Êsai 39 - Nau Brah Ndu Ngơi 2023

Y-Hêsêkia ăn phung mbơh Babilôn uănh lĕ jay ndơ khlay

¹ Tâm rnôk nây, hađăch Babilôn jêng Y-Mêrôdak Baladan, kon bu klâu hađăch Baladan, prơh bunuyh hăn njŭn samƀŭt jêh ri ndơ nhhơr ăn ma hađăch Hêsêkia, yorlah tăng lư păng ji jêh ri bah jêh.

² Y-Hêsêkia rom rhơn ma phung mbơh jêh ri ntĭm ma khân păng uănh jay prăp drăp ndơ khlay hađăch tâm ban ma prăk, mah, dak si ƀâu kah, dak ngi khlay, lĕ rngôch jay prăp ndơ tâm lơh jêh ri lĕ rngôch ndơ tâm lĕ jay prăp drăp ndơ khlay. Mâu hôm geh du ntil ndơ ôh tâm ngih hađăch jêh ri tâm lĕ ƀon bri dĭng Y-Hêsêkia mâu ăn khân păng uănh.

³ Nơm mbơh lor Y-Êsai hăn mâp ma hađăch Hêsêkia jêh ri ôp: “Moh nau phung nây lah ma may, jêh ri mbah tă khân păng văch tât?” Y-Hêsêkia plơ̆ lah: “Khân păng văch tât tă bơh n'gor Babilôn bri ngai hăn chop khâl gâp.”

⁴ Y-Êsai ôp tay: “Moh ndơ khân păng saơ jêh tâm ngih hađăch may?” Y-Hêsêkia plơ̆ lah: “Khân păng lĕ saơ jêh lĕ rngôch ndơ tâm ngih hađăch gâp. Mâu geh du ntil ndơ tâm lĕ jay prăp drăp ndơ khlay gâp, gâp mâu tâm mpơl ăn ma khân păng ôh.”

⁵ Nôk nây, Y-Êsai lah ma Y-Hêsêkia: “Dăn ma may iăt nau Brah Yêhôva ma phung tahan ngơi:

⁶ ‘Aơ, tâm lĕ nar mra tât, lĕ rngôch ndơ tâm ngih hađăch may, lĕ rngôch ndơ phung chô yau may hŏ prăp jêh tâm lĕ jay prăp drăp ndơ khlay kŏ tât ta nar aơ, bu mra djôt leo ta Babilôn; mâu hôm geh du ntil ndơ ôh!’ Brah Yêhôva lah kơt nây.

⁷ ‘Tâm phung kon may, phung bu deh jêh ăn ma may, ƀaƀă bu mra nhŭp djôt leo khân păng mra jêng phung kôranh bu char tâm ngih hađăch Babilôn.’”

⁸ Y-Hêsêkia plơ̆ lah ma Y-Êsai: “Nau Brah Yêhôva may mhe ngơi jêng ueh!” Yor păng mĭn êng: “Tâm nau rêh gâp mra geh nau đăp mpăn jêh ri nau rnơm.”