Êsai 51 - Nau Brah Ndu Ngơi 2023

Nau ton ma phung ƀon lan Brah Ndu

¹ “Ơ phung tĭng joi nau sŏng srăng, Jêng phung tĭng joi Brah Yêhôva, iăt hom Gâp! Uănh hom ma lŭ toyh tă bơh ntŭk nây yơh khân may lôk, Jêh ri ma ntu lŭ jru tă bơh ntŭk nây yơh ntŭk khân may kuyh!

² Ăn khân may uănh hom chô yau khân may jêng Y-Abraham Jêh ri ma H'Sara, jêng nơm deh ma khân may; Gâp kuăl jêh Y-Abraham nôk păng gŭ knŏng du huê, Ƀiălah Gâp hŏ ăn nau ueh uĭn ma păng, Jêh ri ƀư ma păng plơ̆ jêng âk râk.

³ Yorlah Brah Yêhôva bonh leng Siôn; Păng bonh leng lĕ rngôch ntŭk păng lĕ rlâm. Păng rgâl bri rdah jêng ma n'gar Êđen, Ndrêch rdah jêng n'gar Brah Yêhôva. Ta nklang đang trao nây mra geh nau maak, răm rhơn, Nau tâm rnê jêh ri bâr mprơ.

⁴ Ơ phung ƀon lan Gâp, iăt hom Gâp; Ơ bri dak Gâp, rkêng hom tôr ma Gâp! Yorlah nau vay mra luh bơh Gâp, Jêh ri nau sŏng Gâp mra jêng nau ang ma phung ndŭl mpôl bunuyh.

⁵ Nau sŏng srăng Gâp dăch êp jêh, Nau Gâp tâm rklaih dăch mpơl jêh, Nting tur Gâp mra chiă uănh phung ndŭl mpôl bunuyh. Lĕ rngôch gôl dak mƀŭt, mra kâp gân Gâp, Jêh ri khân păng kâp gân ma nting tur Gâp.

⁶ N'gơr hom măt khân may klơ lĕ ndâr trôk, Jêh ri uănh hom ta neh; Yorlah lĕ ndâr trôk mra lêk yơh nâm bu nhhŭk ŭnh, Neh ntu mra ơm nâm bu mlâm ao, Phung ƀon lan gŭ ta nây mra khĭt tâm ban ma rhuay. Ƀiălah nau Gâp tâm rklaih mra hôm n'ho ro, Nau sŏng srăng Gâp mâu blau lôch ôh.

⁷ Ơ phung gĭt nau sŏng, iăt hom Gâp! Khân may jêng phung nchih nau vay Gâp tâm nuih n'hâm; Lơi klach ôh ma nau bunuyh nduyh, Mâu lĕ krit kir ma nau khân păng suai rak.

⁸ Yorlah nchiăr mra sa khân păng tâm ban ma sa bok ao, Rhai mra sa khân păng tâm ban ma sa rsau biăp. Ƀiălah nau sŏng Gâp mra gŭ mro mrăng, Nau Gâp tâm rklaih mra hôm e ntơm bơh rnôk aơ tât rnôk ri.”

⁹ Ơ nting tur Brah Yêhôva Kah rngăl hom, kăl rngăl hom, nsoh hom nau ktang! Kah rngăl hom tâm ban ma rnôk kăl e Tâm ban ma rnôk saơm! Mâu di hĕ May yơh hŏ koh hăch Rahap, Nơm ntâp jêh mpa djơh dak mƀŭt?

¹⁰ Mâu di May hĕ ƀư suăt jêh dak mƀŭt, Ƀư suăt lơi lĕ tu dak brŏng toyh; Ƀư du mlâm trong tâm dak mƀŭt jru Gay ma phung may tâm chuai jêh dơi hăn rgăn?

¹¹ Phung Brah Yêhôva tâm chuai jêh mra plơ̆ sĭt, Khân păng mra văch ta Siôn tâm nau troh nter. Nau maak n'ho ro mra gŭ ta klơ bôk khân păng, Khân păng mra geh nau răm maak; Nau rngot jêh ri nau vơl nđor mra roh lĕ.

¹² “Gâp, Gâp yơh jêng Nơm bonh khân may. Mbu nơm may dĭng may klach ma bunuyh blau khĭt, Klach phung kon bunuyh jêng phung mra tâm ban ma gơ̆?

¹³ May chuêl jêh Brah Yêhôva, Nơm njêng may, Nơm ling jêh lĕ ndâr trôk Jêh ri n'gân mbon rplay neh, Gay ma may klach mro tâm lĕ nar Yor nau ji nuyh nơm tŭn jot, Nôk păng nkra ŭch ƀư rai may? Ƀiălah aƀaơ, mbah gŭ nau ji nuyh nơm tŭn jot?

¹⁴ Bu mra tâm rklaih gơnh phung jêng bu nă; Khân păng mâu mra khĭt tâm ndrung ngo ôh, Mâu lĕ khân păng pưt ndơ sông sa.

¹⁵ Yorlah Gâp jêng Yêhôva Brah Ndu khân may, Jêng Nơm ăn dak mƀŭt rbuh, jêh ri rbuh tap djhu djhut. Brah Yêhôva ma phung tahan jêng amoh Gâp.

¹⁶ Gâp dơm jêh nau gâp ngơi tâm trôm mbung may, Jêh ri pôn jêh may tâm dâng gui ti Gâp, Tâm nôk ndâk lĕ ndâr trôk, Dơm mbon rplay neh, Jêh ri lah ma ƀon Siôn pô aơ: ‘Khân may jêng phung ƀon lan Gâp.’”

¹⁷ Ơ ƀon Yêrusalem, Kah rngăl hom, kah rngăl hom jêh ri dâk hom may! May hŏ nhêt jêh kachok nau Păng ji nuih, Bơh ti Brah Yêhôva, Nhêt kŏ lĕ jêh Tâm khăl ăn hăn ndĭt ndiu.

¹⁸ Tâm phung kon bu klâu Yêrusalem deh jêh, Mâu geh du huê têk păng ôh; Tâm lĕ rngôch phung kon bu klâu păng rong, Mâu geh ôh du huê tât kuăn ti păng.

¹⁹ Bar nau tât aơ tât jêh ma khân may, Jêng nau rngot jêh ri nau ƀư rai, nau sa sât ji ngot jêh ri đao tak; Mbu nơm yô̆ ma may? Moh nau Gâp mra sŏk gay bonh may?

²⁰ Phung kon bu klâu may khĭt huăr da dê, Bê̆ch lă lêng tâm lam lĕ trong sâng, Tâm ban ma yơng geh nhuăl, Khân păng gŭ tâm dâng nau Brah Yêhôva ji nuih Jêh ri nau Brah Ndu khân may nduyh!

²¹ Iăt hom nau aơ, ơ nơm rêh ni, Jêng nơm nhŭl ƀiălah mâu di ma ndrănh ôh:

²² Kôranh Brah jêng Brah, Yêhôva, Brah Ndu may Jêng Nơm ngơi n'gang ma phung ƀon lan Păng, lah pô aơ: “Aơ, Gâp sŏk lơi jêh kachok nau hăn ndĭt ndĭl bơh ti may, Jêng kachok nau Gâp ji nuih; May mâu mra nhêt đŏng ôh.

²³ Gâp mra dơm păng tâm ti phung ƀư rêh ni may, Jêng phung lah jêh ma may pô aơ: ‘Lâng bê̆ch hom gay ma hên dơi rgăn!’ Jêh ri ndŭr kơi may jêng tâm ban ma mbon neh, Tâm ban ma trong bu rgăn.”