Êsai 45 - Nau Brah Ndu Ngơi 2023

Nau mbơh lor ma Y-Sirus

¹ Brah Yêhôva lah ma Y-Sirus, nơm Păng tŏ jêh dak ƀâu kah, tâm ban pônây: Gâp hŏ kuăn jêh ti ma may, Gay ma may tŭn mpet lĕ bri dak tanăp măt may; Gâp mra doh lơi rse bŭt phung hađăch, Pơk lĕ mpông bloh ƀon toyh tanăp may, Jêh ri pơk lĕ mpông pêr mâu ntĭl ndâp đŏng.

² “Gâp yơh mra hăn lor panăp măt may, Ƀư lâng lĕ trong nduh ndăp; Ƀư rai lĕ mpông pêr kông, Nkê̆ch lơi mâng loih nđăng.

³ Gâp mra ăn ma may jay ndơ khlay ndâp, Drăp ndơ bu prăp tâm ntŭk ndâp, Gay ma dơi gĭt Gâp yơh jêng Yêhôva Brah Ndu, Brah Ndu phung Israel, Nơm hŏ kuăl amoh may.

⁴ Yorlah Yakôb, oh mon Gâp, Jêh ri Israel, nơm Gâp hŏ săch jêh, Yor ri Gâp hŏ kuăl amoh may, Gâp hŏ ăn ma may du ntil ndơ bu gĭt năl, nđâp lah may mâu năl Gâp ôh.

⁵ Gâp jêng Brah Yêhôva, mâu geh Nơm êng ôh, Rlau ma Gâp, mâu hôm geh Brah Ndu êng ôh. Nđâp tơlah may mâu gĭt năl Gâp, Gâp mra rêt an rse bŭt may,

⁶ Gay ma phung bunuyh dơi gĭt ntơm bơh ntŭk nar luh tât nar nhâp, Rlau ma Gâp, mâu geh Nơm êng ôh. Gâp jêng Brah Yêhôva, mâu geh Nơm êng ôh.

⁷ Gâp jêng Nơm njêng nau ang jêh ri nau ngo, Ƀư nau đăp mpăn jêh ri njêng nau tât; Gâp nơm yơh, Brah Yêhôva, jêng Nơm ƀư lĕ rngôch nau aơ.

⁸ Ơ lĕ ndâr trôk, tŭp hom dak ngom tă bơh klơ, Ăn hom tŭk nkhŭt mih nau sŏng srăng. Neh ntu pơk hom, gay geh kao play nau tâm rklaih, Jêh ri nau sŏng srăng ntơm hon. Gâp jêng Brah Yêhôva, Gâp nơm yơh rhăk jêh nau nây.”

Bu mbơh nau tâm rklaih ma phung ƀon lan Păng

⁹ Rêh ni ngăn ma nơm tâm rlăch đah Nơm rhăk njêng păng! Păng knŏng jêng du rplay yăng tâm lĕ tâm yăng ma neh! Di lĕ neh uk ôp nơm blau mon glah, jêng nơm mon păng pô aơ: “Moh rup may ƀư?” Mâu lah: “Ndơ bơh ti may ƀư mâu geh ueh ôh?”

¹⁰ Rêh ni ngăn ma nơm lah ma mbơ̆ păng: “Moh ndơ may deh?” Mâu lah ma me păng: “Ndơ ƀư ay ji deh?”

¹¹ Brah Yêhôva, Nơm Kloh Ueh Israel, Jêng Nơm hŏ njêng Israel, lah pô aơ: “Ôp hom Gâp moh nau mra tât kăndơ̆; Ôp hom Gâp ma lĕ phung kon Gâp, Jêh ri lĕ ma kan ti Gâp.

¹² Gâp yơh hŏ njêng rplay neh, Jêh ri rhăk njêng jêh bunuyh ta klơ păng. Gâp nơm yơh ling jêh lĕ ndâr trôk, Jêh ri ntrŭnh nau ntăm ma lĕ rngôch phung mănh mbing.

¹³ Gâp nơm yơh hŏ ƀư ăn jêh ma nơm nây n'hao tâm nau sŏng srăng, Jêh ri ƀư ma lĕ rngôch trong păng lâng. Păng mra ndâk tay ƀon toyh Gâp, Jêh ri dơi jêng kon me ma phung ƀon lan Gâp tă bơh bu krŭng Ƀiălah mâu kêh rnoh chuai, mâu đŏng ŭch nau nkhôm,” Brah Yêhôva ma phung tahan lah.

