Êsai 36 - Nau Brah Ndu Ngơi 2023

Gưl ntop tay ma nau rêh jêng. – Y-Hêsêkia jêh ri Sênakêrip. – Nơm mbơh ma Mêrôdak Baladan ( 36:1 – 39:8 ) Y-Sênakêrip pit in bri Yuđa. – Nau Y-Rabshakeh nkrit nhhu

¹ Tâm năm jât ma puăn ngih hađăch Hêsêkia chiă uănh, geh Y-Sênakêrip, hađăch Asiri, hao văch tâm lơh jêh ri pit sŏk ma lĕ rngôch ƀon nâp geh pôih tâm n'gor Yuđa.

² Hađăch bri Asiri njuăl Rabshakeh bơh Lakis tât ta Yêrusalem đah du phung tahan âk gay nkrit nhhu hađăch Hêsêkia. Rabshakeh gŭ nsrâng ta rmlông dak nglao pa lơ, ta trong toyh tât ta mir phung ƀư kloh bok.

³ Nôk nây Y-Êliakim, kon Y-Hilkia, kôranh mât uănh ngih hađăch, hăn tâm mâp đah Rabshakeh, ndrel ma Y-Sêpna, kôranh nchih samƀŭt jêh ri Y-Jôa, nơm kâp nchih nau tât, jêng kon Y-Asap.

⁴ Rabshakeh lah ma khân păng: “Lah hom ma hađăch Hêsêkia pô aơ hađăch toyh jêng hađăch bri Asiri lah: ‘Nau may rnơm nsing ta mbah ntŭk?

⁵ Gâp ôp may pô aơ may mĭn knŏng ma rplay ngơi dơm dam dơi rgâl nau blau nchră jêh ri nau dăng ktang gay tâm lơh hĕ? Aƀaơ ma mbu may rnơm nsing kŏ tât may janh tâm rdâng đah gâp?

⁶ Aơ, may rnơm nsing ma n'gor Êjipt, jêng mâng ma tơm rpho lĕ deh jêh, ma mbu nơm rnơm nsing ma păng, păng mra ntâp bluh lăp tâm ti nơm nây. Pharaôn, hađăch Êjipt, ƀư jêng tâm ban pônây đah lĕ rngôch phung rnơm nsing ma păng.

⁷ Klăp lah may lah ma gâp pô aơ: “Hên rnơm nsing ma Yêhôva Brah Ndu hên.” Ƀiălah mâu di hĕ păng yơh jêng Nơm Y-Hêsêkia hŏ sŏk mƀăr lơi jêh ta lĕ ntŭk prêh jêh ri nơng ƀư brah ma Păng, dôl lah ma phung Yuđa jêh ri ma ƀon Yêrusalem pô aơ: “Khân may yơk mbah hom tanăp nơng ƀư brah aơ,” mâu di?

⁸ Pôri aƀaơ aơ, ƀư nau tâm nkol đah kôranh gâp jêng hađăch Asiri. Gâp mra ăn ma may bar rbăn mlâm seh, tơlah may joi tŏng rnoh phung tahan ncho seh gay ncho!

⁹ Nđâp tơlah may rnơm nsing ma n'gor Êjipt gay geh ndeh seh jêh ri phung tahan ncho seh, mâm may dơi mprơh du huê kôranh tahan jê̆ lơn tâm phung oh mon kôranh gâp?

¹⁰ Rlau lơn ma nĕ, mâu di hĕ tĭng nau Brah Yêhôva lah ma gâp hao lơh bri aơ gay ƀư rai lơi păng? Brah Yêhôva hŏ lah jêh ma gâp pô aơ: Hăn hao hom ma bri aơ jêh ri ƀư rai lơi păng!’ ”

¹¹ Y-Êliakim ndrel ma Y-Sêpna jêh ri Y-Jôa lah ma Y-Rabshakeh: “Dăn lah đah phung oh mon may tâm nau ngơi Aram, yorlah hên gĭt rbăng nau nây. Dăn lơi ngơi ôh ma hên nau ngơi phung Yuđa klach lah phung ƀon lan gŭ ta klơ mpêr ƀon dơi tăng.”

¹² Ƀiălah Y-Rabshakeh plơ̆ lah: “Di lĕ kôranh gâp prơh gâp ntăm lah lĕ nau aơ ma kôranh khân may jêh ri ma khân may dơm? Mâu di hĕ tâm ban đŏng ntăm ma phung bunuyh gŭ klơ mpêr ƀon ri, jêng phung mra sa ek, nhêt dak chrach khân păng nơm ndrel ma khân may?”

¹³ Jêh ri Y-Rabshakeh dâk, ngơi nter huy ma nau ngơi phung Yuđa: “Gŭ iăt hom nau hađăch toyh jêng hađăch bri Asiri!

¹⁴ Hađăch lah tâm ban pônây: ‘Lơi ăn hađăch Hêsêkia ndơm ôh khân may, yorlah păng mâu dơi tâm rklaih khân may ôh!

¹⁵ Lơi ăn ôh hađăch Hêsêkia ndơm khân may rnơm nsing ma Brah Yêhôva dôl lah: “Brah Yêhôva mra tâm rklaih he n'hêl nanê̆ ndrel ma ƀon aơ, jêh ri bu mâu mra jao ƀon aơ tâm ti hađăch bri Asiri ôh!”

¹⁶ Lơi ta iăt Y-Hêsêkia ôh, yorlah hađăch Asiri lah pô aơ: Ƀư hom nau đăp mpăn đah gâp jêh ri ăn may văch ta gâp, pôri ăp nơm tâm khân may ăt mra dơi sa play krăk ƀâu, play rvi, jêh ri nhêt dak bơh nglao prăp păng nơm,

¹⁷ kŏ tât gâp văch jêh ri njŭn leo khân may lăp tâm du n'gor nâm bu n'gor khân may nơm, jêng n'gor geh prăp ba jêh ri ndrănh mhe, du bri geh piăng let jêh ri đang krăk ƀâu.

¹⁸ Njrăng hom, klach lah Y-Hêsêkia ndơm khân may jêh ri lah: “Brah Yêhôva mra tâm rklaih he!” Pôri, geh lĕ du huê brah tâm lĕ bri dak mâp dơi tâm rklaih bri khân păng bơh ti hađăch Asiri mâm dơi lĕ?

¹⁹ Ta ntŭk phung brah ƀon Hamat jêh ri ƀon Arpat? Ta ntŭk phung brah ƀon Sêpharvaim? Khân păng hŏ mâp tâm rklaih jêh lĕ n'gor Samari bơh ti gâp mâm dơi lĕ?

²⁰ Tâm lĕ brah bri aơ, geh brah moh hŏ rklaih n'gor khân păng tă bơh ti gâp lĕ? Pôri mâm Brah Yêhôva dơi rklaih Yêrusalem bơh ti gâp!’ ”

²¹ Khân păng gŭ rklăk, mâu plơ̆ sĭt lah du play ngơi ôh, yorlah hađăch ntăm jêh: “Khân may lơi plơ̆ lah ma păng ôh.”

²² Y-Êliakim, kon bu klâu Y-Hilkia, kôranh mât uănh ngih hađăch, ndrel ma Y-Sêpna jêng kôranh nchih samƀŭt, jêh ri Y-Jôa jêng kôranh kâp nchih nau tât, kon bu klâu Y-Asap, nkhêk bok ao khân păng, plơ̆ sĭt tâm mâp đah hađăch Hêsêkia jêh ri nkoch tay ma păng lĕ nau Y-Rabshakeh ngơi.