Êsai 34 - Nau Brah Ndu Ngơi 2023

Nau mbơh lor ma nau phat dôih Êđôm

¹ Hơi lĕ bri dak văch dăch hom, gay tăng, Ơ phung ƀon lan, rkêng tôr iăt hom! Rplay neh jêh ri lĕ rngôch ndơ tâm păng, Neh ntu jêh ri lĕ mpa luh bơh păng, Rkêng tôr hom!

² Yorlah Brah Yêhôva ji nuih tâm rdâng đah lĕ bri dak, Păng nkhŭt nau ji nuih ma lĕ rngôch phung tahan khân păng; Păng ƀư rai khân păng, Jao khân păng ăn bu nkhĭt.

³ Đơ bunuyh khân păng khĭt bu mra mƀăr padih, Săk jăn khĭt n'hôl ƀâu ôm; Mham khân păng hoch bêng klơ yôk.

⁴ Lĕ rngôch phung mănh mbing tâm trôk mra rai lơi, Lĕ ndâr trôk mra klôn tay tâm ban ma klôt ndrom samƀŭt; Lĕ rngôch phung mănh mbing mra rai lĕ Tâm ban ma n'ha krăk ƀâu kro tŭp rŭng, Tâm ban ma n'ha rvi kro tŭp rŭng bơh tơm rvi.

⁵ Yorlah đao Gâp gŭ tâm trôk hŏ nhêt mpay jêh; Aơ, păng mra jŭr ŭch phat dôih bri Êđôm, Ma phung ƀon lan Gâp hŏ jao ma nau rai lôch gay phat dôih.

⁶ Đao Brah Yêhôva krêp bêng ma mham, jêh ri ngi, Jêng mham kon biăp jêh ri be nkuăng, Ngi mlâm leh biăp nkuăng. Yorlah geh nau nhhơr mpa ƀư brah ma Brah Yêhôva ta ƀon Bôsra, Nau tâm nkhĭt toyh tâm bri Êđôm

⁷ Ndrôk bri, kon ndrôk jêh ri ndrôk nkuăng Cha lôt ndrel ma khân păng da dê; Bri khân păng mra nhŭl yor mham, Neh muy khân păng krêp bêng ngi lay.

⁸ Yorlah Brah Yêhôva prăp jêh nar ma nau plơng bôk, Geh năm mplơ̆ sĭt nau nkhôm yor ma Siôn.

⁹ Lĕ n'hor dak tâm bri Êđôm mra rgâl jêng dak ƀlĭt n'ho, Ndruyh neh khân păng mra jêng mô ŭnh, Neh khân păng mra jêng dak ƀlĭt n'ho dôl ŭnh hit.

¹⁰ Măng nâm nar păng mâu mra nhhât ôh, Nhhŭk ŭnh n'ho ro. Neh khân păng mra jêng rngot njăp bơh rnôk aơ tât rnôk ri; N'ho ro mâu geh bunuyh rgăn ta nây ôh.

¹¹ Ƀiălah klang grât jêh ri blŏ mra sŏk ntŭk nây, Klang kô jêh ri nđak mra gŭ ta nây. Brah Ndu mra nthăng rse veh ƀư rai bri nây, Jêh ri rse yông ndơ jâk mâu glo ta khân păng.

¹² Phung bu yơk mâu hôm; Ta bri nây bu mâu hôm rnha ƀon bri hađăch ôh, Lĕ rngôch phung kôranh păng jêng dơm dam.

¹³ Tơm lok mra hon tâm ngih hađăch khân păng, Pih pŭm jêh ri gơ̆ chăt hon tâm lĕ pôih khân păng. Păng mra jêng ntŭk prăp ma so bri, Jêh ri ntŭk gŭ sĭm ôtrus.

¹⁴ Mpô mpa bri jêh ri so bri mra tâm mâp ta nây; Ntil be bri tâm kuăl ndrăng băl khân păng; Lĕ ntil sĭm sa măng mra gŭ ta nây, Jêh ri joi saơ du ntŭk rlu ma păng nơm.

¹⁵ Klang kô toyh mra ƀư rsuăn ta nây, deh tăp, dop săk jăn ma deh kon, Jêh ri rgum kon tâm dâng gui năr păng nơm; Ta nây, klang grât mra tâm rgum mpôl, Nkuăng me geh da dê.

¹⁶ Joi hom tâm ndrom samƀŭt Brah Yêhôva jêh ri rŏ: Tâm phung mpô mpa bri nây, mâu mra pưt du ntil, Mâu geh du mlâm pưt nkuăng mâu lah me ôh. Yorlah mbung Brah Yêhôva ntăm jêh nau nây, Jêh ri Brah Păng tâm rƀŭn jêh lĕ khân păng.

¹⁷ Brah Ndu yơh hŏ ƀư nau tâm nchroh ma bu, Ti Păng dŏng rse veh tâm pă kô̆ ma khân păng. Lĕ mpô mpa bri aơ mra pit sŏk neh nây n'ho ro, Jêh ri gŭ ta nây ntơm bơh rnôk aơ tât rnôk ri.