Êsai 32 - Nau Brah Ndu Ngơi 2023

Nau ton ma ƀon bri hađăch sŏng srăng

¹ Aơ, du huê hađăch mra chiă uănh ma nau sŏng srăng, Phung kôranh mra chiă uănh ma nau di.

² Mra geh du huê tâm ban ma ntŭk krap ma sial, Jêh ri ntŭk nde ma sial phŭt, Tâm ban ma dak n'hor tâm ntŭk sơh, Tâm ban ma gui n'hâm lŭ toyh tâm neh nđang.

³ Rnôk nây, măt phung dơi saơ mâu mra nhêp ôh, Tôr phung dơi gĭt tăng mra rkêng iăt.

⁴ Nuih n'hâm phung ndĭl ndal mra geh nau blau mĭn gay gĭt rbăng; Mpiăt phung rlem mra ngơi ngăch jêh ri rah vah.

⁵ Bu mâu mra rnha bunuyh rluk jêng nơm khư bu yơk ôh, Mâu geh bunuyh yơk ma nơm ƀlăch ƀlêr ôh.

⁶ Yorlah bunuyh rluk mra ngơi lĕ nau rluk, Nuih n'hâm khân păng mĭn ƀư nau mhĭk Gay ŭch ƀư nau ƀơ̆ ƀơch, Ngơi nau mhĭk đah Brah Yêhôva; Ƀư ma bunuyh ji ngot gŭ ndŭl hŏng, Jêh ri nơm ji hir mâu dơi nhêt dak.

⁷ Phung ƀlăch ƀlêr dŏng ndơ tâm lơh mhĭk, Mĭn ma nau ƀư ƀai jêh ri nau ngơi mƀruh, Gay ƀư mhĭk phung dêh rhêt jêh ri phung o ach, Nđâp tơlah nau khân păng dăn jêng di.

⁸ Ƀiălah phung khlay mĭn knŏng joi ma lĕ nau khlay, Jêh ri dâk nâp tâm lĕ nau dŭt khlay.

Nau mbơh lor ma nau mhĭk tât ma phung bu ur mpay êng

⁹ Ơ phung bu ur mpay êng, Dâk iăt hom bâr Gâp! Ơ phung kon bu ur mâu gĭt njrăng, Rkêng hom tôr iăt nau Gâp ngơi!

¹⁰ Tâm du năm jêh ri bar pe nar đŏng, Khân ay jêng phung mâu gĭt njrăng mra râm sâr, Yorlah yan pĕ play krăk ƀâu mra roh, Jêh ri yan kăch roih mâu đŏng geh.

¹¹ Ơ phung bu ur mpay êng, râm sâr hom, Ơ phung bu ur mâu gĭt njrăng, ăn khân ay rŭng răng! Doh lơi hom bok ao khân ay, gŭ rhôk hom, Vân hom bŭt khân ay ma bok ƀau.

¹² Khân păng tŭr ntang ntơh jêh ri nhĭm nter Ma mir ueh Jêh ri đang krăk ƀâu âk play,

¹³ Yor neh phung ƀon lan Gâp, Hon tơm lok jêh ri pih pŭm, Yor lĕ rngôch ngih maak tâm ƀon răm maak. Mâu hôm geh ôh.

¹⁴ Ngăn yơh, bu mra chalơi ngih hađăch, Ƀon toyh mra jêng rngot njăp; Yôk jêh ri ngih tŭm gak mra jêng trôm mpa bri lĕ rngôch rnôk n'ho ro Ntŭk pâl ma seh bri, Jêh ri ƀư ndrêch gơ̆ ma phung mpô mpa sa,

¹⁵ Kŏ tât Brah tă bơh klơ nkhŭt ăn ma he, Bri rdah plăch jêng đang tơm sa play, Bu uănh ta đang tơm sa play tâm ban ma bri krŏng.

Nau đăp mpăn tâm nau Brah Ndu chiă uănh

¹⁶ Rnôk nây, nau di mra gŭ tâm bri rdah, Jêh ri nau sŏng srăng gŭ tâm đang tơm sa play.

¹⁷ Ndô ndơ bơh nau sŏng srăng jêng nau đăp mpăn, Play khlay bơh nau sŏng srăng jêng nau đăp rmên jêh ri nau rnơm ƀaƀơ.

¹⁸ Phung ƀon lan Gâp mra gŭ tâm ntŭk đăp mpăn, Tâm ntŭk gŭ rklăk, tâm ntŭk rlu mpăn ngăn.

¹⁹ Ƀiălah mih pler mra nkhŭt tâm krŏng, Jêh ri ƀon toyh mra rlâm,

²⁰ Ueh maak ngăn ma khân may, Phung srih ntil êp lĕ rngôch n'hor dak, Mƀơk ndrôk jêh ri seh bri rdah ma ŭch sa gơ̆.