Êsai 55 - Nau Brah Ndu Ngơi 2023

Nau Brah Yêhôva jă

¹ “Ơ, ăp nơm ji hir, Văch hom ta tu dak! Mbu nơm mâu geh prăk ôh, Rvăt hom jêh ri sa! Văch rvăt hom ndrănh jêh ri dak toh ndrôk Mâu ŭch ma prăk, mâu kêh rnoh ôh.

² Mâm ƀư khân may mplơ̆ prăk gay rvăt ndơ mâu jêng piăng let ôh? Mâm ƀư khân may djôt nau pah kan khân may nơm rgâl sŏk ndơ mâu blau hơm ôh? Njrăng iăt Gâp, sa hom ndơ kah, Jêh ri ƀư maak huêng khân may nơm ma ndơ sa kah.

³ Nkêng hom tôr khân may jêh ri văch hom ma Gâp; Gŭ iăt hom Gâp gay ma huêng khân may dơi rêh. Gâp mra ăn ma khân may nau tâm rnglăp n'ho ro, Jêng nau rŏng răp jăp Gâp ăn ma Y-Đavit.

⁴ Aơ, Gâp ăn păng jêng nơm mbơh ngăn ma lĕ bri dak, Ƀư kôranh gay ma ƀĭt gai ma lĕ rngôch ƀon lan.”

⁵ “Ngăn yơh, may mra kuăl bri dak may ê hŏ gĭt năl ôh, Jêh ri bri dak ê hŏ gĭt may mra nchuăt ran ta may, Yor Yêhôva Brah Ndu may, Nơm Kloh Ueh Israel, Jêng Nơm ƀư ma may chrêk rmah.”

⁶ Ăn joi hom Brah Yêhôva dôl he hôm mâp; Kuăl dăn hom ma Păng dôl Păng gŭ dăch!

⁷ Ăn phung ƀai chalơi hom trong păng nơm, Ăn bunuyh kue chalơi hom nau păng mĭn; Plơ̆ sĭt hom ma Brah Yêhôva, Păng mra yô̆ an, Văch hom ma Brah Ndu he, yorlah Păng mra yô̆ an rmeh ler.

⁸ Brah Yêhôva lah: “Nau Gâp mĭn mâu di jêng nau khân may mĭn ôh, Trong khân may mâu di jêng trong Gâp ôh.

⁹ Yorlah lĕ ndâr trôk prêh lơn ma neh ntu, Pônây lĕ trong Gâp jêng prêh lơn ma trong khân may, Nau gâp mĭn prêh lơn ma nau khân may mĭn.

¹⁰ Yorlah tâm ban ma dak mih jêh ri pler jŭr bơh trôk Jêh ri mâu hôm plơ̆ sĭt ta nây ôh, ƀiălah djrah bĕ neh, Ăn păng hon ndơ jêh ri nkeh rtah nkot, Gay ăn ntil ma nơm srih jêh ri piăng let ma nơm sa,

¹¹ Tâm ban pônây lĕ nau Gâp ngơi, Luh jêh bơh trôm mbung Gâp mâu mra sĭt ma Gâp dơm dam ôh, Ƀiălah păng mra ƀư jêh nau Gâp ŭch, Jêh ri păng ƀư lôch nau kan Gâp jao.

¹² Yorlah khân may mra hăn ma nau răm maak, Bu mra njŭn khân may ma nau đăp mpăn. Yôk jêh ri dor mra mprơ tanăp khân may, Lĕ rngôch tơm si tâm bri mra tap ti.

¹³ Tơm si mirtơ mra hon ntrok ma pŭm lok, Jêh ri tơm si mirtơ mra hon ntrok ma lok rting; Nau nây mra jêng ndơ gĭt năl ma amoh Brah Yêhôva, Jêh ri jêng du nau tâm mbên n'ho ro, mâu mâp ƀư rai ôh.”