Êsai 4 - Nau Brah Ndu Ngơi 2023

¹ Tâm nar nây, pơh nuyh bu ur mra kuăn rdâng du huê bu klâu jêh ri lah: “Hên mra sa ndơ sông sa hên nơm jêh ri soh bok ao hên nơm, Knŏng ăn bu rnha hên ma amoh may; Dăn may sŏk lơi nau bêk hên.”

Nau rêh chrêk rmah tâm nar kăndơ̆ ma phung hôm klen ta ƀon Siôn

² Tâm nar nây, nkeh Brah Yêhôva mra jêng ueh jêh ri chrêk rmah; play do tâm bri neh jêng nau hâk răm jêh ri n'hao nuih ma phung Israel hôm klen.

³ Phung hôm e klen gŭ tâm ƀon Siôn, phung hôm e klen gŭ tâm ƀon Yêrusalem mra dơi rnha jêng phung kloh ueh. Ăp nơm bu nchih prăp jêh tâm ndrom samƀŭt ma phung rêh tâm ƀon Yêrusalem.

⁴ Tơlah Kôranh Brah sŏk nau di jêh ri huêng brah nau su gay rao lơi nau ƀơ̆ ƀơch phung kon bu ur ƀon Siôn, jêh ri ƀư kloh lơi mham tă bơh tâm nklang ƀon Yêrusalem,

⁵ ta klơ lam ntŭk yôk Siôn jêh ri ta klơ phung ƀon tâm rƀŭn, Brah Yêhôva mra rhăk ndâr tŭk dôl nar, nhhŭk ŭnh jêh ri nau ang mpiăt ŭnh tâm dôl măng. Yorlah mra geh ndơ đôr nkŭm ta klơ lĕ rngôch ndơ chrêk rmah;

⁶ ndơ nkŭm nây mra jêng ndưp ƀư gui nkŭm bơh duh nôk nar, king duh nôk nar, jêh ri jêng ntŭk du krap gay der sial phŭt jêh ri mih.