Êsai 49 - Nau Brah Ndu Ngơi 2023

Oh mon Brah Yêhôva mra rklaih phung ƀon lan Păng

¹ Ơ lĕ gôl dak mƀŭt, iăt hom gâp! Ơ phung ƀon lan gŭ ngai, rkêng hom tôr: Brah Yêhôva kuăl jêh gâp bơh ndŭl me, Păng nkah amoh gâp dôl gâp hôm tâm ndŭl me.

² Păng ƀư ăn trôm mbung gâp jêng tâm ban ma đao hơr ngăn, Păng pôn jêh gâp tâm gui ti Păng. Păng ƀư ma gâp tâm ban chiông hăr mplanh, Jêh ri Păng pôn jêh gâp tâm dĭng hăr Păng.

³ Păng lah ma gâp: “Ơ Israel, may jêng oh mon Gâp, Gâp mra geh nau tâm rnê tă bơh may.”

⁴ Bi gâp, gâp lah: “Gâp hŏ pah kan jêh dơm dam, Gâp hŏ dŏng nau n'hâm suan ma nau dơm dam jêh ri mâu dơi jêng ôh.” Ƀiălah Brah Yêhôva mra phat dôih sŏng ma gâp, Kôranh Bah mra ăn nau nkhôm ma gâp.

⁵ Aƀaơ aơ, Brah Yêhôva, Nơm hŏ njêng jêh gâp jêng oh mon păng, bơh tâm ndŭl me, Gay ma gâp njŭn phung Yakôb plơ̆ sĭt ma Păng Jêh ri tâm rƀŭn phung Israel ma Păng; Yorlah gâp geh nau yơk tâm dâng măt Brah Yêhôva, Jêh ri Brah Ndu gâp jêng nau ktang gâp;

⁶ Păng lah ma gâp pô aơ: “Nau may ƀư oh mon Gâp gay rdâk đŏng phung ndŭl mpôl Yakôb, Jêh ri njŭn phung Israel hôm e plơ̆ sĭt Knŏng jêng nau kan jê̆; Gâp mra ƀư ma may jêng nau ang ma lĕ bri dak, Gay djôt nau gâp tâm rklaih tât ta nglĕ dŭt rplay neh.”

⁷ Brah Yêhôva, Nơm Tâm Chuai jêh ri nơm Kloh Ueh Israel, Lah ma nơm bu rmot ngăn, Ma nơm phung ƀon lan aơ mưch rmot, jêng oh mon ma nơm geh nau dơi toyh: “Phung hađăch mra saơ jêh ri dâk; Phung kon hađăch mra păn mbah, Yorlah Brah Yêhôva jêng Nơm răp jăp, Nơm Kloh Ueh Israel, Nơm săch jêh may.”

Phung kon Siôn mra dơi djôt sĭt ma ƀon tơm

⁸ Pô aơ Brah Yêhôva lah: “Gâp dơn jêh nau may ngơi tâm nar găl, Gâp kâp kơl may jêh ta nar tâm rklaih. Gâp mra mât mray may, N'gân may jêng du nau tâm rnglăp đah phung ƀon lan, Gay ndâk njêng tay bri dak, Jêh ri gay tâm pă neh ntŭk rngot njăp ƀư drăp ndơn;

⁹ Gay lah ma phung bu nă: ‘Luh hom,’ Lah ma phung gŭ tâm nau ngo, ‘Mpơl hom tâm nau ang!’ Khân păng mra chiăp phung biăp ta rŏ trong, Jêh ri ndrêch gơ̆ khân păng mra gŭ ta klơ lĕ rngôch yôk hil.

¹⁰ Khân păng mâu mra ji ngot ôh, mâu lĕ ji hir, N'hâm duh jêh ri nar mâu hôm ƀư rêh ni ma khân păng ôh, Yorlah Nơm yô̆ nđach ma khân păng mra njŭn khân păng, Njŭn leo khân păng văch dăch lĕ dak n'hor.

¹¹ Gâp mra ăn lĕ rngôch yôk Gâp plơ̆ jêng trong hăn, Jêh ri lĕ trong toyh Gâp bu mra dơi ƀư n'hao.

¹² Aơ, phung aơ mra văch tă bơh ngai, Phung ri mra văch tă bơh mpeh pa lơ, jêh ri bơh mpeh nhâp nar, Jêh ri phung êng tă bơh bri Syene.

