Êsai 44 - Nau Brah Ndu Ngơi 2023

Nau dơi Brah Yêhôva dŭt toyh

¹ Aƀaơ aơ ơ phung Yakôb, oh mon Gâp, Ơ Israel Gâp hŏ săch jêh, iăt hom!

² Brah Yêhôva jêng Nơm njêng jêh may, Hŏ mon jêh may tâm ndŭl me, jêh ri mra kơl may; Păng lah: Ơ phung Yakôb, oh mon Gâp, Jêh ri Yêsurun, nơm Gâp săch jêh, lơi klach ôh!

³ Yorlah Gâp mra nkhŭt dak ta bunuyh ji hir, Ăn dak n'hor hoch ta neh sơh. Gâp mra nkhŭt Brah Gâp ma noi deh may Jêh ri ăn nau ueh lăng ma phung sau se may.

⁴ Khân păng mra hon ta nklang gơ̆, Tâm ban ma tơm si yôr dăch n'hor dak hoch.

⁵ Nơm aơ mra lah pô aơ: ‘Gâp jêng ndơ Brah Yêhôva;’ Nơm êng tâm amoh păng nơm ma amoh Yakôb, Nơm êng đŏng nchih ta ti păng nơm pô aơ: ‘Gâp jêng ndơ Yêhôva’ Jêh ri mbơh tâm amoh păng nơm ma amoh Y-Israel.”

⁶ Brah Yêhôva jêng Hađăch jêh ri Nơm Tâm Chuai Israel, Jêng Brah Yêhôva ma phung tahan, lah: “Gâp jêng lor lơn jêh ri Nơm nglĕ dŭt; Rlau ma Gâp mâu hôm geh Brah Ndu êng ôh.

⁷ Mbu nơm jêng tâm ban ma Gâp? Ăn păng mbơh nau nây, Nkoch mbơh jêh ri mpơl nau nây ma Gâp Moh nau tât ntơm bơh rnôk Gâp ndâk phung ƀon lan ơm aơ. Ăn khân păng mbơh moh nau mra tât Jêh ri lĕ nau dăch tât ma khân păng.

⁸ Lơi klach ôh, mâu rŭng răng. Mâu di hĕ Gâp mbơh nau nây ma khân may bơh jŏ jêh? Khân may jêng phung mbơh ngăn ma Gâp. Rlau ma Gâp, hôm geh Brah Ndu êng đŏng? Nanê̆ ngăn, mâu geh Lŭ Toyh êng ôh; Gâp gĭt mâu hôm geh nơm êng ôh.”

Nau mbah rup brah jêng nau dơm dam

⁹ Lĕ rngôch phung ƀư rup trah jêng dơm dam, jêh ri lĕ ndơ khân păng rŏng ŭch mâu geh nau khlay. Phung mbơh ngăn ma rup brah nây mâu blau saơ ôh, mâu lĕ gĭt rbăng, rĭ dĭng khân păng djôt nau bêk prêng.

¹⁰ Mbu nơm njêng du huê brah jêh ri tŏ chiăr du mlâm rup mâu geh nau khlay?

¹¹ Aơ, lĕ rngôch phung băl păng mra geh nau bêk prêng; phung pah kan nây jêng knŏng bunuyh dơm. Ăn lĕ rngôch khân păng tâm rƀŭn jêh ri dâk! Khân păng mra klach krit jêh ri bêk prêng da dê.

¹² Nơm chiăr sŏk du njăr loih gŭch sĭn jêh ta klơ rnga ŭnh, jêh ri dŏng me nôp gay ƀư rup; păng pah kan ma ti ktang păng. Nđâp lah ji ngot jêh ri mâu hôm dăng, păng mâu nhêt dak ôh, jêh ri rgănh huơi.

¹³ Nơm trah si nthăng rse veh, dŏng klo kach rup, păng trah si ma mpu, dŏng kômpa nchih rup kon bunuyh, jêh ri ƀư rup bunuyh ueh, n'gân păng gŭ tâm ngih.

¹⁴ Păng kăl si sêdar; mâu lah săch tơm si têrêbin, tơm si guyh, jêh ri ăn păng văch ma toyh tâm krŏng. Păng tăm tơm si n'ho, jêh nây dak mih ăn păng văch ma toyh.

¹⁵ Bu mra dŏng tơm si bơh lĕ tơm si nây ƀư long sŭnh ŭnh; du gâl dŏng sênh ŭnh njâr, du gâl dŏng sŭnh ŭnh gay gŭch piăng let, jêh nây sŏk đŏng du kô̆ gay ƀư du mlâm du brah gay yơk mbah, jêh ri yơk mbah ma rup nây, du rup trah gay chon mbah tanăp măt păng.

