Êsai 57 - Nau Brah Ndu Ngơi 2023

Nau rlu ma nơm sŏng srăng

¹ Nơm sŏng srăng khĭt, Bu mâu klâng rvê; Bu nhŭp lơi bunuyh ueh, Ƀiălah mâu geh nơm gĭt rbăng pô aơ: Yor ma nau mhĭk dăch tât, Dĭng bu nhŭp rdu lơi nơm sŏng srăng;

² May mra hăn tâm nau đăp mpăn. Mbu nơm rêh tâm nau sŏng Pôri dơi rlu ta klơ sưng bê̆ch păng nơm.

Nduyh phung Israel mbah rup brah

³ Ƀiălah khân may jêng kon sau phung n'hŭm, Noi deh nơm văng tĭr jêh ri bu ur ka n'hong, Văch dăch hom!

⁴ Ma mbu nơm khân may mưch gơm? Ma mbu nơm khân may hă huy trôm mbung Jêh ri sŏt mpiăt tâm rdâng? Mâu di hĕ khân may jêng phung kon tâm rdâng, Jêng kon sau phung mƀruh?

⁵ Khân may ƀư nau văng tĭr ndrăng khân may ta meng tơm si têrêbin, Tâm dâng lĕ rngôch tơm si ndrêh, Khân may nkhĭt phung kon khân may nơm ƀư mpa ƀư brah tâm rlŭng, Tâm lĕ rkâp lŭ!

⁶ Lĕ lŭ toyh pler rlip tâm rlŭng jêng ntŭk prăp ma may; Nanê̆, nĕ jêng drăp ndơ may. May hŏ ƀư ndơ nhhơr nhêt, Jêh ri nhhơr jêh ndơ ƀư brah rnih môi ma khân păng! Nau Gâp dơi bah lĕ ji nuih yor nau nây?

⁷ May n'gân sưng bê̆ch may nơm ta klơ yôk dŭt prêh, Jêh ri may hăn hao ta nây nhhơr mpa ƀư brah.

⁸ May dơm lĕ ndơ kât rup brah Pakơi seng mpông jêh ri lĕ n'gâng mpông; Yorlah may chalơi jêh Gâp rĭ dĭng pơk sưng bê̆ch may jêh ri hao bê̆ch ta nây; Jêh ri ƀư ma sưng bê̆ch may nơm dĭ ntop. May ƀư nau tâm rnglăp đah phung brah tih, Rŏng sưng bê̆ch khân păng, Jêh ri ntrŏng uănh nau rhôk khân păng.

⁹ May hŏ djôt dak ngi jêh ri ntop dak si ƀâu kah Hăn nhhơr ma brah tih Môlek; May đă phung mbơh ktang may nơm hăn n'gor ngai, Ntrŭnh săk nơm tât ƀon phung khĭt!

¹⁰ May hŏ rgănh jêh yor trong ngai, Ƀiălah may mâu prot lah: “Nau nây dơm dam!” May saơ jêh nau ktang mhe may, Yor nây may mâu hŏt rgănh ôh.

¹¹ Ma mbu khân may krit jêh ri klach Kŏ tât may mƀruh, May mâu kah gĭt ma Gâp, Jêh ri mâu klâng rvê ma Gâp? Mâu di hĕ yorlah jŏ jêh Gâp gŭ rklăk, Rĭ dĭng may mâu klach yơk ma Gâp?

¹² Aơ, Gâp nơm yơh mra mpơl nau ƀư tĭng nau rêh sŏng srăng may, Ƀiălah lĕ nau kan nĕ mâu geh khlay ma may.

¹³ Lah may kuăl rklaih, ăn phung rup brah may tâm rklaih khân may! Sial mra khôm rdu phung brah nây, Du n'hâm nsôr mra sŏk rdu lơi lĕ rngôch khân păng. Ƀiălah mbu nơm du krap tâm Gâp mra dơn bri neh nây, Jêh ri mra dơn yôk kloh ueh Gâp ƀư drăp ndơn.

Nau ton kơl jêh ri ƀư bah

¹⁴ Geh nau ngơi; “Nkra hom trong, nkra hom trong! Rli ăn lâng hom trong! Mƀăr lơi hom lŭ ƀư chêh bơh trong phung ƀon lan Gâp!”

¹⁵ Nơm dŭt prêh, Nơm bu yơk mbah, gŭ ntŭk n'ho ro dŭt ngăn, Amoh Păng jêng Kloh Ueh; Nơm nĕ lah: “Gâp gŭ tâm ntŭk prêh jêh ri kloh ueh, Ƀiălah gŭ ndrel ma nơm geh nuih n'hâm rngot ma nau tih jêh ri nuih n'hâm dêh rhêt, Gay plơ̆ ăn rêh nuih n'hâm phung dêh rhêt, Jêh ri gay ăn rêh tay nuih n'hâm nơm rngot ma nau tih.

¹⁶ Gâp mâu ndăng mro nau tih, Mâu lĕ mra nuih mro mrăng; Yorlah huêng bunuyh mra hŏt rgănh tanăp Gâp, Jêh ri lĕ huêng rêh phung Gâp rhăk jêng tâm ban lĕ.

¹⁷ Yor nau păng kơnh rlau ir dĭng Gâp ji nuih jêh ri dong păng. Tâm nau ji nuih, Gâp hŏ pôn jêh muh măt Gâp ma păng, Ƀiălah păng ăt plơ̆ tay nâm trong nuih n'hâm păng.

¹⁸ Gâp saơ jêh trong păng, ƀiălah Gâp mra ƀư bah păng, Njŭn leo jêh ri ăn nau bonh leng ma păng, Ndrel ma phung nhĭm nhhiăng păng.

¹⁹ Gâp rhăk njêng nau tâm rnê ta bâr mbung khân păng: ‘Đăp mpăn! Đăp mpăn ma nơm gŭ ngai jêh ri ma phung gŭ dăch!’” Brah Yêhôva lah: “Gâp mra ƀư bah păng.

²⁰ Ƀiălah phung ƀai jêng tâm ban ma dak mƀŭt rbuh, Mâu blau rlu ôh, Dak mpât ƀư klôn bŏk jêh ri neh ƀơ̆.”

²¹ Brah Ndu gâp lah: “Mâu geh nau đăp mpăn ôh ma phung ƀai!”