Êsai 41 - Nau Brah Ndu Ngơi 2023

Nau Brah Ndu ton ngăn ma phung Israel

¹ Ơ lĕ rngôch gôl dak mƀŭt, gŭ rklăk hom tanăp Gâp! Ăn hom lĕ ntil mpôl bunuyh sŏk dơn nau ktang mhe; Ăn khân păng văch dăch jêh ri ăn khân păng ngơi! Ăn he hăn dăch ndrel n'grŭp gay ma phat dôih!

² Mbu nơm ƀư jêh du huê bunuyh luh tă bơh mpeh luh nar, Sŏk nau sŏng srăng kuăl bunuyh hăn tât jâng păng nơm? Păng jao lĕ bri dak tanăp păng, Ƀư ăn păng tŭn jot lĕ phung hađăch; Păng jao khân păng mpiăt đao păng tâm ban ma ndruyh neh, Jêh ri jao khân păng ma na păng tâm ban ma rhe sial khôm.

³ May tĭng groi khân păng Jêh ri găn trong păng ê hŏ mâp hăn ôh Ƀiălah ăt geh nau đăp mpăn.

⁴ Mbu nơm hŏ ƀư jêh ri ƀư lôch jêh nau nây? Mbu nơm hŏ kuăl jêh lĕ rngôch rô̆ bơh ntơm saơm? Gâp yơh ƀư, Brah Yêhôva, Nơm Lor Lơn jêh ri Nơm Nglĕ Dŭt.

⁵ Lĕ rngôch gôl dak mƀŭt saơ jêh ri klach krit, Lĕ ntŭk nglĕ dŭt neh ntu râm sâr da dê. Khân păng văch dăch jêh ri hăn tât.

⁶ Ăp nơm kơl phung chiau meng păng Jêh ri lah ma oh nâu păng: “Gŭ ktang hom!”

⁷ Nơm trah meh n'hao nuih nơm chiăr prăk, Nơm tôp n'hao nuih nơm chiăr; Khân păng lah ma mâng han pô aơ: “Păng jêng ueh jêh!” Jêh nây sŏk kđĭn pâng gay rup mâu n'goh n'gơ.

⁸ Ƀiălah ơ phung Israel, khân may jêng oh mon Gâp, Ơ Yakôb, jêng nơm Gâp hŏ săch jêh, Khân may jêng noi deh Y-Abraham, mĭt jiăng Gâp.

⁹ Gâp hŏ kuăn jêh may bơh bôl bri neh, Kuăl jêh may tă bơh bri ngai Jêh ri lah ma may pô aơ: “May jêng oh mon Gâp, Gâp hŏ săch jêh may, mâu chalơi may ôh.”

¹⁰ Lơi klach ôh yorlah Gâp gŭ ndrel ma may, Lơi klach krit ngăn ôh yorlah Gâp jêng Brah Ndu may! Gâp mra ƀư ktang may; di yơh, Gâp mra kơl may, Gâp mra kuăn rdâng may ma ti ma nau sŏng srăng Gâp.

¹¹ Aơ, lĕ rngôch phung ji nuih đah may Mra geh nau bêk prêng jêh ri bu mưch. Phung tâm rdâng đah may Mra jêng dơm dam jêh ri rai yot.

¹² May mra joi phung tâm rdâng đah may, Ƀiălah mâu saơ khân păng ôh; Phung tâm lơh đah may Bu mra nkhĭt lĕ jêh ri mâu hôm geh ôh.

¹³ Yorlah Gâp jêng Yêhôva Brah Ndu may, Nơm kuăn ti ma may Jêh ri lah ma may pô aơ: “Lơi klach ôh, Gâp yơh mra kơl may.”

¹⁴ Ơ phung ndrŭng Yakôb, lơi klach ôh! Ơ phung Israel, Gâp nơm mra kơl may, Brah Yêhôva lah kơt nây; Nơm tâm chuai may jêng Nơm Kloh Ueh phung Israel.

¹⁵ Aơ, Gâp mra ăn may jêng ndơ mprah ba Ƀă mhe ƀă hơr ngăn jêh ri geh âk sêk. May mra jot plên jêh ri ƀư nchah rai lĕ yôk, Ƀư ma phung yôk jêng tâm ban ma rhe.

