Êsai 37 - Nau Brah Ndu Ngơi 2023

Nau mbơh lor ma nau tâm rklaih ƀon Yêrusalem

¹ Tơlah hađăch Hêsêkia tăng nau nây, păng nkhêk bok ao păng ro, nsoh ao ƀau jêh ri lăp tâm ngih Brah Yêhôva.

² Păng đă Y-Êliakim jêng kôranh mât uănh ngih hađăch, Y-Sêpna jêng kôranh nchih samƀŭt jêh ri phung kôranh ƀư brah ranh rlau lơn nsoh ao ƀau hăn mâp ma nơm mbơh lor Y-Êsai, kon bu klâu Y-Amôt.

³ Khân păng lah ma Y-Êsai: “Y-Hêsêkia lah kơt aơ: ‘Nar aơ jêng nar rŭng răng, nau nduyh jêh ri nau bêk prêng; tâm ban bu ur lĕ tât nôk deh kon jêh ƀiălah mâu tŏng suan gay deh kon ôh.

⁴ N'hêl nanê̆ Yêhôva Brah Ndu may hŏ tăng jêh nau Y-Rabshakeh ngơi, kôranh păng jêng hađăch Asiri hŏ prơh păng hăn tât gay mưch rmot Brah Ndu gŭ rêh mro mrăng; jêh ri Yêhôva Brah Ndu may mra rmal ma khân păng tĭng nâm nau Păng tăng jêh. Yor nây, ăn may mbơh sơm hom ma phung hôm klen ta aơ!’”

⁵ Tơlah phung oh mon hađăch Hêsêkia hăn mâp ma Y-Êsai,

⁶ Y-Êsai lah ma khân păng: “Khân may plơ̆ sĭt mbơh hom ma kôranh khân may pô aơ Brah Yêhôva lah kơt aơ: ‘Lơi klach ôh yor nau ngơi khân may hŏ tăng jêh, jêng lĕ nau phung oh mon hađăch bri Asiri ngơi djơh tât Gâp.

⁷ Aơ, Gâp mra dơm du huêng tâm păng, ƀư ăn păng tăng nau bu nkoch bri jêh ri rŭch tahan plơ̆ sĭt ta bri păng nơm. Gâp mra ăn păng cha lôt khĭt tâm dâng mpiăt đao tâm bri păng nơm.’ ”

⁸ Tơlah Y-Rabshakeh plơ̆ sĭt tâm mâp hađăch bri Asiri dôl tâm lơh đah ƀon Lipna, yorlah păng tăng lư hađăch hŏ du jêh bơh Lakis.

⁹ Aƀaơ, hađăch Asiri tăng nau bu mbơh ma Y-Tirhaka, hađăch Kus, pô aơ: “Hađăch nĕ leo phung tahan văch ŭch tâm lơh đah hađăch.” Tăng nau nây, hađăch Asiri prơh đŏng phung mbơh hăn tâm mâp ma Y-Hêsêkia, jêh ri ntĭnh pô aơ:

¹⁰ “Khân may mra ngơi ma Y-Hêsêkia, hađăch Yuđa, pô aơ: ‘Lơi ăn Brah Ndu, jêng Nơm may rnơm nsing, ndơm mƀruh may pô aơ Yêrusalem mâu mra tŭp tâm ti hađăch Asiri ôh.

¹¹ Aơ, gĭt lah may hŏ tăng jêh moh nau phung hađăch Asiri ƀư jêh ma lĕ rngôch bri dak, bu ƀư rai jêh lĕ khân păng. Bi may, may mra dơi klaih lĕ?

¹² Phung brah tâm lĕ bri dak jêng phung mbơ̆ chô gâp hŏ ƀư rai jêh, jêng phung brah n'gor Gôsan, Charan, Rêsep, jêh ri phung Êđen gŭ ta ƀon Têlasar, mâp dơi tâm rklaih khân păng lĕ?

