Êsai 52 - Nau Brah Ndu Ngơi 2023

Nau ton ma nau tâm rklaih jêh ri ndâk tay Yêrusalem

¹ Ơ ƀon Siôn, kah rngăl hom, Kah rngăl hom, nsoh hom nau ktang may! Ơ Yêrusalem, ƀon kloh ueh, Nsoh hom bok ao ueh may! Yorlah phung mâu koh ntâu jêh ri phung ƀơ̆ ƀơch Mâu mra hôm lăp tâm may ôh.

² Ơ ƀon Yêrusalem, dâk hom may, Rtuh hom ndruyh neh jêh ri gŭ ta klơ sưng hađăch; Ơ kon bu ur ƀon Siôn, jêng phung gŭ tâm ndrung Doh êng rse ta trô ko ay.

³ Yorlah Brah Yêhôva lah pô aơ: “Bu tăch jêh khân may mâu geh ăn prăk, jêh ri bu mra tâm chuai khân may mâu hôm ŭch prăk.”

⁴ Kôranh Brah jêng Brah Yêhôva lah: “Kăl e ri, phung ƀon lan Gâp hăn ta bri Êjipt gŭ ƀât lât ta nây. Ƀiălah pakơi nây, phung Asiri tŭn jot jêh khân păng.”

⁵ Brah Yêhôva lah: “Aƀaơ aơ, moh Gâp ƀư? Yorlah phung ƀon lan Gâp hŏ jêng bu nă mâu geh kô̆ mâu geh nau.” Brah Yêhôva lah: “Phung kôranh chiă uănh khân păng nter nđêng, jêh ri bu ngơi sưr ma amoh Gâp, nar aơ tât nar ƀaƀă.

⁶ Pôri, phung ƀon lan Gâp mra gĭt năl amoh Gâp. Nanê̆, tâm nar nây, khân păng mra gĭt Gâp jêng Nơm ngơi pô aơ: ‘Gâp yơh nĕ!’ ”

⁷ Phung mbơh nau đăp mpăn, Mbơh nau mhe mhan ueh, Mbơh nau tâm rklaih, Jêh ri lah ma ƀon Siôn pô aơ: “Brah Ndu may gŭ chiă uănh;” Mbang jâng phung nây ta klơ yôk Ueh ngăn!

⁸ Phung gak may troh mprơ, Khân păng troh n'grŭp ma nau maak; Yorlah khân păng mra saơ rah vah ma măt Brah Yêhôva plơ̆ sĭt tay ma ƀon Siôn.

⁹ Ơ ntŭk rlâm tâm ƀon Yêrusalem, Troh hom ma nau mprơ ndrel n'grŭp. Yorlah Brah Yêhôva hŏ bonh leng jêh phung ƀon lan Păng, Tâm chuai jêh ƀon Yêrusalem.

¹⁰ Brah Yêhôva tâm mpơl jêh nting tur kloh ueh Păng Tanăp măt lĕ rngôch bri dak; Lĕ rngôch dŭt bri dŭt neh Saơ da dê nau Brah Ndu he tâm rklaih!

¹¹ Du hom, du hom, luh hom bơh ntŭk nây! Lơi pah tât ndơ ƀơ̆ ƀơch, luh hom bơh tă ntŭk nây. Khân may jêng phung djôt ndơ yơk mbah Brah Yêhôva, Ƀư kloh hom khân may nơm!

¹² Ƀiălah khân may mâu mra luh ma nau ndal ôh, Mâu lĕ khân may du der, Yorlah Brah Yêhôva mra hăn lor panăp khân may, Jêh ri Brah Ndu Israel jêng Nơm gak pakơi khân may.

Oh mon Brah Yêhôva

¹³ Aơ, oh mon Gâp mra pah kan ma nau blau mĭn, Mra bu yơk, dơi tâm rnê, dơi geh nau mât ton, Jêh ri n'hao dŭt prêh.

¹⁴ Ƀiălah âk bunuyh mra hih rhâl ma May; Muh măt May rgay rdjoh rlau lơn ma ăp bunuyh êng, Săk jăn May mâu geh tâm ban ma kon bunuyh.

¹⁵ Đŏng kơt nây, May mra ƀư kloh phung ndŭl mpôl bunuyh; Phung hađăch mra mêm mbung yor May. Yorlah khân păng mra saơ nau bu mâu mâp nkoch bri ma khân păng ôh, Jêh ri mra gĭt rbăng nau khân păng mâu mâp tăng ôh.