Êsai 3 - Nau Brah Ndu Ngơi 2023

Nau phat dôih ƀon Yêrusalem jêh ri Yuđa

¹ Aơ, Kôranh Brah jêng Brah Yêhôva ma phung tahan Mra sŏk rdu lơi bơh Yêrusalem jêh ri bri Yuđa Tu nau kâp kơl jêh ri ntŭk rnơm, Nĕ jêng lĕ tu ăn ma ƀănh jêh ri dak.

² Păng mra sŏk lơi phung janh ktang jêh ri tahan, Kôranh phat dôih jêh ri nơm mbơh lor, Nơm rƀên jêh ri kôranh bu ranh,

³ Kôranh chiă uănh toyh ma prăm jât nuyh tahan Jêh ri phung kôranh toyh, kôranh nchră, Phung blau kan rƀên Jêh ri phung n'hŭm gĭt blau kan.

⁴ Gâp mra ăn phung ndăm ƀĭt gai khân păng, Jêh ri phung kon se mra chiă uănh khân păng.

⁵ Phung ƀon lan mra tâm tŭn jot ndrăng khân păng, Nơm aơ đah nơm ri, Phung chiau meng đah chiau meng. Kon se suai rak đah bu ranh, Bunuyh dơm dam tŭn jot ma nơm bu yơk.

⁶ Dôl bu mra nhŭp oh nâu păng Tâm ngih mbơ̆ păng jêh ri lah: “May hôm geh ao jâr, Ăn may ƀư jêng kôranh chiă uănh hên, Jêh ri mbŭch rlâm nchah aơ Mra gŭ tâm dâng nau dơi may!”

⁷ Tâm nar nây, păng mra plơ̆ lah: “Gâp mâu mra chiă uănh, Tâm ngih gâp mâu geh ƀănh mâu lĕ geh ao jâr; Lơi ăn gâp Jêng kôranh ma phung ƀon lan ôh.”

⁸ Yorlah ƀon Yêrusalem nkêng cha lôt Jêh ri bri Yuđa mra rlâm rai, Yorlah nau ngơi jêh ri kan pah khân păng tâm rdâng đah Brah Yêhôva da dê, Tâm rdâng panăp nau mpơl muh măt chrêk rmah Păng.

⁹ Muh măt khân păng tâm mpơl an nau tâm rdâng đah khân păng nơm; Khân păng nkoch rah vah nau tih khân păng nâm bu ƀon Sôdôm, Mâu mo ôh. Rêh ni ngăn ma huêng khân păng, Yorlah khân păng hŏ ƀư nau mhĭk ma khân păng nơm!

¹⁰ Lah hom ma phung sŏng srăng, ueh maak yơh ma khân păng, Yorlah khân păng mra sa play bơh kan khân păng ƀư.

¹¹ Rêh ni ngăn ma nơm ƀai! Păng mra tuy nau mhĭk, Yorlah păng mra dơn play mhĭk bơh ti păng ƀư jêh.

¹² Phung kon se mra tŭn jot phung ƀon lan gâp, Jêh ri phung bu ur chiă uănh khân păng. Ơ phung ƀon lan gâp! Phung njŭn trong khân may ƀư ma khân may nhhơt trong, Khân păng ƀư nau rŭng răng trong may.

¹³ Brah Yêhôva dâk gay tâm rlăch nchră, Păng gŭ râng gay phat dôih phung ƀon lan.

¹⁴ Brah Yêhôva mra phat dôih Phung kôranh bu ranh phung ƀon lan Păng jêh ri phung kôranh chiă uănh khân păng: “Khân may nơm jêng phung sa rvăn đang krăk ƀâu, Drăp ndơ ntŭng bơh phung o ach dôl gŭ tâm ngih khân may!

¹⁵ Mâm dĭng khân may janh jot plên phung ƀon lan Gâp, Jot rchal lơi muh măt phung o ach?” Kôranh Brah jêng Brah Yêhôva ma phung tahan lah.

¹⁶ Brah Yêhôva lah: “Yorlah phung kon bu ur ƀon Siôn jêng sưr, Ƀă hăn ƀă n'gơr trô ko klơ, Măt uănh ma nau kơnh, Ƀă hăn ƀư ê he, Ƀă ăn nteh kông jâng khân păng,

¹⁷ Yor nây Kôranh Brah mra ƀư hil ntâu bôk phung bu ur ƀon Siôn Jêh ri Brah Yêhôva mra ăn poih plưn ta bôk khân păng.”

¹⁸ Tâm nar nây Kôranh Brah mra sŏk lơi ndơ nkrơ̆ tâm ban ma kông jâng khân păng, sŏk tanh srang nkŭm bôk jêh ri sŏk net kĭt sŏk;

¹⁹ thek ta tôr, kông ta ti, jêh ri bok nkŭm măt;

²⁰ đon hađăch jê̆, rse rvăk ta jâng, rse vân bŭt, nông dak si ƀâu kah, jêh ri gŭn rƀên;

²¹ rgên jêh ri kông ta trôm muh;

²² ao ma nau rƀŭn, jêh ri ao jâr, ao mbâl jêh ri dŭng;

²³ nchrâng muh măt, kho ao ƀư ma bok mhay, bok mpân sŏk jêh ri bok nkŭm bôk.

²⁴ Ndơ ƀâu ôm mra ntrok ma ndơ ƀâu kah; Rse brăt ntrok jêng rse bŭt; Bôk hil ntrok ma sŏk krô; Ao bok ƀau ntrok ma ao jong ueh ngăn; Têl loih gŭch krĕt ntrok ma nau ueh.

²⁵ Phung bu klâu may mra cha lôt ma đao, Phung tahan janh ktang may mra khĭt tâm nau tâm lơh.

²⁶ Lĕ mpông pêr Siôn mra nhĭm nhhiăng jêh ri ndrê klâng; Khân păng mra gŭ tâm bri rngol.