Êsai 33 - Nau Brah Ndu Ngơi 2023

Nau ton tâm rklaih ma phung ƀon lan Kôranh Brah

¹ Rêh ni ngăn ma may jêng nơm ƀư rai Ƀiălah may nơm bu mâu hŏ ƀư rai ôh, Jêng nơm ndơm bu Ƀiălah bu mâu mâp ndơm may ôh! Lah may rlu ƀư rai bu, Bu mra ƀư rai may đŏng; Lah may mâu hôm ƀư nau ndơm Bu mra ndơm may đŏng.

² Ơ Brah Yêhôva, dăn yô̆ nđach an ma hên! Hên kâp gân May. Dăn ăn nau ktang ma hên ăp kêng ôi, Tâm rklaih hên nôk tâm nau rêh ni.

³ Lah tăng nteh drơu drơu, phung ƀon lan nchuăt du; Lah May dâk, lĕ bri dak nchuăt du lă lêng.

⁴ Drăp ndơ khân may bu mra rgum tâm ban ma krah ndrach; Bu rduh lăp ma păng khân may tâm ban ma phung krah nsăt rduh ran tât.

⁵ Brah Yêhôva geh nau yơk yorlah Păng gŭ tâm ntŭk prêh klơ. Păng ƀư ma Siôn bêng ma nau di jêh ri nau sŏng srăng.

⁶ Păng mra jêng nau nâp ma nar jêh ri mông khân may, Jêng nau tâm rklaih rmeh ler, nau blau mĭn, jêh ri nau gĭt rbăng; Nau klach yơk ma Brah Yêhôva jêng jay ndơ khlay Păng ăn.

⁷ Aơ, phung tahan janh ktang khân păng lŭng nter nhĭm padih trong, Phung mbơh ma nau đăp mpăn nhĭm rngot ngăn.

⁸ Trong toyh jêng rngot njăp, Bu mâu hôm hăn ta trong ôh; Bu hŏ ƀư rai nau tâm rnglăp, Mưch rmot ma phung mbơh, Mâu chrê ma bunuyh ôh.

⁹ Bri neh nhĭm jêh ri huănh hươi; Liban bêk jêh ri klêu; Sarôn jêng tâm ban ma ndrêch rdah; Basan jêh ri yôk Karmel nhop kro.

¹⁰ Brah Yêhôva lah: “Aƀaơ, Gâp mra dâk; Aƀaơ, Gâp mra tâm rnê êng Gâp nơm; Aƀaơ, Gâp mra geh nau mât ton!

¹¹ Khân may ntreo ma rhe, mra deh ma njŏk, N'hâm khân may mra jêng ŭnh su khân may nơm.

¹² Phung ƀon lan mra jêng tâm ban ma klo dôl gŭch, Tâm ban ma lok bu kăl jêh ri su jêh tâm ŭnh.

¹³ Ơ phung gŭ ngai, iăt hom nau Gâp ƀư jêh; Ơ phung gŭ êp, ăn khân may gĭt nau ktang Gâp.”

¹⁴ Tâm ƀon Siôn, Phung ƀư tih klach krit, Phung mâu chroh ôh ma Brah Ndu râm sâr; khân păng lah: “Mbu tâm phung he dơi gŭ tâm ŭnh hit? Mbu tâm phung he dơi gŭ tâm mpiăt ŭnh hit n'ho ro?”

¹⁵ Nơm nhuat tĭng nau sŏng srăng jêh ri ngơi nau di, Tâm rmot ma nau sa ndơ mâu tâm di, Mât mray ti mâu sŏk dơn drăp blŏl; Nsêt tôr mâu ŭch iăt ôh nau nkhŭt mham, Nhêp măt mâu ŭch uănh ma nau mhĭk ôh.

¹⁶ Bunuyh kơt nĕ mra dơi gŭ tâm ntŭk prêh, Geh pôih ma mpir lŭ mra jêng ntŭk păng du krap; Bu mra ăn ndơ sông sa ma păng Jêh ri păng mâu rvê pưt dak nhêt ôh.

Bri neh ma Hađăch Geh Nau Rnam

¹⁷ Măt may mra n'gơr uănh Hađăch tâm nau ueh Păng, Jêh ri mra saơ bri neh dĭ ngai.

¹⁸ Nuih n'hâm may mra gŭ mĭn ma nau klach krit ngăn, jêh ri ôp êng: “Mbah ntŭk kôranh chiă uănh? Mbah ntŭk nơm riu pi? Mbah ntŭk nơm kơp lĕ ngih tŭm gak?”

¹⁹ May mâu hôm mra saơ ôh phung ƀon lan ƀai nây, Jêng phung ƀon lan ngơi nau ngơi bu năch mâu dơi tăng rah vah ôh, Ngơi nau ngơi mâu dơi gĭt rbăng.

²⁰ Uănh hom ta Siôn jêng ƀon he kah gĭt prăp lĕ nau rƀŭn toyh! Măt may mra saơ Yêrusalem, Jêng ntŭk gŭ đăp mpăn, jêng ngih bok bu mâu trơn ta ntŭk êng ôh, Lĕ mâng pêr ngih bok bu mâu hôm tŏk ôh, Lĕ rse brăt mâu dơi tăch ôh.

²¹ Yorlah nau rnam Brah Yêhôva mra gŭ ndrel đah he ta nây, Jêng ntŭk geh dak krong jêh ri dak n'hor huy ngăn, Mâu geh rkĭt sĭt hăn ôh, Mâu geh kumpăn toyh hăn rgăn.

²² Nanê̆, Brah Yêhôva jêng Nơm Phat Dôih he, Brah Yêhôva jêng Nơm Ăn Nau Vay ma he, Brah Yêhôva jêng Hađăch he; Păng yơh mra tâm rklaih he.

²³ Lĕ rse may bu hŏ ƀư rdja jêh, Mâu dơi kât nâp n'gâng bok ta klơ kumpăn ôh, Jêh ri mâu lĕ dơi ling bok. Nôk nây, bu mra tâm pă âk ndơ sŏk pit, Nđâp phung rvĕn ăt geh đŏng bu pă.

²⁴ Mâu geh du huê bunuyh ƀon lan mra lah, “Gâp ji.” Phung ƀon lan gŭ ta nây mra dơi yô̆ nau tih.