Êsai 28 - Nau Brah Ndu Ngơi 2023

Nau mbơh lor tâm rdâng đah phung Israel, Asiri, jêh ri Êjipt ( 28:1 – 35:10 ) Nau mbơh lor ma ƀon bri hađăch mpeh pa lơ

¹ Rêh ni ngăn ma đon hađăch sưr phung mơng nhêt ndrănh ta bri Êphraim, Rêh ni ngăn ma rvang kao gơnh nhop, jêng ndơ nkrơ̆ khlay prăk Ma ƀon toyh ta klơ kô yôk rlŭng jêng ngăn, ma phung vay nhŭl ndrănh!

² Aơ, bơh ntŭk Kôranh Brah geh du huê nơm ktang jêh ri geh nau dơi, Nâm bu mih tŭp pler, phŭt chuănh ƀư rai, Tâm ban ma dak toyh pling ntôr, dak lip lam ntŭk; Păng mra dong ti klŭp păng ta neh.

³ Đon hađăch sưr phung vay nhŭl ndrănh ta bri Êphraim. Mra jot rchiăt tâm jâng

⁴ Rvang kao gơnh nhop jêng ndơ nkrơ̆ khlay prăk Gŭ ta klơ yôk rlŭng jêng ngăn, Mra jêng tâm ban ma play rvi dŭm lor ta yan vai; Lah bu saơ play nây, pĕ jêh ri sa ro.

⁵ Tâm nar nây, Brah Yêhôva ma phung tahan mra jêng đon hađăch nau chrêk rmah Jêh ri đon hađăch chrêk lơp ăn ma phung ƀon lan Păng hôm klen.

⁶ Păng mra jêng Brah Nau Di prăp ma kôranh gŭ phat dôih, Jêh ri jêng nau ktang ăn ma phung mprơh phung rlăng tâm lơh rŭch bơh mpông ƀon.

⁷ Rlau ma nĕ phung aơ vĕt ta vĕng đŏng yor ndrănh, Jêh ri hăn ndĭt ndĭu yor nhŭl ndrănh. Phung kôranh ƀư brah jêh ri phung nơm mbơh lor hăn ndĭt ndĭu da dê yor ndrănh ktang, Ndrănh hŏ rvăn khân păng, Jêh ri hăn ndĭt ndĭu yor ndrănh ktang; Khân păng but bi tâm saơ, Jêh ri ƀư vĭ dôl gŭ phat dôih.

⁸ Lĕ rngôch sưng sông sa bêng ma hok, Mâu hôm geh ntŭk kloh ôh!

⁹ “Pôri, ma mbu nơm may mra nti nau gĭt mĭn, Jêh ri ma mbu nơm may mra rblang gay ma gĭt vât nau may nti? Di lĕ nti ma phung kon se chalơi pu toh, Mhe rklaih pu toh ƀơh?

¹⁰ Yorlah nau đă ntop nau đă, nau đă ntop nau đă; Mbor ntop ma mbor, mbor ntop ma mbor; Djê̆ ta aơ, djê̆ ta ri!”

¹¹ Yor nây, Brah Yêhôva mra dŏng bâr mbung phung bu năch Jêh ri nau ngơi êng lah ma phung ƀon lan aơ.

¹² Păng hŏ lah jêh đah khân păng: “Aơ jêng ntŭk rlu, Ăn hom nơm rgănh dơi rlu; Aơ jêng ntŭk đăp mpăn.” Ƀiălah khân păng mâu ŭch iăt ôh.

¹³ Yor ri nau Brah Yêhôva ngơi đah khân păng mra jêng: Nau đă ntop nau đă, nau đă ntop nau đă; Mbor ntop ma mbor, mbor ntop ma mbor; Djê̆ ta aơ, djê̆ ta ri! Gay ma khân păng hăn tât jêh ri prah talang, Nchah hăch, geh dăk jêh ri bu nhŭp!

¹⁴ Yor ri, ơ phung dăng mưch, Dôl chiă uănh phung ƀon lan aơ ta ƀon Yêrusalem! Gŭ iăt hom nau Brah Yêhôva ngơi.