¹⁶ May mra mpruh khân păng, jêh ri sial mra khôm khân păng, Trôm sial vănh blông mra ƀư khân păng nchah rai pru pra. Ƀiălah may mra maak tâm Brah Yêhôva, Jêh ri may mra rnê êng tâm Nơm Kloh Ueh Israel.

¹⁷ Phung o ach jêh ri phung pưt kƀah joi dak nhêt Ƀiălah mâu geh ôh, Mpiăt khân păng sơh yor ji hir. Ƀiălah Gâp jêng Brah Yêhôva mra dơn nau khân păng; Gâp jêng Brah Ndu Israel mâu mra chalơi khân păng ôh.

¹⁸ Gâp mra ƀư ăn ma dak krong hoch tă bơh yôk hil, Jêh ri dak n'hor bruh hao ta nklang lĕ rlŭng. Gâp mra ăn bri rdah jêng dak nglao, Jêh ri neh sơh jêng lĕ tu dak.

¹⁹ Gâp mra dơm tâm bri rdah tơm si sêdar, Tơm si akasi, tơm si mirtơ, jêh ri tơm ôlive; Gâp mra tăm tâm ndrêch rdah tơm si chiprơ, Tơm si n'ho, jêh ri ndrel ma tơm si buis.

²⁰ Gay ma phung bunuyh dơi saơ jêh ri gĭt, Dơi mĭn rvê ndrel jêh ri gĭt rbăng Ti Brah Yêhôva ƀư jêh nau aơ, Nơm Kloh Ueh Israel rhăk njêng khân păng.

Lĕ rup brah jêng dơm dam

²¹ Brah Yêhôva lah: “Tâm mpơl hom nau khân may tâm phong dôih;” Hađăch phung Yakôb lah: “Tâm mpơl hom lĕ nau di khân may.”

²² Ăn khân păng hăn dăch jêh ri mbơh ăn hên gĭt Moh nau mra tât! Nkoch bri hom ma hên moh lĕ nau hŏ geh bơh kăl e, Gay ma hên dơi sek uănh khân păng Jêh ri gĭt rbăng nau nglĕ dŭt khân păng; Mâu lah mbơh ăn hên gĭt moh nau mra tât.

²³ Mbơh hom ma hên lĕ nau mra tât ta kăndơ̆, Gay ma hên dơi gĭt khân may jêng phung brah; Ƀư ăn nau ueh mâu lah ƀư mhĭk, Gay ma he saơ ndrel jêh ri hih rhâl.

²⁴ Aơ, khân may jêng dơm dam, Nau kan khân may ƀư jêh ăt jêng mâu khlay ôh; Nơm săch khân may dŭt ƀơ̆ ƀơch ngăn!

²⁵ Gâp ƀư lư du huê tă bơh mpeh pa lơ, jêh ri păng văch jêh; Păng kuăl amoh Gâp tă bơh mpeh luh nar. Păng mra jot phung kôranh chiă uănh nâm bu jot bŏk neh, Tâm ban ma nơm blau mon glah jot neh tâm dâng jâng.

²⁶ Mbu nơm mbơh jêh nau nây bơh ntơm saơm gay ma he dơi gĭt? Mbu nơm mbơh bơh rnôk lor gay ma he dơi lah: “Păng jêng di lĕ”? Ƀiălah mâu geh nơm mbơh, mâu geh nơm tâm mpơl ôh, Mâu lĕ geh nơm tăng nau khân may ngơi ôh.

²⁷ Gâp jêng Nơm tal lor lơn mbơh jêh nau nây ma Siôn: “Aơ, khân păng!” Jêh ri Gâp mra njuăl nơm mbơh nau mhe mhan ueh tât ta Yêrusalem.

²⁸ Gâp uănh ƀiălah mâu geh du huê ôh; Ta nklang khân păng, mâu geh du huê nơm tâm kơl nchră Gay ma tơlah Gâp ôp, khân păng dơi plơ̆ lah ma Gâp du nau ngơi.

²⁹ Aơ, lĕ rngôch khân păng knŏng jêng nau ndơm; Nau kan khân păng mâu geh nau khlay ôh; Rup brah khân păng tŏ chiăr jêng dơm dam tâm ban ma sial khôm.