Êsai 22 - Nau Brah Ndu Ngơi 2023

Nau mbơh ma nau ƀư rai Yêrusalem

¹ Nau mbơh lor ma rlŭng nau tâm saơ: Moh nau tât ma khân may, Kŏ lĕ rngôch khân may hao ta klơ chor ngih da dê?

² Ơ ƀon bêng ma nau drưh drưh drơu drơu, Jêng ƀon toyh maak răm ri! Phung khân may bu nkhĭt mâu yor ma đao ôh, Mâu lĕ khân păng khĭt tâm nau tâm lơh.

³ Lĕ rngôch phung kôranh chiă uănh khân may nchuăt du ndrel, Bu nhŭp chăp khân păng mâu hôm ŭch hăr jêh ri na. Lĕ rngôch bunuyh khân may bu saơ Bu nhŭp chăp ndrel da dê, nđâp lah khân păng lĕ nchuăt du ngai

⁴ Yor nây, gâp lah: “N'gĭl hom măt bơh gâp! Ăn gâp nhĭm rngot ngăn; Lơi srôih joi nau bonh leng gâp ôh Ma nau ƀư rai kon bu ur phung ƀon lan gâp!”

⁵ Nanê̆ ngăn jêng du nar klach krit, nau tŭn jot jêh ri nau rlŭk rlăk, Dơi mpơl ta rlŭng nau tâm saơ Yorlah Kôranh Brah jêng Brah Yêhôva ma phung tahan; Mpêr ƀon ƀư rai jêh, Nau kuăl rklaih huy tât ta yôk.

⁶ Phung Êlam cheng bĭ dơm hăr Ndrel ma ndeh seh jêh ri phung tahan ncho seh, Bi phung Kir djôt khêl rơm ndrăp tâm lơh.

⁷ Lĕ rngôch rlŭng ueh lơn ma may bêng ma ndeh seh, Bi phung tahan ncho seh dăp ma nau tâm lơh ta mpông ƀon.

⁸ Ndơ n'gang bri Yuđa bu hŏ sŏk lơi jêh. Tâm nar nây, khân may rnơm ma ndơ tâm lơh tâm Ngih Krŏng.

⁹ Khân may saơ âk trôm bluh tâm ƀon Đavit, rĭ dĭng têm dak tâm nglao ta tâm dâng.

¹⁰ Khân may kơp ngih tâm ƀon Yêrusalem, jêh ri ƀư rai lơi bar pe ngih gay ma ăn nâp mpêr ƀon.

¹¹ Khân may lŏ ndâk ntu prăp dak vah vang bar tăp mpêr ƀon gay prăp dak bơh dak nglao ơm, ƀiălah khân may mâu rnơm ôh ma Nơm ƀư nau nây; khân may mâu uănh ma Nơm hŏ ŭch ƀư nau nây bơh kăl e.

¹² Tâm nar nây, Kôranh Brah jêng Brah Yêhôva ma phung tahan Kuăl khân may ma nau nhĭm jêh ri klâng rngot, Poih bôk jêh ri nsoh ao ƀau;

¹³ Ntrok đah nau aơ, khân may nkhơng ma hâk răm: Chôk ndrôk, nkhĭt biăp, Sa puăch jêh ri nhêt ndrănh. Khân may lah: “Aƀaơ, sông sa nhêt hom, Yorlah nar ôi taơ he mra khĭt!”

¹⁴ Brah Yêhôva ma phung tahan Nơm yơh hŏ mpơl nau ngơi aơ ma tôr gâp: “Nanê̆ ngăn nau tih aơ bu mâu mra yô̆ an kŏ tât khân may khĭt.” Kôranh Brah jêng Brah Yêhôva ma phung tahan lah jêh.

Mrô nal ma kôranh chiă uănh mbeh

¹⁵ Kôranh Brah jêng Brah Yêhôva ma phung tahan lah ma gâp: “Hăn lah hom ma nơm mât uănh, Y-Sêpna jêng nơm mât uănh ngih hađăch, pô aơ:

¹⁶ ‘Moh nau kan may dôl ƀư ta aơ? May geh ndŭl mpôl deh đŏng ta aơ kŏ may kuyh jêh ma may nơm du trôm môch ta aơ? Ngăn, may kuyh ma may nơm du trôm môch ta ntŭk prêh, lôk du ntŭk gŭ rlu ma may nơm tâm trôm lŭ!

¹⁷ Ơ bunuyh ktang! Aơ, Brah Yêhôva mra kuăn nâp may, jêh ri mƀăr may dŭt ngai,

¹⁸ Păng mra klôn may ăn mlâm jêh ri klŭp may tâm ban ma klŭp play chưng ma du n'gor dĭ huy. Ta nây, may mra khĭt; ndeh seh hŏ tă ƀư chrêk rmah ma may mra gŭ ta nây lĕ. May mra jêng nau bêk prêng ma ngih kôranh may!’

¹⁹ Brah Ndu lah: ‘Gâp mra n'glưh nsot may, jêh ri bu mra mƀăr may bơh ntŭk may gŭ.

²⁰ Tâm nar nây, Gâp mra kuăl oh mon Gâp jêng Y-Êliakim, kon bu klâu Y-Hilkia.

²¹ Gâp mra sŏk ao may ăn păng nsoh, sŏk rse bŭt may ăn păng vân, sŏk nau may chiă uănh jao tâm ti păng. Păng mra jêng mbơ̆ phung gŭ tâm ƀon Yêrusalem jêh ri ma ngih Yuđa.

²² Gâp mra dơm keh khuă ngih Y-Đavit ta klơ săng nglik păng. Păng pơk mâu geh nơm dơi nchăng ôh, jêh ri păng nchăng mâu geh nơm dơi pơk ôh.

²³ Gâp mra ƀư ăn ma păng nâp ktang tâm ban ma pâng meh vâl bok ƀư tâm neh; jêh ri păng mra jêng du rplay sưng hađăch chrêk rmah ma ngih mbơ̆ păng.

²⁴ Bu mra yông kât ta păng lĕ nau chrêk rmah mbơ̆ păng, phung kon sau, noi deh, jêh ri lĕ rngôch lĕ ndơ dŏng jê̆ jê̆, ntơm bơh kachok tât ma yăng jê̆.’”

²⁵ Brah Yêhôva ma phung tahan lah: “Tâm nar nây, mâng nđăng nchăng jêh tâm ntŭk nâp mra rgloh lơi jêh ri tŭp jŭr; jêh ri ndơ jâk yông ta păng bu mra koh lơi.” Brah Yêhôva lah jêh nau nây.