¹⁴ Pô aơ Brah Yêhôva lah tâm ban pônây: “Drăp ndơ bri Êjipt, ndơ tăch kao bri Kus Jêh ri phung Sabê, bunuyh juat toyh, Mra văch ma may da dê, jêh ri jêng ndơ may; Khân păng mra tĭng ndô̆ may, djôt nse rvăk, Păn tanăp may, khân păng mra vơh vơl ma may jêh ri lah: ‘Nanê̆, Brah Ndu gŭ ndrel ma khân may; Rlau ma Păng, mâu geh Nơm êng ôh, Mâu geh Brah Ndu êng ôh!’”

¹⁵ Ơ Brah Ndu, Nơm tâm rklaih phung Israel. Nanê̆ May jêng Brah Ndu pôn may nơm!

¹⁶ Lĕ rngôch phung ƀư rup brah mra bêk, bu mưch; Khân păng rŭch plơ̆ sĭt tâm nau bêk prêng.

¹⁷ Bi Israel, Brah Yêhôva mra tâm rklaih, Ma nau tâm rklaih n'ho ro; Kŏ tât n'ho ro, Khân may mâu mra bêk mâu lah uh ah ôh!

¹⁸ Yorlah Brah Yêhôva jêng Nơm hŏ rhăk njêng lĕ ndâr trôk, Jêng Brah Ndu, Nơm hŏ rhăk njêng rplay neh, Păng njêng jêh ri ƀư ăn nâp, Păng mâu rhăk ăn jêng ntŭk hŏng ôh, Ƀiălah njêng păng ăn ntŭk kon bunuyh gŭ. Nơm nây lah pô aơ: “Gâp jêng Brah Yêhôva, mâu hôm geh Nơm êng ôh!”

Brah rup mâu dơi rklaih bu ôh

¹⁹ “Gâp mâu mâp ngơi ndâp ôh, Mâu lĕ ngơi tâm bri nau ngo. Gâp mâu mâp lah ôh ma phung kon sau Yakôb pô aơ: ‘Di lĕ khân may joi Gâp jêng dơm dam?’ Gâp yơh Brah Yêhôva, Nơm ngơi nau sŏng srăng, Mbơh nau nanê̆ ngăn.”

²⁰ Ơ phung ndŭl mpôl nchuăt du tâm lĕ bri dak, Tâm rƀŭn hom khân may jêh ri văch hom, văch êp ndrel n'grŭp! Phung tung rup brah trah ma si, Kuăl dăn ma brah mâu dơi rklaih bu ôh, Nanê̆ khân păng mâu gĭt rbăng ôh!

²¹ Pôri mbơh hom, jêh ri đă khân păng văch dăch; Ăn khân păng tâm nchră ndrel n'grŭp! Mbu nơm hŏ nkoch nau aơ ntơm bơh kăl e? Mbu nơm mbơh jêh nau aơ bơh saơm? Mâu di hĕ Gâp nơm yơh jêng Brah Yêhôva? Rlau ma Gâp, mâu hôm geh brah êng ôh, Jêng Brah Ndu sŏng srăng jêh ri jêng Nơm Tâm Rklaih; Rlau ma Gâp, mâu hôm geh Nơm êng ôh.

²² Ơ lĕ rngôch mbu nơm gŭ ntŭk dŭt bri dŭt neh, Sĭt hom ma Gâp jêh ri geh nau tâm rklaih! Yorlah Gâp jêng Brah Ndu, mâu geh Brah êng ôh.

²³ Gâp hŏ tâm amoh Gâp nơm ton Nau ngơi sŏng srăng luh jêh bơh bâr mbung Gâp Mâu mra plơ̆ sĭt ôh; Lĕ rngôch kômâk mra chon mon tanăp Gâp, Jêh ri lĕ rngôch mpiăt mra ton săk tâm amoh Gâp.

²⁴ Bu mra lah ma Gâp pô aơ: “Knŏng tâm Brah Yêhôva yơh geh nau sŏng srăng jêh ri nau ktang;” Jêh ri bu mra văch ma Păng. Lĕ rngôch bunuyh ji nuih đah Păng mra bêk.

²⁵ Ƀiălah tâm Brah Yêhôva, lĕ rngôch kon sau Israel Mra dơi kơp sŏng srăng jêh ri geh nau chrêk rmah.