Êsai 56 - Nau Brah Ndu Ngơi 2023

Nau tâm rklaih prăp ăn lĕ rngôch mpôl bunuyh

¹ Brah Yêhôva lah: “Djôt prăp hom nau sŏng Jêh ri ƀư hom nau sŏng srăng, Yorlah nau Gâp tâm rklaih dăch jêh, Nau sŏng srăng Gâp dăch tâm mpơl jêh.

² Ueh maak ngăn ma bunuyh ƀư nau nây, Jêh ri ueh maak ngăn ma kon bunuyh djôt prăp păng nâp, Jêng lah nơm prăp nar saƀat, mâu ƀư ƀơ̆ păng ôh; Jêh ri nkân ti păng mâu ƀư du ntil nau mhĭk ôh!”

³ Phung bu năch plơ̆ sĭt ma Brah Yêhôva lơi dĭng ngơi pô aơ: “Nanê̆ ngăn Brah Yêhôva mra tâm nkhah gâp bơh phung ƀon lan Păng.” Bunuyh bu char mâu lĕ dơi ngơi: “Aơ, gâp jêng du tơm si kro.”

⁴ Yorlah pô aơ Brah Yêhôva lah tâm ban pônây: “Ma phung kôranh bu char djôt prăp nar Saƀat Gâp, Săch nau ƀư maak ma Gâp, Djôt prăp nâp nau Gâp tâm rnglăp,

⁵ Pôri Gâp mra ăn ma khân păng du ntŭk tâm ngih Gâp, Tâm lĕ mpêr ƀon Gâp, Jêh ri ăn ma khân păng du amoh ueh lơn ma amoh phung kon bu klâu jêh ri ma phung kon bu ur; Gâp mra ăn ma khân păng du amoh n'ho ro, Jêng amoh mâu blau roh.

⁶ Phung bu năch plơ̆ sĭt ma Brah Yêhôva Gay pah kan ma Păng, rŏng ma amoh Brah Yêhôva, Jêh ri jêng phung oh mon Păng, Jêng lĕ rngôch phung djôt prăp nar Saƀat mâu ƀư ƀơ̆ nar nây ôh, Jêh ri djôt prăp nâp nau Gâp tâm rnglăp,

⁷ Pôri Gâp mra djôt khân păng leo ta yôk kloh ueh Gâp, Jêh ri ăn khân păng răm maak tâm ngih Gâp mbơh sơm. Khân păng nhhơr ndơ ƀư brah gŭch jêh ri mpa ƀư brah ta nơng ƀư brah Gâp Mra dơi dơn; Yorlah ngih Gâp bu mra kuăl jêng ngih mbơh sơm Ma lĕ rngôch mpôl băl bunuyh.

⁸ Kôranh Brah jêng Brah Yêhôva, Nơm tâm rƀŭn phung Israel nchah rai pru pra jêh, lah pô aơ: ‘Đơ phung hŏ tâm rƀŭn jêh, Gâp mra tâm rƀŭn phung êng đŏng plơ̆ sĭt ma păng.’”

Nau nduyh ma phung Israel mâu răp jăp

⁹ Ơ lĕ rngôch mpô mpa bri, ơ lĕ rngôch mpa tâm krŏng, Lĕ rngôch văch kăp rvăn hom.

¹⁰ Lĕ rngôch phung gak Israel Chieh măt da dê, mâu geh nau gĭt rbăng ôh. Lĕ rngôch khân păng jêng so mlo, Mâu blau groh ôh; Knŏng mbơi, bê̆ch jong Jêh ri rŏng bê̆ch.

¹¹ Khân păng jêng so ŭch sa, Mâu blau hơm ôh. Khân păng jêng phung rmăk biăp mâu gĭt rbăng; Lĕ rngôch khân păng plơ̆ tĭng trong khân păng nơm, Ăp nơm rvê joi drăp ndơ ma păng nơm da dê.

¹² Khân păng jă ndrăng khân păng: “Văch hom, gâp mra sŏk ndrănh, He mra nhŭl yor ndrănh dăng; Nar ôi taơ tâm ban đŏng ma nar aơ, Jêh ri nau khlay rlau lơn ma nĕ.”