Êsai 21 - Nau Brah Ndu Ngơi 2023

Nau mbơh lor ma nau rlâm rai bri Babilôn

¹ Nau mbơh lor ma bri rdah dăch dak mƀŭt. Păng tât tă bơh bri rdah, Jêng nkual neh klach krit, Tâm ban ma sial vănh blông rdu bri Nêgep.

² Geh du nau tâm saơ klach krit hŏ mpơl ma gâp: Nơm mâu gŭ răp jăp dôl ƀư rlăng, Nơm ƀư rai dôl ƀư rai! “Ơ phung Êlam, hăn hao hom! Ơ phung Mêdơ, nchueng jŭm hom! Gâp mra ƀư lôch Lĕ nau păng lŭng nter.”

³ Yor nây, bŭt gâp ji ngăn, Nau ji kruăn rêt nhŭp gâp Tâm ban ma nau ji kruăn rêt du huê bu ur me dôl deh kon. Nau ji gâp anh ƀư ăn ma gâp mâu dơi tăng ôh, Nau klach krit ƀư ma gâp mâu dơi saơ!

⁴ Nuih n'hâm gâp uh ah, Nau klach krit ƀư ăn gâp hih rhâl; Gâp kâp gân tâm kêng măng Plơ̆ jêng nau klach krit ma gâp.

⁵ Bu ndrăp sưng sông sa, Dăp bunuyh gak, jêh ri khân păng sông sa nhêt. “Ơ phung kôranh chiă uănh, dâk hom! Mhĭng hom khêl ma dak ngi!”

⁶ Yorlah Kôranh Brah lah ma gâp pô aơ: “Hăn hom, dăp bunuyh gak, Ntĭnh ăn păng mbơh moh nau păng saơ.

⁷ Tơlah păng saơ phung tahan ncho seh, hăn tĭng kôp, Geh bunuyh ncho seh bri jêh ri seh samô Ăn gŭ njrăng Njrăng nanê̆ ngăn.”

⁸ Nơm gak kuăl huy: “Ơ Kôranh Brah, gâp gŭ râng lôch nar ta tŭm gak, Gâp gŭ ta ntŭk gâp gak lôch măng.

⁹ Aơ, geh phung tahan ncho seh Hăn văch bar bar!” Jêh nây nơm gak lah: “Babilôn hŏ rlâm tŭp, rlâm tŭp jêh! Lĕ rngôch rup brah păng Lĕ nchah hăch ta neh!”

¹⁰ Ơ phung bu mbang tâm ban ma ba ta ntŭk mprah ba gâp! Nau gâp hŏ tăng jêh bơh Brah Yêhôva ma phung tahan, Jêng Brah Ndu phung Israel, Gâp hŏ mbơh jêh nau nây ma oh nâu gâp gĭt.

Nau mbơh lor ma ƀon Duma

¹¹ Nau mbơh lor ma ƀon Duma: Bơh Sêir, geh bâr kuăl gâp: “Ơ bunuyh tahan gak, mâm măng aơ? Ơ nơm gak, mâm măng aơ?”

¹² Bunuyh tahan gak nsĭt lah: “Ôi tât, măng tât đŏng. Tơlah ŭch ôp, ôp hom; Ƀiălah plơ̆ tay hom, văch hom ta aơ.”

Nau mbơh lor ma Arâp

¹³ Nau mbơh lor ma Arâp: Ơ phung Dêdan tăch rgâl, Khân may mra bê̆ch măng tâm krŏng bri Arâp.

¹⁴ Ơ phung gŭ tâm bri Têma, Djôt hom dak ma phung ji hir, Jêh ri njŭn piăng let ma phung nchuăt du.

¹⁵ Yorlah khân păng nchuăt du gây ma klaih bơh mpiăt đao, Nchuăt du bơh đao bu tŏk jêh, Nchuăt du bơh na bu van jêh, Jêh ri nchuăt du bơh nau tâm lơh ktang ngăn.

¹⁶ Kôranh Brah lah jêh ma gâp tâm ban pônây: “Hôm du năm dơm, tĭng nâm năm du huê pah kan nkhôm, lĕ nau chrêk rmah bri Kêdar mra lôch.

¹⁷ Phung tahan janh ktang pănh na tâm phung Kêdar hôm e djê̆ dơm. Yorlah Yêhôva Brah Ndu ma phung Israel lah jêh nau nây.”