¹⁵ Yorlah khân may lah jêh: “Hên hŏ ƀư jêh nau tâm rnglăp đah nau khĭt, Hên geh du nau tâm rnglăp đah ƀon phung khĭt Lah nau tât geh ƀư rai rmeh ler rgăn Mâu mra tât ma hên ôh. Yorlah hên sŏk jêh nau mƀruh jêng ntŭk hên nsing, Sŏk nau ndơm jêng ntŭk hên du krap.”

¹⁶ Yor nây, Kôranh Brah jêng Brah Yêhôva lah pô aơ: “Aơ, Gâp dơm ta Siôn du mlâm lŭ, Jêng lŭ rlong uănh, lŭ njônh ngih, lŭ khlay, Ƀư mbon nâp ktang Gay ma mbu nơm chroh mâu mra rŭng răng ôh.

¹⁷ Gâp mra sŏk nau di ƀư rse veh, Jêh ri nau sŏng srăng jêng ndơ veh rnhuan; Mih pler mra pih kloh ntŭk phung mƀruh nsing, Dak mra lip lĕ ntŭk du krap.”

¹⁸ Rnôk nây, nau khân may tâm rnglăp đah nau khĭt mâu mra hôm jêng ôh, Nau khân may tâm rnglăp đah ƀon phung khĭt mâu mra dâk nâp ôh. Lah nau tât ƀư rai bêng ler rgăn, Khân may mra rai yot.

¹⁹ Ăp tơ̆ nau mhĭk lip tât, păng mra nhŭp rdu khân may Yorlah păng mra rgăn ăp ôi, Nar tâm ban ma măng, nau tât mra hăn rgăn; Knŏng geh nau klach krit Ƀư ăn khân may gĭt rbăng nau ti nây.

²⁰ Sưng bê̆ch gleh ir mâu dơi lâng săk ta nây; Phôi gleh ir mâu dơi ntâk lam.

²¹ Yorlah Brah Yêhôva mra dâk tâm ban ma Păng ƀư jêh ta yôk Pêrasim, Păng mra ji nuih tâm ban ma tâm rlŭng Gibêôn Gay ma ƀư nau kan Păng, jêng nau kan hih rhâl; Gay ƀư nau Păng pah kan, jêng nau pah kan khlay ngăn ngên.

²² Yor nây aƀaơ aơ, lơi hôm mưch ôh, Klach lah rse kât khân may lơ hâu rêt tay; Yorlah gâp tăng jêh nau ntăm mra ƀư rai lam bri dak aơ. Bơh Kôranh Brah Yêhôva ma phung tahan.

²³ Rkêng hom tôr gay iăt bâr gâp; Rkêng tôr hom jêh ri iăt nau gâp ngơi!

²⁴ Di lĕ nơm kai mir ŭch srih ăt kai ăp nar lĕ? Bunuyh nây ăt pŏk neh jêh ri ƀư hăch ƀaƀơ neh?

²⁵ Lah păng rli lâng jêh neh, Mâu di păng srih kumin jê̆ jêh ri kumin toyh; Tuch ba ƀlê ta mbor, Ba ôrgơ ta ntŭk êng, Jêh ri ba ƀlê êng tĭng ntŭk bu vay tuch păng?

²⁶ Nĕ jêng Brah Ndu yơh hŏ ntĭm Jêh ri sâm nti phung kan mir ƀư.

²⁷ Yorlah bu mâu dong kumin jê̆ ma nôp, Mâu đŏng ăn jâng ndeh seh rlă ta kumin toyh; Ƀiălah bu dong kumin jê̆ ma mâng jê̆, Bu dong kumin toyh ma mâng jra.

²⁸ Bu kĭn ba ƀlê gay ma ƀư piăng let, Ƀiălah bu mâu mprah păng ndăng ôh; Nđâp lah jâng ndeh rlă mâu lah jâng seh jot ta ba, Păng mâu đŏng hăch ôh.

²⁹ Nau nây tât đŏng tă bơh Brah Yêhôva ma phung tahan, Nau Păng dăp ƀư khlay ngăn, Nau blau mĭn Păng dŭt ueh ngăn ngên!