¹³ Hađăch ƀon Hamat, hađăch ƀon Arpat, hađăch ƀon Sêpharvaim, hađăch ƀon Hêna, jêh ri hađăch ƀon Iva ta ntŭk?’”

Nau Y-Hêsêkia mbơh sơm

¹⁴ Y-Hêsêkia sŏk dơn samƀŭt bơh phung mbơh jao tâm ti păng. Răk lôch jêh, hađăch hăn hao ro ma ngih Brah Yêhôva jêh ri ling samƀŭt tanăp Brah Yêhôva.

¹⁵ Y-Hêsêkia mbơh sơm ma Brah Yêhôva:

¹⁶ “Ơ Brah Yêhôva ma phung tahan, Brah Ndu Israel, jêng Nơm gŭ ta klơ phung chêrubim, knŏng êng du huê May yơh jêng Brah Ndu ma lĕ rngôch ƀon bri hađăch ta neh ntu; May yơh hŏ rhăk njêng jêh trôk jêh ri neh ntu.

¹⁷ Ơ Brah Yêhôva, rkêng hom tôr jêh ri iăt! Ơ Brah Yêhôva, lin hom măt jêh ri uănh treng! Iăt hom lĕ rngôch nau ngơi Y-Sênakêrip njuăl tât gay mưch rmot ma Brah Ndu gŭ rêh mro mrăng.

¹⁸ Ơ Brah Yêhôva, n'hêl nanê̆ phung hađăch Asiri hŏ ƀư rai jêh lĕ bri dak jêh ri n'gor neh khân păng,

¹⁹ mƀăr lơi phung brah khân păng tâm ŭnh, yorlah khân păng mâu jêng brah ôh, knŏng jêng ndơ bơh ti kon bunuyh ƀư ma si jêh ri ma lŭ, pôri bu ƀư rai lơi khân păng.

²⁰ Pôri aƀaơ, ơ Yêhôva Brah Ndu hên, tâm rklaih hom hên bơh ti Y-Sênakêrip, gay ma lĕ rngôch ƀon bri hađăch ta neh ntu dơi gĭt knŏng êng May yơh jêng Brah Yêhôva!”

Nau Y-Êsai mbơh lor

²¹ Y-Êsai, kon bu klâu Y-Amôt, njuăl bunuyh hăn tât ngơi ma hađăch Hêsêkia pô aơ: “Yêhôva Brah Ndu Israel lah: Yorlah may hŏ mbơh sơm jêh ma Gâp yor Y-Sênakêrip hađăch Asiri,

²² aơ, jêng nau Brah Yêhôva hŏ lah ma păng: ‘Bu ur druh ƀon Siôn Tâm rmot ma may, gơm mưch ma may; Kon bu ur ƀon Yêrusalem Rteh bôk pakơi may!

²³ Ma mbu nơm may mưch rmot jêh ri ngơi djơh tât? Ma mbu nơm may tâm rdâng ma bâr nter Jêh ri n'gơr măt ma nau sưr? May janh tâm rdâng đah Nơm Kloh Ueh phung Israel hĕ!

²⁴ May prơh jêh phung oh mon may mưch rmot ma Kôranh Brah, May lah: “Ma ndeh seh gâp âk ir, Gâp hao lĕ ta klơ n'gơn yôk prêh, Tât n'gơn yôk prêh lơn tâm bri Liban. Gâp mra kăl lĕ tơm si sêdar prêh lơn, Jêh ri lĕ tơm si chiprơ dŭt ueh lơn. Gâp mra tât ta ntŭk ngai Tâm bri krŏng tơm si dŭt pŭm.

²⁵ Gâp kuyh jêh ntu dak Jêh ri nhêt jêh dak; Gâp ƀư suăt jêh lĕ rngôch dak krong n'gor Êjipt. Ma bar mpang jâng gâp.”

