Êsai 48 - Nau Brah Ndu Ngơi 2023

Phung Israel mra rklaih bơh phung Kaldê

¹ Iăt hom nau aơ, Ơ ngih Yakôb, Jêng phung bu rnha ma amoh Israel, Luh tơm bơh Y-Yuđa, Jêng phung ton săk tâm amoh Brah Yêhôva, Jêh ri vơh vơl ma Brah Ndu phung Israel, Ƀiălah mâu geh nuih n'hâm nanê̆ ngăn jêh ri sŏng srăng ôh.

² Yorlah khân păng rnha khân păng nơm jêng phung luh bơh ƀon kloh ueh, Jêh ri rnơm ma Brah Ndu phung Israel; Amoh Păng jêng Brah Yêhôva ma phung tahan:

³ “Gâp hŏ mbơh lor jêh bơh rnôk kăl e lĕ nau hŏ găn jêh; Lĕ nau nây luh bơh bâr mbung Gâp, jêh ri Gâp hŏ mbơh ăn khân may gĭt; Ƀât lât dơm, Gâp ƀư nau nây, Jêh ri lĕ nây mra tât ngăn.

⁴ Yorlah Gâp gĭt jêh khân may dăng bôk, Trô ko may geh rse suan loih, Ndăr kleng may dăng nâm bu kông,

⁵ Rĭ dĭng Gâp mbơh jêh lĕ nau nây ma may bơh kăl e, Gâp mbơh jêh ăn may gĭt êlor ma nau nây tât ngăn, Klach lah may lah: ‘Rup brah gâp ƀư jêh lĕ nau nây; Rup gâp trah jêh ri rup gâp tŏ chiăr ntăm jêh nau nây.’

⁶ May tăng jêh, aƀaơ aơ uănh hom lĕ nau nây. Khân may mâu mra mbơh hĕ nau nây? Ntơm aƀaơ, Gâp mra ăn may gĭt ma lĕ nau mhe, Jêng lĕ nau kan ndâp khân may mâu mâp gĭt ôh.

⁷ Aƀaơ aơ, bu rhăk lĕ nau kan mhe nây, mâu mâp geh ôh tâm rnôk kăl e; Lor ma nar aơ, khân may mâu mâp tăng nau aơ ôh. Klach lah may lah: ‘Aơ, gâp gĭt jêh nau nây!’

⁸ May mâu mâp tăng ôh, mâu lĕ mâu mâp gĭt, Bơh kăl e, tôr may mâu mâp pơk ôh. Yorlah Gâp gĭt jêh may mơng tâm rdâng, Di ngăn bu kuăl khân may jêng phung tâm rdâng bơh ndŭl me.

⁹ Yor amoh Gâp dĭng Gâp ât lơi nau ji nuih; Yor nau chrêk rmah Gâp dĭng Gâp nkân lơi nau ji nuih đah may, Gay ma mâu ƀư rai may.

¹⁰ Aơ, Gâp ƀư kloh jêh khân may, ƀiălah mâu geh tâm ban ma ƀư kloh prăk ôh; Gâp rlong uănh jêh khân may tâm năk ŭnh nau rêh ni.

¹¹ Yor ma Gâp nơm, yor ma Gâp nơm yơh, Gâp mra ƀư nau nây, Mâm ƀư Gâp ăn bu ƀư ƀơ̆ amoh Gâp? Gâp mâu mra ăn ôh nau chrêk rmah Gâp ma brah êng.

¹² Ơ Yakôb jêng phung Israel, phung Gâp kuăl jêh, Iăt hom Gâp! Gâp yơh jêng Nơm nây; Gâp jêng lor lơn jêh ri nglĕ dŭt.

¹³ Ti Gâp nơm dơm jêh mbon rplay neh, Ti ma Gâp ling jêh lĕ ndâr trôk; Lah Gâp kuăl, Trôk jêh ri neh ntu dâk da dê.

¹⁴ Lĕ rngôch khân may tâm rgum hom jêh ri iăt hom! Mbu nơm tâm phung khân păng mbơh jêh lĕ nau aơ? Nơm Brah Yêhôva rŏng Mra ƀư maak nuih n'hâm Păng tâm nau tâm rdâng ma ƀon Babilôn, Nting tur păng mra tâm rdâng đah phung Kaldê.

¹⁵ Gâp, Gâp yơh hŏ ngơi jêh ri kuăl jêh păng, Gâp hŏ njŭn păng tât, jêh ri păng mra jêng tâm trong păng nơm.

¹⁶ Văch hom êp ma Gâp jêh ri iăt hom nau aơ: Bơh saơm, Gâp ê hŏ ăp lah tâm nau ndâp. Gâp gŭ jêh ta nĕ ntơm bơh nau nây tât ngăn. Aƀaơ aơ, Kôranh Brah jêng Brah Yêhôva njuăl jêh Gâp hăn tât Ndrel ma Brah Huêng Ueh Păng.”

¹⁷ Brah Yêhôva, Nơm Tâm Chuai may, Jêng Nơm Kloh Ueh Israel lah pônây: “Gâp jêng Yêhôva Brah Ndu may, Jêng Nơm sâm nti may gay may dơi geh nau khlay, Jêh ri njŭn may tâm trong may mra hăn.

¹⁸ Ueh lơn may hŏ rkêng tôr iăt lĕ nau vay ntăm bơh Gâp, Pônây nau đăp mpăn may mra jêng jêh tâm ban ma n'hong dak krong, Jêh ri nau sŏng srăng may tâm ban ma rbuh dak mƀŭt;

¹⁹ Noi deh may mra âk tâm ban ma choih, Kon sau may mra âk tâm ban ma ndruyh neh. Amoh khân păng mâu mra rai ôh, Mâu lĕ dơi roh tanăp Gâp.”

²⁰ Luh hom bơh Babilôn! du hom ngai bơh bri Kaldê! Răm maak troh nter hom mbơh jêh ri nkoch bri nau nây, Mbơh hom nau aơ kŏ tât dŭt rplay neh! Lah hom, “Brah Yêhôva tâm chuai jêh phung Yakôb, jêng oh mon Păng.”

²¹ Lah Păng njŭn khân păng găn bri rdah, khân păng mâu ji hir ôh; Yorlah Păng hŏ ăn dak hoch luh ma khân păng bơh lŭ toyh, Păng rlah lŭ toyh, jêh ri dak hoch luh du padih.

²² Ƀiălah Brah Yêhôva lah: “Mâu geh nau đăp mpăn ôh ma phung ƀai.”