Êsai 24 - Nau Brah Ndu Ngơi 2023

Nau mbơh kâp gân ma phung ƀon lan Kôranh Brah ( 24:1 – 27:13 ) Nau phat dôih lam rplay neh

¹ Aơ, Brah Yêhôva mra ƀư ma neh ntu nsoih bŏng jêh ri jêng rngol; Păng ƀư ma neh ntu rgâl jêh ri ma phung ƀon lan nchah rai pru pra.

² Rnôk nây, lĕ rngôch bunuyh mra nsum ndrel nau mrô nal: Kôranh ƀư brah tâm ban đŏng ma phung ƀon lan; Kôranh bu klâu tâm ban ma bu klâu dĭk, kôranh bu ur tâm ban ma bu ur dĭk; Nơm tăch tâm ban đŏng ma nơm rvăt; Nơm ăn chan tâm ban ma nơm chan, Kôranh ăn bu manh ndơ tâm ban ma nơm manh.

³ Neh mra jêng hŏng lĕ rngôch jêh ri jêng rngol, Yorlah Brah Yêhôva hŏ lah jêh nau nây.

⁴ Rplay neh rngot rvê jêh ri rngot njăp, Neh ntu huănh hươi jêh ri jêng rngot njăp; Phung bunuyh bu yơk dŭt prêh ta klơ neh mra huănh hươi.

⁵ Rplay neh geh nau ƀơ̆ ƀơch Yor phung ƀon lan păng nơm, Yorlah khân păng hŏ ƀư tih nau vay, Mâu di đah nau vay dăp, Jêh ri ƀư rai lơi nau tâm rnglăp n'ho ro.

⁶ Yor nây, nau rak rtăp sa rvăn neh, Phung ƀon lan klơ păng krêp nau tih. Yor nây phung gŭ tâm neh ŭnh sa, Knŏng hôm klen djê̆ bunuyh.

⁷ Ndrănh mhe lŭng nter, Tơm krăk ƀâu lĕ kro klêu jêh, Lĕ rngôch phung geh nuih n'hâm hâk răm nsôr jong da dê;

⁸ Bâr gâr maak hŏ nsrŭng jêh, Nteh nau răm maak lôch jêh, Maak nteh gong rêng loih mâu hôm ôh.

⁹ Mâu hôm geh nơm ƀă nhêt ndrănh ƀă mprơ; Ndrănh mra jêng tăng ma nơm nhêt păng.

¹⁰ Ƀon toyh uh ah hŏ rlâm rai chah jêh; Ngih vâl nchăng da dê, mâu hôm geh nơm lăp ta nây ôh.

¹¹ Bu nter ta trong sâng yor mâu geh ndrănh; Lĕ rngôch nau hâk răm jêng nau ngo klĕng da dê, Nau maak ta neh hŏ du ngai!

¹² Tâm ƀon knŏng hôm nau rngol, Mpông ƀon bu mbang chah rai lôch jêh.

¹³ Yorlah ta nklang phung ndŭl mpôl bunuyh ta klơ neh, Mra jêng tâm ban nôk bu rgu tơm ôlive, Jêh ri tâm ban ma bu dônh play krăk ƀâu tơlah jêh yan pĕ play.

¹⁴ Phung bunuyh hôm gŭ rêh klen aơ mra mprơ nau răm rhơn; Bơh mpeh nhâp nar, khân păng nter huy nau răm maak Tâm rnê nau chrêk rmah Brah Yêhôva.

¹⁵ Pôri bơh mpeh luh nar, mât ton hom ma Brah Yêhôva, Tă bơh lĕ gôl dak mƀŭt, tâm rnê ma Amoh Brah Yêhôva, Brah Ndu Israel.

¹⁶ Bơh lĕ ntŭk dŭt neh ntu, hên hŏ tăng bâr bu mprơ: “Nau chrêk rmah prăp ma Nơm Sŏng Srăng.” Ƀiălah gâp lah: “Gâp hŏt rgănh jêh, gâp hŏt rgănh jêh! Rêh ni ngăn ma gâp, phung mâu gŭ răp jăp! Phung mâu gŭ răp jăp ăt thoi đŏng mâu gŭ răp jăp!”

¹⁷ Ơ phung gŭ tâm neh ntu, Nau klach krit, brŏng jru, jêh ri dăk Dôl gŭ kâp ma khân may.

¹⁸ Mbu nchuăt du bơh nau klach krit Mra tŭp tâm ntu jru; Tơlah luh tă bơh ntu jru Mra văk tâm dăk. Yorlah lĕ mpông bloh ta klơ trôk pơk da dê, Lĕ mbon neh ntu n'găr mpât da dê.

¹⁹ Neh ntu bu mbang rai, Neh ntu hêk âk rngơl, Neh ntu n'gơ ktang ngăn.

²⁰ Neh ndĭt ndĭu tâm ban ma bunuyh nhŭl ndrănh, Păng n'gơ tâm ban ma ndưp ja; Nau tih păng ƀư jâk păng, Jêh ri păng mra prah, mâu hôm dâk ôh!

²¹ Tâm nar nây, Brah Yêhôva mra tâm rmal Phung tahan gŭ ta klơ lĕ ndâr trôk prêh, Jêh ri phung hađăch neh ntu gŭ tâm dâng neh nây.

²² Bu mra tâm rgum khân păng Tâm ban ma phung bu nă tâm ntu; Bu krŭng khân păng tâm ndrung ngo. Lah jŏ nar jêh, bu mra rmal khân păng.

²³ Khay mra bêk, Nar mra đit; Yorlah Brah Yêhôva ma phung tahan mra chiă uănh Ta yôk Siôn jêh ti ta ƀon Yêrusalem, Păng mra tâm mpơl nau chrêk rmah Tanăp phung kôranh bu ranh Păng.