Êsai 40 - Nau Brah Ndu Ngơi 2023

Brah Yêhôva mra rklaih phung ƀon lan Păng. – Nau ton ma Nơm Mêsia. – Yêrusalem mhe ( 40:1 – 66:24 ) Phung ƀon lan Brah Ndu geh nau bonh leng

¹ Brah Ndu khân may lah: “Bonh leng hom, bonh leng hom phung ƀon lan Gâp.

² Ngơi hom ma nau rdơ̆ ma Yêrusalem, Jêh ri mbơh pô aơ nau păng tâm lơh lĕ dŭt jêh, Nau tih păng yô̆ ăn jêh; Păng hŏ dơn bar tơ̆ bơh ti Brah Yêhôva, Ma lĕ rngôch nau tih păng.”

³ Geh bâr nter tâm bri rdah: “Pơk hom du trong ma Brah Yêhôva; Ƀư hom ăn sŏng du trong toyh tâm ndrêch rdah ma Brah Ndu he!

⁴ Lĕ rngôch rlŭng mra hao ta klơ, Lĕ rngôch yôk mbon mra hŭch tâm dâng; Lĕ ntŭk rklĭng mra ƀư ăn lâng, Lĕ ntŭk ntu lŭng mra plơ̆ jêng neh lâng.

⁵ Aƀaơ, nau chrêk rmah Brah Yêhôva mra tâm mpơl, Jêh ri lĕ rngôch bunuyh mra saơ da dê nau nây, Yorlah Brah Yêhôva hŏ ngơi jêh nau nây.”

⁶ Geh bâr lah: “Nter hom!” Jêh ri geh nter plơ̆ lah: “Moh nau gâp mra nter?” “Lĕ rngôch bunuyh jêng tâm ban ma gơ̆, Lĕ rngôch nau ueh păng jêng tâm ban ma kao gơ̆ tâm mir.

⁷ Gơ̆ kro, kao rŭng, Yorlah n'hâm Brah Yêhôva khôm ta klơ păng. Nanê̆, kon bunuyh knŏng jêng gơ̆:

⁸ Gơ̆ kro, kao rŭng, Ƀiălah nau Kôranh Brah he gŭ nâp n'ho ro!”

⁹ Mbu nơm mbơh nau mhe mhan ueh ma ƀon Siôn, Hao hom ta klơ yôk prêh! Mbu nơm mbơh nau mhe mhan ueh ma Yêrusalem Nter troh hom ma nau ktang! Nter troh hom may, lơi klach ôh! Lah hom ma lĕ rngôch ƀon bri Yuđa pô aơ: “Aơ jêng Brah Ndu khân may!”

¹⁰ Aơ, Kôranh Brah Yêhôva mra văch ma nau brah, Păng mra chiă uănh ma ti Păng. Aơ, nau Păng nkhôm gŭ ndrel Păng, Nau Păng plơng gŭ tanăp Păng.

¹¹ Păng mra chiăp biăp Păng tâm ban ma bunuyh rmăk biăp; Rgum phung kon biăp tâm ti Păng Jêh ri chông ut khân păng tâm ntang ntơh; Mbrơi mbrơi njŭn leo phung biăp me dôl ăn pu kon.

Brah Ndu jêng Nơm geh nau brah

¹² Mbu nơm sŏk jêh mpang ti veh dak mƀŭt, Sŏk nđam ti gay veh lĕ ndâr trôk? Mbu nơm hŏ sŏk du ndơ veh gay veh ndruyh neh? Mbu nơm hŏ dŏng njing gay nhueh yôk? Jêh ri dŏng njing mpan gay veh gôl yôk?

¹³ Mbu nơm dơi ntĭm Brah Huêng Ueh Brah Ndu, Jêh ri mbu nơm jêng nơm kơl nchră ma Păng gay nti ma Păng nau aơ nau ri?

¹⁴ Mbu nơm Păng ôp nau mĭn gay geh nau gĭt rbăng? Mbu nti ma Păng trong nau sŏng? Mbu nơm hŏ nti Păng nau blau mĭn Jêh ri ntĭm ma Păng trong gay gĭt vât?

¹⁵ Aơ, lĕ bri dak jêng tâm ban ma du ntruh dak tâm thŭng, Tâm ban ma ndruyh neh ta klơ njing; Aơ, Păng mpư lĕ gôl dak mƀŭt hao tâm ban mpư du ndơ jê̆.

