Êsai 50 - Nau Brah Ndu Ngơi 2023

Brah Yêhôva nduyh phung ƀon lan Păng

¹ Brah Yêhôva lah: “Ta ntŭk pŏk samƀŭt tâm chalơi ur sai mê̆ may Ma samƀŭt nây Gâp chalơi jêh păng? Mâu lah tâm phung tơm rnon ma Gâp Mbu moh Gâp tăch khân may? Aơ, yor nau kue may yơh dĭng bu tăch khân may; Yor nau khân may ƀư tih rĭ dĭng bu chalơi jêh mê̆ khân may.

² Mâm ƀư tơlah Gâp văch, mâu geh bunuyh ôh? Tơlah Gâp kuăl, mâu geh bunuyh plơ̆ lah ôh? Ti Gâp jêng gleh ir hĕ kŏ păng mâu dơi tâm chuai? Mâu lah Gâp mâu geh nau brah mâu dơi tâm rklaih hĕ? Aơ, Gâp knŏng nduyh du tong, dak mƀŭt suăt kro ro. Gâp rgâl dak krong jêng bri rdah; Ka tâm dâng dak krong khĭt yor mâu geh dak. Jêh ri ƀâu ôm.

³ Gâp sâm nsoh lĕ ndâr trôk ma nau ngo, Jêh ri ăn ƀau jêng ndơ nkŭm păng.”

Oh mon Brah Yêhôva rêh ni jêh ri geh nau dơi

⁴ Kôranh Brah Yêhôva ăn jêh ma Gâp Mpiăt phung nti jêh, Gay ma Gâp blau ngơi N'hao nuih phung rgănh. Ăp ôi Păng rlay Gâp, Păng pơk tôr Gâp Gay ma Gâp gŭ iăt tâm ban ma nơm nti.

⁵ Kôranh Brah jêng Brah Yêhôva hŏ pơk jêh tôr Gâp, Bi Gâp, Gâp mâu tâm rdâng ôh, Mâu lĕ Gâp plơ̆ rŭch.

⁶ Gâp jao jêh ndŭr kơi Gâp ăn bu dong, Jêh ri jao trô bom Gâp ma phung păk têp kang Gâp; Gâp mâu mâp pôn măt Ma nau bu ƀư bêk mâu lah bu soh dak diu ta măt.

⁷ Kôranh Brah jêng Brah Yêhôva mra kơl Gâp, Yor ri Gâp mâu geh nau bêk ôh; Yor nây, Gâp ƀư muh măt Gâp kranh tâm ban ma lŭ, Yorlah Gâp gĭt, Gâp mâu geh du ntil ndơ bêk ôh.

⁸ Nơm kơp Gâp sŏng srăng hŏ tât dăch jêh. Mbu nơm tâm rdâng đah Gâp? Ăn he dâk hom ndrel Gâp! Mbu nơm jêng phung tâm rdâng đah Gâp? Văch hom êp Gâp!

⁹ Nanê̆, Kôranh Brah jêng Brah Yêhôva mra kơl Gâp; Mbu nơm mbơh Gâp jêng tih? Aơ, lĕ rngôch khân păng mra mŭnh sat tâm ban ma blah ao Jêh ri nchiăr mra sa khân păng.

¹⁰ Mbu nơm tâm phung khân may klach yơk mbah ma Brah Yêhôva, Jêh ri tông bâr ma oh mon Păng, Mbu nơm hăn tâm nau ngo Jêh ri mâu geh nau ang ôh Rnơm nsing hom ma amoh Brah Yêhôva, Jêh ri nsing ma Brah Ndu păng.

¹¹ Aơ, lĕ rngôch khân may jêng phung sŭnh ŭnh, Jêh ri ŭnh rdo, Hăn hom ta nklang mpiăt ŭnh Jêh ri ŭnh rdo khân may su jêh! Aơ jêng nau ti Gâp hŏ ƀư ma khân may: Khân may mra lâng săk ma nau rêh ni!