om knŏng yôk ngâl, Ndŭl mpôl kloh ueh jêng yôk ngâl păng.”