¹³ Ơ lĕ ndâr trôk, troh nter hom! Ơ neh ntu, răm maak hom! Ơ yôk, nter troh mprơ hom! Yorlah Brah Yêhôva hŏ bonh leng jêh phung ƀon lan Păng, Jêh ri yô̆ nđach ma phung rêh ni.”

¹⁴ Ƀiălah ƀon Siôn hŏ ăp lah pô aơ: “Brah Yêhôva hŏ dun jêh gâp; Kôranh Brah gâp chuêl jêh gâp.”

¹⁵ “Dơi lĕ du huê bu ur me chuêl pu toh ma kon păng, Mâu lah mâu yô̆ ôh ma kon păng bơh ndŭl păng nơm? Nđâp tơlah păng chuêl kon păng, Ăt Gâp mâu mra chuêl may ôh.

¹⁶ Aơ, Gâp nchih jêh may ta mpang ti Gâp; Lĕ mpêr ƀon toyh may hôm ƀaƀơ tanăp măt Gâp.

¹⁷ Phung kon may ngăch plơ̆ sĭt; Phung ƀư mhĭk, ƀư rai may mra du bơh may.

¹⁸ N'gơr hom măt may uănh văr jŭm; Lĕ rngôch khân păng tâm rƀŭn ndrel văch ma may!” Brah Yêhôva lah: “Tĭng nâm Gâp gŭ rêh mro mrăng, May mra văn lĕ rngôch khân păng tâm ban ma ndơ nkrơ̆, Jêh ri may djôt khân păng tâm ban ma nse vân bŭt bu ur nđăp ma sai!

¹⁹ Nanê̆, lĕ ntŭk rlâm jêng rngol, Jêh ri neh may bu ƀư rai jêh, Aƀaơ jêng rhăt ir ma phung ƀon lan may gŭ. Phung sa rvăn may mra du ngai ma may.

²⁰ Phung kon may deh tâm rnôk roh bunuyh rnăk sa Mra lah ma tôr may: ‘Ntŭk aơ rhăt ir ma hên, Ăn hom ntŭk toyh lơn ma hên dơi gŭ.’

²¹ N'hêl nanê̆ may mra lah tâm nuih n'hâm: ‘Mbu nơm deh jêh phung kon aơ ma gâp? Gâp roh lĕ jêh kon; Gâp hŏ jêng bu nă mâu geh kon jêh ri nhhơt! Pônây mbu nơm sâm mât rong an phung kon jê̆ aơ? Aơ, bu chalơi jêh gâp gŭ êng; Pôri, phung kon jê̆ bơh tă khân păng luh?’”

²² Kôranh Brah jêng Brah Yêhôva lah: “Aơ, Gâp mra yơr ti Gâp ma lĕ bri dak, Ndâk n'ha kơ ma lĕ rngôch ƀon lan. Aƀaơ, khân păng mra chông phung kon bu klâu may ta ntang ntơh khân păng, Mbăk phung kon bu ur may ta klơ săng nglik hăn tât.

²³ Phung hađăch mra jêng mbơ̆ rong siăm may, Phung hađăch bu ur mra jêng me sâm pu may. Khân păng mra kŭnh măt nđĭl ta neh tanăp may, Ler ndruyh neh ta jâng may. Jêh nây may mra gĭt Gâp jêng Brah Yêhôva; Jêh ri phung kâp gân Gâp mâu mra bêk ôh.

²⁴ Mâm dĭng dơi sŏk lơi ndơ pit in bơh ti nơm ktang? Bu dơi tâm rklaih đŏng bunuyh sŏng srăng bơh tâm ndrung?”

²⁵ Ƀiălah Brah Yêhôva lah: “Nanê̆, đơ phung bunuyh tă nơm dăng bu nhŭp mra dơi rklaih, Bu mra mplơ̆ tay ndơ bơh phung janh ƀai sŏk pit; Yorlah Gâp mra tâm rdâng đah phung tâm rdâng đah may, Jêh ri Gâp yơh mra tâm rklaih phung kon may.

²⁶ Gâp mra ăn phung tŭn jot may sa nglay săk khân păng nơm, Nhŭl nhêt mham khân păng nơm tâm ban ma nhŭl ndrănh mhe. Lĕ rngôch bunuyh mra gĭt Gâp jêng Brah Yêhôva, Nơm Tâm Rklaih may, Jêng Nơm Tâm Chuai may, Nơm Geh Lĕ Nau Brah phung Yakôb!”