¹⁶ Bu sŏk du n'gul gay su ma ŭnh, gŭch puăch ta klơ păng, gay sa kŏ hơm, mâu lah njâr ăn răm, jêh ri lah: “Ah ha, gâp răm jêh, gâp lŏ saơ jêh ŭnh!”

¹⁷ Gâl si hôm e, bu ƀư du mlâm brah, nâm bu ntĭt du rup trah ma păng nơm, jêh nây chon mon tanăp măt păng gay yơk mbah jêh ri kuăl mbơh sơm ma păng pô aơ: “Tâm rklaih hom gâp, yorlah may jêng brah gâp!”

¹⁸ Phung nây mâu gĭt rbăng ôh, mâu lĕ blau sek uănh; yorlah măt khân păng nhêp jêh gay mâu dơi saơ ôh, nuih n'hâm khân păng nchăng jêh gay mâu dơi gĭt rbăng.

¹⁹ Mâu geh nơm gŭ mĭn ôh, mâu lĕ geh nơm dŏng nau gĭt rbăng mâu lah nau sek uănh, kŏ tât lah pô aơ: “Gâp sŏk jêh du gâl tơm si nây sŭnh ŭnh, ta klơ sa ônh gâp hŏ gŭch piăng let, gâp hŏ gŭch puăch jêh ri gâp sa; jêh ri gâl hôm e, gâp ƀư du ndơ bu tâm rmot lĕ? Mâm gâp hăn chon mon mbah đŏng tanăp du n'gâng tơm si?”

²⁰ Nơm nây siăm păng nơm ma ŭnh buh; nuih n'hâm ngo ƀư ăn păng vĭ trong, mâu dơi tâm rklaih huêng păng ôh. Păng mâu lĕ prot ôp êng păng nơm: “Mâu di hĕ ndơ gâp djôt tâm ti ma gâp jêng ndơ mƀruh?”

Nau ton ma nau tâm chuai

²¹ Ơ phung Yakôb, ăn khân may kah gĭt hom ma nau aơ! Ơ phung Israel, yorlah may jêng phung oh mon Gâp. Gâp njêng jêh may, may jêng oh mon Gâp; Ơ phung Israel, Gâp mâu mra chuêl may ôh.

²² Gâp jut jêh nau tih may tâm ban ma tŭk mbâl, Jêh ri nau tih may tâm ban ma ndâr tŭk. Plơ̆ sĭt hom ma Gâp, yorlah Gâp tâm chuai jêh may.

²³ Ơ lĕ ndâr trôk, mprơ rhơn hom, Yorlah Brah Yêhôva hŏ ƀư jêh nau nây! Ơ lĕ ntŭk tâm dâng neh ntu, troh nter hom! Ơ phung yôk, ơ krŏng jêh ri lĕ rngôch tơm si ta nây, Mprơ huy hom! Yorlah Brah Yêhôva tâm chuai jêh phung Yakôb, Jêh ri tâm mpơl nau chrêk rmah Păng tâm phung Israel.

²⁴ Brah Yêhôva jêng Nơm tâm chuai may, Nơm hŏ njêng may tâm ndŭl me, lah kơt aơ: “Gâp jêng Brah Yêhôva, Nơm njêng jêh lĕ rngôch ndơ, Du huê Gâp nơm hŏ ling lĕ ndâr trôk Jêh ri lăk jêh neh ntu — Mbu nơm gŭ ndrel Gâp? —

²⁵ Gâp jêng Nơm ƀư roh nau tâm mbên mƀruh phung mbơh lor nklă, Ƀư ma nơm n'hŭm jêng rluk, Ƀư ma nơm blau mĭn mâu geh nau rai yot, Rgâl nau gĭt rbăng khân păng jêng nau rluk

²⁶ Brah Ndu ƀư nanê̆ nau oh mon Păng ngơi, Ăn tât moh nau phung Păng hăn mbơh Lah ma ƀon Yêrusalem pô aơ: ‘Bu mra gŭ tâm păng’ Jêh ri ma lĕ ƀon bri Yuđa pô aơ: ‘Bu mra rdâk tay păng. Gâp mra ndâk tay lĕ ntŭk roh rai păng.’

²⁷ Brah Ndu lah ma ntu dak jru pô aơ: ‘Suăt hom may, Gâp mra ƀư suăt lơi lĕ dak krong may.’

²⁸ Păng jêng Nơm hŏ lah pô aơ: ‘Sirus jêng rmăk biăp Gâp, Păng mra ƀư lĕ nau Gâp ŭch;’ Jêng nơm lah ma ƀon Yêrusalem pô aơ: ‘Păng mra ndâk tay,’ Jêh ri ma ngih brah pô aơ: ‘Păng mra n'gân tay mbon.’ ”