¹⁶ Bri Liban mâu tŏng ôh long sŭnh ŭnh, Lĕ rngôch mpô mpa gŭ ta nây mâu tŏng ƀư ndơ ƀư brah gŭch.

¹⁷ Tanăp măt Păng, lĕ rngôch bri dak jêng tâm ban ma dơm dam, Păng uănh khân păng jêng hŏng dơm jêh ri dơm dam.

¹⁸ Pôri, đah mbu khân may ŭch rđĭl ma Brah Ndu, Mâu lah moh rup khân may tâm rđĭl ma Păng?

¹⁹ Dôl bu tŏ rup brah Nơm chiăr prăk mblum păng ma mah, Jêh ri tŏ lĕ rse rvăk rhên ma prăk ma Păng.

²⁰ Nơm o ach ngăn mâu dơi geh rup tŏ ôh Pôri păng săch tơm si mâu blau ôm, Jêh ri joi du huê bunuyh blau ueh Gay ndâk du rup nâp ktang.

²¹ Khân may mâm mâu gĭt? Khân may mâm mâu mâp tăng? Bu mâu hŏ mâp nti hĕ ma khân may nau nây ntơm bơh saơm? Khân may mâu mâp gĭt rbăng hĕ bơh rnôk rdâk mbon rplay neh?

²² Păng yơh jêng Nơm gŭ ta klơ đôr nkŭm rplay neh, Jêh ri phung gŭ tâm neh ntu jêng tâm ban ma krah ndrach. Păng jêng Nơm pơk lĕ ndâr trôk tâm ban ma du bok nching Jêh ri nthăng khân păng tâm ban ma ngih bok gay gŭ.

²³ Păng yơh ƀư ma phung kôranh chiă uănh toyh tâm ban mrô mô, Jêh ri ƀư ma kôranh phat dôih ta klơ neh ntu mâu jêng dơm dam.

²⁴ Khân păng mhe bu tăm, mhe bu srih, Tơm si mhe chăt reh tâm neh, Brah Yêhôva khôm n'hâm ta khân păng, jêh ri khân păng kro klêu ro; Aơ, trôm sial vănh blông khôm rdu khân păng tâm ban ma rhe.

²⁵ Nơm Kloh Ueh lah: “Mbu đah khân may tâm rđĭl ăn tâm ban ma Gâp? Mbu nơm mra tâm ban đah Gâp?”

²⁶ N'gơr hom măt khân may let klơ gay uănh: Mbu nơm rhăk njêng lĕ ndơ nây? Păng yơh jêng Nơm ƀư lĕ rngôch mănh mbing tâm trôk tĭng nâm rnoh jêh ri tĭng mbŭch, Păng kuăl amoh lĕ rngôch phung nây, Mâu pưt du mănh mbing ôh, Yor nau ktang dŭt toyh Jêh ri nau brah Păng mâu blau lôch.

²⁷ Pôri ơ Yakôb, mâm ƀư khân may lah; Ơ Israel, mâm ƀư khân may lŭng nter “Trong gâp hŏ dơi pôn ndâp jêh đah Brah Yêhôva, Brah Ndu gâp mâu hôm mĭn rvê ôh nau gâp geh”?

²⁸ May mâu gĭt hĕ? May mâu tăng hĕ? Brah Yêhôva jêng Brah Ndu gŭ n'ho ro, Nơm hŏ rhăk njêng jêh lĕ rngôch bri neh, Mâu hŏt rgănh ôh, mâu lĕ rdja; Bu mâu dơi sek uănh ôh lĕ nau Păng gĭt rbăng.

²⁹ Păng ăn nau ktang ma phung huăr rgănh, Ntop nau dăng ktang ma nơm mâu geh nau dăng ktang.

³⁰ Phung druh ndăm ăt huăr rgănh, Phung bu klâu ndăm ăt chêh prah đŏng.

³¹ Ƀiălah mbu nơm kâp gân tâm Brah Yêhôva nanê̆ mra geh nau dăng ktang mhe, Mpăr hao prêh tâm ban ma klang, Nchuăt mâu hŏt rgănh ôh, Hăn mâu huăr rgănh ôh.