Êsai 26 - Nau Brah Ndu Ngơi 2023

Phung Yuđa mprơ yor nau tâm lơh

¹ Tâm nar nây, bu mra mprơ nau mprơ aơ tâm bri Yuđa: “He geh du ƀon toyh nâp! Kôranh Brah sŏk nau tâm rklaih Ƀư pêr mbâl, ƀư pôih.

² Pơk hom lĕ mpông Ăn phung ƀon lan sŏng srăng, Jêng phung ƀon lan djôt prăp nuih n'hâm răp jăp, dơi lăp ta nây.

³ Mbu nơm ăn nau mĭn păng rnơm nsing ma Kôranh Brah Păng mra mât mray păng tâm nau đăp mpăn nŭm rĭng, Yorlah păng rnơm nsing ma May.

⁴ Rnơm nsing hom ma Brah Yêhôva ƀaƀơ n'ho ro, Yorlah Brah Yêhôva, Brah Yêhôva nơm, Jêng lŭ toyh ma lĕ rngôch rnôk rô̆!

⁵ Păng n'glưh jêh phung gŭ ta ntŭk prêh; Ƀư rai lơi ƀon dŭt prêh, Rli jêng neh lâng rlĭ Jêh ri klŭp păng ta neh muy.

⁶ Bu mra jot păng tâm dâng jâng, Tâm dâng mpang jâng nơm o ach, Tâm dâng nhuat jâng nơm mâu geh nau ktang.”

⁷ Trong phung sŏng srăng jêng trong di; Ơ Nơm Sŏng Srăng, dăn May ƀư ăn lâng trong phung sŏng srăng.

⁸ Ơ Brah Yêhôva, ngăn yơh, ta trong nau May phat dôih. Hên kâp gân May; Huêng hên ji hir ma May Ma amoh May jêh ri nau kah gĭt ndray ma May.

⁹ Dôl măng huêng gâp ji hir ma May; Ơ, nuih n'hâm gâp nđơr ŭch joi May. Yorlah nau May phat dôih ƀư jêh ta neh Phung gŭ tâm neh ntu nti gĭt nau sŏng srăng.

¹⁰ Nđâp lah dơi dơn nau yô̆, Nơm ƀai mâu nti nau sŏng srăng ôh. Rêh tâm bri sŏng, păng lŏ ƀư nau mhĭk, Jêh ri mâu saơ ôh nau rnam Brah Yêhôva.

¹¹ Ơ Brah Yêhôva, ti May hŏ yơr jêh Ƀiălah khân păng mâu saơ ôh. Ăn khân păng saơ nau May duh nđơr ma phung ƀon lan May, jêh ri khân păng bêk. Ăn ŭnh sa lơi phung rlăng đah May.

¹² Ơ Brah Yêhôva, May ndâk nau đăp mpăn ma hên, Yorlah lĕ rngôch kan hên, May sâm ƀư an da dê jêh ma hên!

¹³ Ơ Yêhôva Brah Ndu hên, Rlau ma Păng, hên hŏ tă geh phung kôranh êng chiă uănh, Ƀiălah aƀaơ, hên knŏng rnơm nsing du huê May dơm Jêh ri vah vơl dăn ma amoh May.

¹⁴ Khân păng khĭt jêh, mâu hôm mra rêh ôh; Lĕ phan bunuyh khĭt mâu hôm plơ̆ dâk ôh, Yorlah May tâm rmal jêh ri ƀư rai jêh khân păng, Jut lơi lĕ rngôch nau kah gĭt ndray ma khân păng.

¹⁵ Ơ Brah Yêhôva, May hŏ ƀư jêh phung ƀon lan aơ đang ktang lơn, May hŏ ƀư jêh phung ƀon lan aơ đang ktang lơn, May geh nau tâm rnê; May pơk ăn dĭ n'har neh bri aơ.

¹⁶ Ơ Brah Yêhôva, tâm nau rêh ni, Khân păng joi May; Tơlah May nkra, khân păng kuăl mbơh sơm lĕ nuih n'hâm ma May.

¹⁷ Ơ Brah Yêhôva, tanăp măt May, Hên tâm ban ma du huê bu ur ntreo dăch ji deh, Rngot klâng, vơl nter tâm nau nđêh ji ngăn.

¹⁸ Hên hŏ ntreo jêh, tâm nau ji, Ƀiălah knŏng deh sial dơm. Hên mâu geh djôt nau tâm rklaih ma neh ntu ôh, Mâu lĕ hên deh phung ƀon lan ma neh ntu aơ.

¹⁹ Phung May khĭt mra ăn plơ̆ rêh, Săk jăn khân păng mra plơ̆ dâk! Ơ phung khĭt tâm ndruyh neh, kah rngăl hom jêh ri maak! Yorlah dak ngom May tâm ban ma dak ngom ƀhit rvi ang, Jêh ri neh mra mƀơk lĕ phan bunuyh khĭt.

²⁰ Ơ phung ƀon lan Gâp, lăp hom tâm jrô, Jêh ri nchăng lơi mpông. Nde krap hom ƀât lât, Kŏ tât nau ji nuih hŏ rlau jêh.

²¹ Yorlah aơ, Brah Yêhôva mra luh bơh ntŭk Păng gŭ Gay tâm rmal nau tih ma phung gŭ ta neh ntu. Rnôk aơ, neh ntu mra tâm mpơl mham Jêh ri mâu hôm nkŭm ôh phung bu hŏ nkhĭt jêh.