²⁶ Di lĕ may mâu mâp tăng pô aơ Gâp hŏ nal jêh nau aơ bơh jŏ jêh? Lĕ nau Gâp hŏ ndrăp ơm bơh kăl e, Aơ ri Gâp ƀư ăn tât nau nây; Gay ma may ƀư lĕ ƀon nâp, Jêng lĕ mbŭch rlâm rai nchah rngot njăp jêh.

²⁷ Phung ƀon lan gŭ tâm lĕ ƀon nây mâu hôm geh nau ktang ôh, Klach krit jêh ri bêk prêng; Khân păng jêng nâm bu tơm si gơ̆ rêp tâm mir, Nâm bu gơ̆ ndrêh, Nâm bu gơ̆ nse hon ta klơ chor ngih, Nâm bu lôk mir êlor ma ba ƀlê hon.

²⁸ Ƀiălah Gâp gĭt dôl may gŭ, dôl may gŭ nsrâng; Dôl may hăn luh, tơlah may hăn lăp, Jêh ri nđâp lah may ji nuih tâm rdâng đah Gâp.

²⁹ Yorlah may ji nuih jêh tâm rdâng đah Gâp, Jêh ri nau ngơi ƀlăch ƀlêr may hŏ hao tât ta tôr Gâp Pôri Gâp nklĕ ndar ta trôm muh may, Dơm kang thao tâm trôm mbung may, Gâp mra ƀư ăn ma may plơ̆ sĭt Tĭng trong may hŏ văch jêh.’

³⁰ Hơi Y-Hêsêkia, aơ mra jêng nau mbên ma may: Năm aơ may mra sa play kao hon êng, năm rơh bar sa play kao chăt hon bơh găr ntil êng tŭp; ƀiălah tât năm rơh pe, srih hom jêh ri rek hom, tăm tơm krăk ƀâu jêh ri sa play păng.

³¹ Phung klaih hôm rêh bơh ngih Yuđa mra thoi đŏng hon reh tâm dâng jêh ri geh play ta klơ.

³² Yorlah mra geh phung hôm klen hăn luh bơh Yêrusalem, jêh ri du phung klaih jêh mra luh bơh yôk Siôn. Nau duh nđơr Brah Yêhôva ma phung tahan mra ƀư nau aơ.

³³ Yor nây, Brah Yêhôva lah ma hađăch Asiri kơt aơ: ‘Păng mâu mra lăp ƀon aơ ôh, mâu mra pănh tong hăr ta nây, mâu đŏng sŏk khêl mâu lah bât pôih gay rduh lơh ƀon.

³⁴ Păng mra plơ̆ sĭt ta trong păng văch tât, mâu dơi lăp tâm ƀon aơ ôh.’ Brah Yêhôva lah pônây.

³⁵ Yor Gâp jêh ri yor Y-Đavit, oh mon Gâp, Gâp nơm yơh mra king n'gang jêh ri tâm rklaih ƀon aơ.”

Nau khĭt Sênakêrip

³⁶ Aƀaơ, du huê tông mpăr Brah Yêhôva hăn lăp tâm pôih tahan phung Asiri, jêh ri nkhĭt du rsen pham rmưn prăm rbăn bunuyh. Ang ôi taơ, bu kah rngăl ơm ôi jêh ri saơ lĕ phung nây jêng săk jăn khĭt jêh!

³⁷ Y-Sênakêrip, hađăch Asiri, rŭch tahan hăn sĭt, jêh ri gŭ ta Ninive.

³⁸ Du nar, nôk hađăch Sênakêrip dôl chon mon mbah brah păng nơm tâm ngih brah Nirok, phung kon bu klâu hađăch jêng Y-Adramêlek jêh ri Y-Sarêser sŏk đao nkhĭt hađăch, jêh nây hăn du rlet n'gor Ararat. Kon hađăch jêng Y-Êsarhadôn chiă uănh thoi ntrok păng.