Êsai 46 - Nau Brah Ndu Ngơi 2023

Lĕ brah phung Babilôn

¹ Brah Bel cha lôt, brah Nêbô prah sơmok, Rup brah khân păng bu rdeng ta klơ ndŭr kơi mpa bri jêh ri mpô mpa rong. Phung rup khân may vay tung Jêng du ndơ jâk, ƀư rgănh mpô mpa.

² Khân păng prah sơmok jêh ri cha lôt, Mâu dơi tâm rklaih ndơ jâk ta klơ ndŭr kơi, Jêh ri khân păng nơm hăn du jêng bu nă.

³ “Ơ ngih Yakôb jêh ri lĕ rngôch phung hôm klen bơh ngih Israel, Iăt hom Gâp, Gâp hŏ mât mray jêh khân may ntơm bơh hôm tâm ndŭl me, Ut ra-u khân may ntơm nôk mhe deh;

⁴ Kŏ tât khân may ranh, sŏk tâm bôk luh ndra, Gâp jêng Nơm anh khân may ƀaƀơ. Gâp hŏ njêng jêh, jêh ri Gâp mra ut ra-u; Gâp mra anh jêh ri rklaih khân may.

⁵ Ma mbu đah khân may tâm rđĭl đah Gâp jêh ri mbu nơm ban Gâp? Ma mbu đah khân may tâm rđĭl đah Gâp gay ma saơ he tâm ban da dê?

⁶ Bu sŏk mah tă bơh dŭng, Jêh ri veh prăk ma njing; Khân păng nkhôm nơm chiăr prăk tŏ du brah, Jêh ri păn yơk mbah.

⁷ Khân păng tuy rup nây ta săng nglik, jêh ri djôt, Dơm rup nây ta ntŭk păng, jêh ri păng gŭ dâk ta nây; Păng mâu mpât du bơh ntŭk păng ôh. Tơlah bu nter ma păng, păng mâu dơi plơ̆ lah ôh, Jêh ri mâu lĕ dơi rklaih khân păng bơh nau tât.”

Knŏng du huê Brah Yêhôva jêng Brah Ndu

⁸ “Ăn khân may kah gĭt nau aơ jêh ri sek mĭn; Ơ phung ƀư tih, ăn khân mĭn tay!

⁹ Ăn khân may kah gĭt tay lĕ nau kan panăp, ntơm bơh rnôk kăl e; Yorlah Gâp jêng Brah Ndu, mâu geh Nơm êng ôh. Gâp jêng Brah Ndu jêh ri mâu geh nơm tâm ban ma Gâp ôh.

¹⁰ Ntơm bơh saơm, Gâp hŏ mbơh lor nau tât kêng dŭt, Jêh ri hŏ mbơh bơh rnôk kăl e nau ê hŏ tât. Gâp hŏ lah: ‘Nau Gâp nchră mra jêng, Jêh ri Gâp mra ƀư lĕ nau Gâp ŭch.’

¹¹ Bơh mpeh luh nar, Gâp hŏ kuăl du mlâm sĭm klang; Bơh bri ngai, Gâp kuăl du huê bunuyh ƀư nau ŭch nchră Gâp tât. Nau Gâp ngơi jêh, Gâp mra ƀư lôch; Nau Gâp hŏ dăp jêh, Gâp mra ƀư.

¹² Ơ phung geh nuih n'hâm dăng, Ơ phung gŭ ngai bơh nau sŏng srăng, Gŭ iăt hom Gâp.

¹³ Gâp njŭn nau sŏng srăng Gâp văch dăch, păng mâu gŭ ngai ôh, Nau Gâp tâm rklaih mâu mra gŭ kâp jŏ ôh. Gâp mra ăn nau tâm rklaih tâm ƀon Siôn, Ăn nau chrêk rmah Gâp ma phung Israel.”