Êsai 47 - Nau Brah Ndu Ngơi 2023

Nau mbơh lor ma nau rlâm tŭp ƀon Babilôn

¹ Ơ bu ur druh ƀon Babilôn, Trŭnh jêh ri gŭ hom tâm ndruyh neh! Ơ kon bu ur phung Kaldê! Gŭ hom ta neh, mâu hôm gŭ ta sưng hađăch ôh! Yorlah bu mra mâu hôm rnha ma may Jêng rdơ̆ rbăn ueh lăng ôh.

² Sŏk hom mpăl kĭn jêh ri kĭn rnih; Tăk lơi bok nkŭm muh măt may, Jêh ri doh lơi ntôr ao jâr may lơi nkŭm tơm blu may ôh Gay ma rgăn hom dak krong.

³ Nau rhôk may mra mpơl, Bu mra saơ nau may bêk. Gâp mra har plơng bôk, Gâp mâu mra ăn klen du huê ôh.

⁴ Nơm Tâm Chuai he Jêng Nơm Kloh Ueh phung Israel; Amoh Păng jêng Brah Yêhôva ma phung tahan.

⁵ Ơ kon bu ur phung Kaldê, Gŭ rklăk hom, jêh ri rŭch ta ntŭk ngo! Yorlah bu mâu hôm mra rnha ay Jêng hađăch bu ur ma lĕ rngôch ƀon bri hađăch.

⁶ Gâp hŏ hao ji nuih ma phung ƀon lan Gâp, Ƀư ƀơ̆ drăp ndơn Gâp Jêh ri jao jêh khân păng tâm ti may. Ƀiălah may mâu mâp yô̆ ôh ma khân păng; May hŏ dơm jêh ta klơ bunuyh ranh Du mlâm mbăk mâng jâk ngăn

⁷ Ay mĭn pô aơ: “Gâp mra jêng hađăch bu ur n'ho ro.” Ay mâu mâp mĭn ma lĕ nau aơ, Mâu lĕ ay mĭn ma nau mra tât ta kêng dŭt.

⁸ Aƀaơ aơ iăt hom nau aơ, ơ nơm rêh ma nau ueh, Nơm gŭ ma nau đăp rmên, Tâm nuih n'hâm ay nơm lah êng: “Knŏng gâp yơh, rlau ma gâp mâu geh nơm êng ôh; Gâp mâu mra jêng ndrô sai ôh, Mâu lĕ gĭt mâp roh phung kon gâp ôh.”

⁹ Tâm ƀât lât, tâm du nar, Bar ntil nau tât aơ mra tât ma ay jêng nau roh phung kon jêh ri nau bu ur ndrô sai Mra tât ma ay. Bar ntil nau tât aơ mra tât ndal ma ay, Nđâp tơlah ay jêng n'hŭm njêh, Jêh ri geh nau brah toyh blau rƀên kđôi lĕ.

¹⁰ Ay rnơm tâm nau ƀai ay. Jêh ri ay lah pô aơ: “Mâu geh nơm saơ gâp ôh.” Nau blau mĭn jêh ri nau ay gĭt rbăng Hŏ njŭn leo ay tâm trong tih, Jêh ri ay lah jêh tâm nuih n'hâm pô aơ: “Gâp aơ, rlau ma gâp mâu geh nơm êng ôh!”

¹¹ Yor nây, nau djơh mhĭk mra tât ndal ma ay Ƀiălah ay mâu gĭt ôh tă păng văch; Nau rêh ni mra tŭp ta ay, Ƀiălah ay mâu dơi king ôh; Nau ƀư rai mra tât ma ay ƀât lât dơm, Ƀiălah ay mâu năn gĭt ôh.

¹² Dâk hom, dŏng nau rƀên ay jêh ri âk nau ngơi n'hŭm Ay hŏ sâm nti jêh bơh rnôk ay hôm druh. Năng ai păng mra kơl ma ay, Klăp lah ay dơi nhhu bu!

¹³ Ay rgănh jêh ma nau ay tâm nchră âk; Ăn phung uănh trôk, phung sek mănh, phung sek khay mhe, Gay ma nchroh nau mra tât tâm nar kăndơ̆; Aƀaơ, dâk hom jêh ri rklaih ay Bơh lĕ nau mra tât ma ay.

¹⁴ Aơ, khân păng mra plơ̆ jêng tâm ban ma rhe, Ŭnh sa; Khân păng mâu dơi tâm rklaih khân păng nơm ôh Bơh nau brah mpiăt ŭnh; Ŭnh aơ mâu jêng ôh tâm ban ma ônh rnga bu njâr, Mâu lah gŭ pĭt ŭnh.

¹⁵ Lĕ nau khân păng ƀư jâk jêr hŏ jêng kơt aơ; Phung tăch rgâl jêh ndrel ma ay ntơm rnôk mom ndăm Ăp nơm khân păng nsong mblêng tĭng nâm trong tih păng nơm, Mâu dơi geh nơm tâm rklaih ay ôh!