Êsai 38 - Nau Brah Ndu Ngơi 2023

Y-Hêsêkia ji jêh ri dơi bah

¹ Tâm lĕ nar nây, Y-Hêsêkia ji dăch khĭt. Nơm mbơh lor Y-Êsai, kon bu klâu Y-Amôt, hăn tâm mâp păng jêh ri lah: “Brah Yêhôva lah kơt aơ: ‘Dăp nkra hom kan tâm ngih may yorlah may mra khĭt, mâu hôm dơi rêh ôh.’ ”

² Y-Hêsêkia rle măt păng mpeh ta mpir jêh ri mbơh sơm ma Brah Yêhôva:

³ “Ơ Brah Yêhôva, dăn kah gĭt hom pô aơ gâp hôm chuat hăn răp jăp tanăp măt May ma nau răp jăp lĕ nuih n'hâm, jêh ri ƀư jêh nau ueh tanăp măt May.” Jêh nây Y-Hêsêkia nhĭm rngot ngăn.

⁴ Nôk nây, geh nau Brah Yêhôva ngơi đah Y-Êsai:

⁵ “Plơ̆ tay hom lah ma Y-Hêsêkia, pô aơ Yêhôva Brah Ndu Y-Đavit, chô yau may, lah kơt aơ: ‘Gâp tăng jêh nau may mbơh sơm jêh ri saơ dak măt may. Aơ, Gâp mra ntop jât ma prăm năm ma may gŭ rêh.

⁶ Gâp mra tâm rklaih may jêh ri ƀon aơ tă bơh ti hađăch Asiri, jêh ri Gâp mra king n'gang ƀon aơ.’

⁷ Aơ jêng nau mbên bơh Brah Yêhôva ăn ma may gay mpơl nau Brah Yêhôva mra ăn tât nau Păng ton nây:

⁸ ‘Aơ, Gâp mra ƀư ma gui n'hâm nar hŏ nchrat tŭp lĕ nhuat mông nar Y-Ahas rŭch plơ̆ tay tâm jât nhuat.’” Pôri, ta klơ mông nar, gui n'hâm nar rŭch plơ̆ pakơi jât nhuat bơh ntŭk păng hŏ hăn rgăn jêh.

Nau Y-Hêsêkia mprơ tâm rnê Brah Ndu

⁹ Nôk geh nau ji jêh ri dơi bah, Y-Hêsêkia hađăch bri Yuđa hŏ nchih lĕ nau nây:

¹⁰ Gâp hŏ lah jêh: “Ta nklang rnôk gâp gŭ rêh, Ăn gâp hăn du; Lĕ năm hôm e ma nau rêh gâp, Gâp roh ta mpông ƀon phung khĭt!”

¹¹ Gâp hŏ geh lah: “Gâp mâu hôm saơ Brah Yêhôva ôh, Jêng Brah Yêhôva gŭ ta neh phung rêh. Gâp mâu hôm saơ kon bunuyh ôh, Jêng phung bunuyh gŭ rêh ta neh ntu.

¹² Bu rôk lơi ntŭk ngih gâp gŭ, jêh ri trơn păng ngai tă bơh gâp Tâm ban ma ngih bok phung rmăk biăp. Gâp klôn lơi nau rêh gâp tâm ban ma nơm tanh klôn bok; Kôranh Brah koh lơi gâp tă bơh ndơ dŏng tanh; Ơm ôi hôm tât măng roh, Kôranh Brah nglĕ dŭt nau rêh gâp!

¹³ Gâp gŭ klăk klêm kŏ tât ôi, Ƀiălah Păng hŏ nkhêk lơi lĕ nting gâp tâm ban ma yau mŭr. Ơm ôi hôm tât măng roh, Kôranh Brah nglĕ dŭt nau rêh gâp!

¹⁴ Gâp nter tâm ban ma sĭm njơch dak, sĭm rlêng; Gâp nđêng tâm ban ma sĭm plŭk; Măt gâp rgănh huơi jêh n'gơr uănh klơ prêh.” “Ơ Kôranh Brah, gâp dôl gŭ tâm nau rŭng răng, Dăn May kơl gâp!

¹⁵ Moh gâp dơi lah? Yorlah May hŏ ngơi jêh đah gâp May nơm yơh ƀư jêng nau aơ. Du bông nau rêh, gâp mra chuat tâm nau dêh rhêt Yor nau rngot bêng tâm huêng gâp.

¹⁶ Ơ Kôranh Brah, bu gŭ rêh jêng yor lĕ nau nây; Huêng gâp gŭ rêh yor nau aơ lĕ! Dăn Kôranh Brah ƀư bah hom gâp Jêh ri mât gâp gŭ rêh.”

¹⁷ Aơ, nau rngot gâp Plăch jêng nau đăp mpăn! Kôranh Brah hŏ rŏng ma huêng gâp, Djôt ngai bơh ntu kuyh ƀư rai, Yorlah Kôranh Brah klŭp jêh lĕ rngôch nau tih gâp Luh pakơi May.

¹⁸ Yorlah ƀon phung khĭt mâu dơi tâm rnê lah ueh ma May ôh, Nau khĭt mâu dơi mprơ rnê ma May ôh; Phung trŭnh hăn jêh ta ntu môch Mâu hôm dơi kâp gân ôh ma nau răp jăp May đŏng.

¹⁹ Nơm rêh, knŏng nơm gŭ rêh yơh, mra tâm rnê lah ueh ma May, Tâm ban ma gâp ƀư nar aơ. Phung ƀư mbơ̆ ntĭm hom kon khân păng Gĭt năl nau răp jăp May.

²⁰ Brah Yêhôva jêng Nơm tâm rklaih gâp! Du bông nau rêh hên mra goh gong rêng jêh ri mprơ, Tâm ngih Brah Yêhôva!

²¹ Y-Êsai lah ma phung oh mon hađăch: “Sŏk hom du glo ƀănh play rvi jêh ri dơm ta ntŭk ji eh gay ma hađăch mra dơi rêh.”

²² Y-Hêsêkia ôp: “Geh nau tâm mbên gay ăn ma gâp gĭt lĕ, gâp hôm dơi hao ta ngih Brah Yêhôva?”