Êsai 23 - Nau Brah Ndu Ngơi 2023

Nau mbơh lor ma nau rlâm tŭp ƀon Tyre

¹ Nau mbơh lor ma Tyre: Ơ kumpăn Tarsis, nhĭm nhhiăng hom, Yorlah ƀon Tyre rai jêh, Mâu hôm geh ngih, mâu lĕ hôm geh trong mŭt! Tă bơh n'gor Kitim, khân păng hŏ gĭt nau nây.

² Gŭ rklăk hom! Ơ phung gŭ ta kơh dak mƀŭt, Ơ phung tăch rgâl ta Sidôn Jêng phung rdeng âk ndơ rgăn dak mƀŭt.

³ Găr ntil bơh Sihôr, yan kăch roih bơh dak krong Nil, Rdeng tĭng trong dak mƀŭt, Jêng drăp păng sa kao; Păng jêng ntŭk tăch rgâl ma ăp bri dak.

⁴ Ơ ƀon Sidôn, ăn may bêk! Yorlah dak mƀŭt ngơi jêh, Pôih dak mƀŭt lah jêh: “Gâp mâu ji ôh, mâu lĕ mâp deh, Mâu lĕ mât siăm bu klâu ndăm, mâu lah bu ur druh.”

⁵ Tơlah nau mhe mhan nây tăng tât ta bri Êjipt, Lah tăng nau mhe mhan ma ƀon Tyre bu mra rngot ngăn.

⁶ Trơn rgăn hom ta Tarsis; Ơ phung gŭ ta kơh dak mƀŭt, nhĭm nhhiăng hom!

⁷ Di lĕ aơ jêng ƀon khân may hâk răm? Jêng ƀon geh bơh rnôk ơm kăl e Jâng păng hŏ njŭn leo păng Tât ta gŭ lĕ nkual ngai.

⁸ Mbu nơm lĕ dăp nal jêh nau nây tâm rdâng ma Tyre, Jêng ƀon hŏ ndô đon hađăch? Phung tăch rgâl păng jêng phung lư rnam, Phung tăch rgâl păng jêng phung bu yơk tâm neh ntu.

⁹ Brah Yêhôva ma phung tahan yơh hŏ dăp nal nau nây, Gay ma ntrŭnh nau sưr lĕ rngôch nau chrêk rmah, Gay ƀư bêk lĕ rngôch phung bu yơk ta neh ntu.

¹⁰ Ơ kon bu ur ƀon Tarsis, hăn rgăn hom bri neh khân ay, Tâm ban ma kuĭl dak krong Nil. Mâu hôm geh nau nhŭp kât ôh.

¹¹ Brah Yêhôva yơr jêh ti Păng ta klơ dak mƀŭt, Ƀư âk ƀon bri hađăch rŭng răng. Păng hŏ ntăm jêh ma bri Kanaan: Ƀư rai lĕ pôih păng.

¹² Păng lah: “Ơ kon bu ur Sidôn, jêng bu ur druh bu tŭn jot, Ay mâu hôm răm maak ôh! Nchuăt gơnh hom tât ma n'gor Kitim! Ƀiălah ta nây may mâu lĕ mra dơi nau đăp.”

¹³ Uănh hom bri neh phung Kaldê! Ta aơ mâu hôm geh phung ƀon lan ôh. Phung Asiri hŏ ƀư ntŭk nây jêng ntŭk gŭ ma mpa bri janh. Khân păng rdâk ngih tŭm, nchueng ƀon, ƀư rai ngih hađăch, jêh ri ƀư jêng mbŭch rlâm rai nchah.

¹⁴ Ơ lĕ rngôch kumpăn Tarsis, nhĭm nhhiăng hom! Yorlah pôih khân may hŏ rai jêh.

¹⁵ Tâm nôk nây, bu mra chuêl ƀon Tyre tâm pơh jât năm, nâm bu du bông hađăch gŭ rêh. Lôch pơh jât năm, ƀon Tyre mra nâm bu nau mprơ bu ur văng tĭr:

¹⁶ “Ơ bu ur văng tĭr bu chuêl jêh! Sŏk gong rêng nsong hom jŭm ƀon, Kreh hom ăn ueh, mprơ hom ăn âk, Gay ma bu kah gĭt ma ay!”

¹⁷ Lôch pơh jât năm, Brah Yêhôva mra khâl ƀon Tyre; păng mra plơ̆ sĭt ma nau kan ơm păng, jêh ri mra ƀư nau văng tĭr đah lĕ rngôch ƀon bri hađăch ta klơ neh ntu.

¹⁸ Ƀiălah ndrăp kao jêh ri rnoh nkhôm păng mra prăp êng ma Brah Yêhôva, ntrok dônh bun nkrem. Yorlah drăp kao nây mra dơi prăp ma phung pah kan tanăp măt Brah Yêhôva, gay khân păng dơi sa rmeh ler jêh ri nsoh bok ao ueh.