Êsai 54 - Nau Brah Ndu Ngơi 2023

Nau chrêk rmah Yêrusalem mhe

¹ “Ơ bu ur ndrô gâng, nơm mâu mâp deh, mprơ hom; Ơ nơm mâu mâp ji yorlah deh kon, Mprơ hom nau mprơ răm rhơn. Yorlah phung kon bu ur bu chalơi Mra jêng âk lơn ma phung kon bu ur geh sai.” Brah Yêhôva lah kơt nĕ.

² Ƀư huy hom ntŭk ngih bok ay, Ăn bu lăk ăn dĭ bok nching ntŭk ay gŭ; Nthăng rse ăn jong, Ƀư nâp mâng rdâng!

³ Yorlah ay mra ƀư dĭ mpeh pa ma jêh ri mpeh pa chiau; Phung kon sau ay mra pit in lĕ bri dak jêng ndrăp ndơn, Khân păng mra ƀư ăn lĕ ƀon toyh jêng rngol jêh plơ̆ jêng âk phung ƀon lan.

⁴ “Lơi klach ôh, yorlah ay mâu mra bêk ôh. Lơi dĭl ôh, yorlah ay mâu hôm bêk đŏng ôh. Ay mra chuêl nau ay bêk dôl kon se, Jêh ri ay mâu mra kah gĭt ôh ma nau ay bêk tâm nau bu ur ndrô sai.

⁵ Yorlah sai ay jêng Nơm Rhăk Njêng ay; Amoh Păng jêng Brah Yêhôva ma phung tahan. Nơm Tâm Chuai ay jêng Nơm Kloh Ueh Israel, Bu mra rnha Păng jêng Brah Ndu ma lĕ neh ntu.

⁶ Brah Yêhôva kuăl jêh ay sĭt Tâm ban ma kuăl du huê ur bu chalơi jêh, jêh ri nuih n'hâm rngot, Jêng lah bu ur bu nđăp jêh dôl hôm druh jêh ri bu chalơi jêh.” Brah Ndu may lah:

⁷ “Gâp chalơi jêh ay ƀât lât, Ƀiălah Gâp mra vơt ay sĭt ma nau yô̆ nđach mâu blau lôch.

⁸ Tâm nau ji nuih dŭt n'hâm, Gâp n'gĭl jêh muh măt Gâp ma ay ƀât lât, Ƀiălah ma nau ueh mâu blau dŭt, Gâp mra yô̆ nđach ma ay,” Nơm Tâm Chuai ay jêng Brah Yêhôva lah kơt nĕ.

⁹ “Gâp kơp nau aơ jêng tâm ban ma rnôk dak rdŭl bŭk rô̆ Y-Nôê, Tâm ban ma Gâp hŏ sơm ton jêh dak rdŭl bŭk rô̆ Y-Nôê, Mâu mra hôm bêng ler neh ntu ôh, Gâp hŏ sơm ton jêh Gâp mâu mra ji nuih đah ay Jêh ri mâu đŏng nduyh ay ôh.

¹⁰ Nđâp tơlah yôk dơi du, Nđâp tơlah mbon mra rgâl ntŭk, Ƀiălah nau Gâp ueh mâu mra du bơh ay ôh, Jêh ri nau tâm rnglăp đăp mpăn Gâp mâu dơi rgâl ôh;” Brah Yêhôva jêng Nơm geh nau yô̆ nđach ma ay lah kơt nĕ.

¹¹ “Ơ phung rêh ni, nơm phŭt sial ktang rpuh đô̆, jêh ri nơm mâu geh bonh leng ôh, Aơ, gâp sŏk lŭ saphir ƀư lŭ gay ndâk ngih may, Jêh ri gâp mra dơm mbon may ma lŭ ônik.

¹² Gâp mra sŏk lŭ rubi ƀư mpêr geh ngih tŭm gak may Sŏk lŭ khlay chrêk ƀư lĕ mpông pêr may; Lĕ mpêr ƀon may ma lŭ khlay êmêrôt.

¹³ Brah Yêhôva mra sâm nti lĕ rngôch phung kon may, Jêh ri khân păng mra geh nau đăp mpăn ngăn.

¹⁴ Gâp mra ƀư nâp may ma nau sŏng srăng, May mra klaih bơh nau bu tŭn jot, mâu klach ôh; Jêh ri klaih bơh nau krit kir, yorlah nau nây mâu mra văch dăch may ôh.

¹⁵ Tơlah geh nơm rduh lơh may, Nau nây mâu tât tă bơh Gâp ôh. Mbu nơm rduh lơh đah may, Mra rlâm tŭp yor may.

¹⁶ Aơ, Gâp yơh rhăk njêng jêh nơm chiăr, Su sa ônh khôm ŭnh, Ƀư ndơ tâm lơh gay dŏng; Gâp đŏng hŏ rhăk njêng nơm ƀư rai Gay ƀư kan nau ƀư rai.

¹⁷ Lĕ rngôch ndơ tâm lơh bu ƀư gay tâm rdâng đah may mâu dơi jêng ôh; May mra phat dôih ma lĕ mpiăt phong may. Aơ jêng drăp ndơn ma phung oh mon Brah Yêhôva, Jêh ri Gâp yơh ăn nau sŏng srăng ma khân păng.” Brah Yêhôva lah kơt nĕ.