Êsai 29 - Nau Brah Ndu Ngơi 2023

Nau mbơh lor ma nau mrô nal Yêrusalem

¹ Rêh ni ngăn ma Ariêl, Ariêl, Jêng ƀon Đavit hŏ ƀư ntŭk păng gŭ! Năm aơ chuat tât ma năm ri, Lĕ rngôch năng rƀŭn tât tĭng năm di.

² Gâp mra nchueng jŭm Ariêl, Păng mra geh nau rngot klâng jêh ri lŭng nter, Ƀiălah păng ăt hôm jêng ƀon Ariêl ma Gâp.

³ Gâp mra ƀư pôih văr jŭm may, Ƀư pôih nchueng jŭm may Rdâk pôih tâm rdâng đah may.

⁴ Bu mra tâp brôi may, jêh ri bơh ntŭk jru tâm dâng neh, may mra kuăl huy, Bơh ndruyh neh, nau may ngơi huơi ngăn. Bâr may nter luh bơh neh tâm ban ma bâr phan, Nau may ngơi huêt bơh ndruyh neh.

⁵ Ƀiălah âk ngăn phung rlăng đah may mra jêng tâm ban ma ndruyh neh muy. Phung ƀai mra jêng tâm ban ma lâk sial khôm. Nau nây mra tât ndal, knŏng tâm ƀât lât.

⁶ Brah Yêhôva ma phung tahan mra phat dôih khân păng, Ma nglaih, nau n'găr neh, nau nteh ktang, Ma vănh blông ktang, sial phŭt, jêh ri ma mpiăt ŭnh hit.

⁷ Phung tahan lĕ bri dak hăn lơh Ariêl, Lĕ rngôch phung hăn lơh, ƀư rai pôih, jêh ri rêt păng Mra roh rai tâm ban ma nau mbơi, tâm ban ma mbơi kêng măng.

⁸ Tâm ban ma bunuyh ji ngot mbơi saơ păng nơm dơi sa, Ƀiălah tơlah păng kah rngăl ndŭl ăt ji ngot; Tâm ban ma bunuyh ji hir mbơi saơ păng nơm dơi nhêt dak, Ƀiălah tơlah păng kah rngăl saơ păng nơm rgănh suan jêh ri ăt ji hir; Phung tahan lĕ bri dak hăn lơh yôk Siôn, Mra tâm ban pônây lĕ.

⁹ Ndrât hom jêh ri hih rhâl! Ƀư hom ma khân may nơm chieh măt jêh ri vĭr măt! Khân păng nhŭl, ƀiălah mâu di yor ndrănh ôh; Khân may ndĭt ndĭu ƀiălah mâu di yor ndrănh ktang ôh.

¹⁰ Yorlah Brah Yêhôva hŏ nkhŭt brah bê̆ch hăk ma khân may; Păng hŏ nsêt jêh măt khân may jêng phung nơm mbơh lor, Păng nkŭm jêh bôk khân may, jêng phung geh nau tâm saơ.

¹¹ Yor ri ma khân may, nau tâm saơ ma lĕ rngôch nau aơ tâm ban ma lĕ nau ngơi nchih tâm ndrom samƀŭt bu hŏ tâp pŏng jêh. Tơlah bu njŭn păng ma du huê bunuyh gĭt rŏ jêh ri lah: “Rŏ hom ndrom samƀŭt aơ,” pôri păng mra plơ̆ lah pô aơ: “Gâp mâu dơi rŏ ôh yorlah bu tâp pŏng ndrom samƀŭt aơ jêh.”

¹² Mâu lah tơlah bu ăn ndrom samƀŭt nây ăn du huê bunuyh mâu gĭt rŏ samƀŭt ôh jêh ri lah: “Rŏ hom rŏ ndrom samƀŭt aơ,” pôri păng mra plơ̆ lah: “Gâp mâu gĭt rŏ samƀŭt ôh.”

¹³ Kôranh Brah lah: “Yorlah phung ƀon lan aơ knŏng sŏk trôm mbung văch êp Gâp, Sŏk mpiăt tâm rnê Gâp, Ƀiălah nuih n'hâm khân păng ngai đah Gâp; Nau khân păng klach yơk ma Gâp knŏng jêng nau vay bunuyh ntăm dơm, Yor bunuyh ntĭm nti.

¹⁴ Yor nây, Gâp mra thoi đŏng ƀư Lĕ nau kan khlay ngăn ngên ta nklang phung ƀon lan aơ, Nau kan êng ngăn kŏ tât nau gĭt mĭn ma phung blau mĭn khân păng mra jêng dơm dam, Nau gĭt rbăng ma phung gĭt rbăng mra nkŭm ndâp.”

¹⁵ Rêh ni ngăn phung pôn nau khân păng tâm nchră tâm ntŭk jru ndâp bơh Brah Yêhôva, Kan tâm nau ngo, Jêh ri khân păng mĭn êng: “Mbu dơi saơ he, mbu dơi gĭt he?”

¹⁶ Tâm rlơ̆ ngăn khân may: Mâm dĭng uănh nơm mon glah tâm ban ma neh uk? Mâm dĭng ndơ bu ƀư, lŏ lah ma nơm ƀư păng pô aơ: “Hŏ geh păng ƀư gâp”? Mâu lah du mlâm yăng lŏ lah ma nơm mon păng pô aơ: “Păng mâu geh nau gĭt rbăng ôh,” mâu geh?

Kâp gân ma tâm nar kăndơ̆

¹⁷ Mâu di hĕ hôm ƀât lât đŏng Bri Liban mra rgâl jêng đang tơm si sa play, Jêh ri đang tơm si sa play mra dơi uănh tâm ban ma bri krŏng lĕ?

¹⁸ Tâm nar nây, phung tê̆k mra tăng Nau ngơi tâm ndrom samƀŭt, Măt phung chieh mra saơ bơh nau ngo klĕng vêt vê Jêh ri dơi saơ.

¹⁹ Phung dêh rhêt mra răm maak ntop âk tâm Brah Yêhôva, Phung o ach mra răm maak yor Nơm Kloh Ueh Israel.

²⁰ Yorlah nơm janh ƀai mâu hôm ôh, Nơm dăng mưch mra roh, Jêh ri lĕ rngôch phung kâp ƀư nau mhĭk bu mra ƀư rai lơi.

²¹ Nây jêng phung dŏng nau ngơi ƀư ma bu geh nau phat dôih, Ƀư dăk sân nơm phat dôih ta mpông ƀon, Phung dŏng nau mbơh mƀruh ƀư nsak ma nơm sŏng srăng chŭn.

²² Yor nây, Brah Yêhôva jêng Nơm tâm chuai jêh Y-Abraham hŏ lah jêh ma ngih Yakôb pô aơ: “Aƀaơ aơ, Yakôb mâu mra hôm bêk ôh, Jêh ri muh măt khân păng mra mâu hôm pal.

²³ Ƀiălah tơlah Yakôb saơ phung kon păng, Jêng kan ti Gâp ƀư ta nklang khân păng, Khân păng mra yơk ma amoh Gâp jêng Kloh Ueh: Khân păng mra yơk ma Nơm Kloh Ueh Y-Yakôb, Jêh ri klach yơk ma Brah Ndu Israel

²⁴ Phung geh nau mĭn vĭ nhhơt mra geh nau gĭt rbăng, Jêh ri phung vay ngơi ƀrôk mra dơn nau ntĭm nti.”