Êsai 20 - Nau Brah Ndu Ngơi 2023

Nau mbơh lor ma nau phat dôih bri Êjipt jêh ri bri Kus

¹ Tâm năm hađăch bri Asiri jêng Y-Sargôn njuăl kôranh ma phung tahan hăn tât ta ƀon Asdôt gay rduh lơh jêh ri sŏk ƀon nây,

² tâm nôk nây geh nau Brah Yêhôva ngơi ma Y-Êsai, kon bu klâu Y-Amôt, pô aơ: “Hăn hom, doh hom ao ƀau bơh bŭt may, jêh ri doh lơi ntâu jot bơh jâng may.” Y-Êsai ƀư di nâm bu pônây, păng hăn săk hưl jêh ri hăn jâng dơm.

³ Brah Yêhôva lah tay: “Tâm ban ma oh mon Gâp jêng Y-Êsai hŏ hăn săk hưl jêh ri jâng dơm tâm pe năm jêng du nau tâm mbên jêh ri nau mbơh ma bri Êjipt jêh ri ma bri Kus,

⁴ tâm ban pônây lĕ, hađăch bri Asiri têk leo phung Êjipt jêh ri phung Kus ƀư bu nă bơh bri khân păng, phung druh ndăm jêh ri phung bu ranh, hăn săk hưl, jâng dơm, jêh ri mpơl n'gang bŭt, gay ƀư bêk ma bri Êjipt nâm bu pônây lĕ.

⁵ Rnôk nây, mbu uănh bri Kus jêng nau kâp gân, jêh ri uănh Êjipt jêng nau hưn ma păng mra klach krit jêh ri bêk prêng.

⁶ Tâm nar nây, phung gŭ rgŏ kơh dak mƀŭt mra lah pô aơ: ‘Aơ, phung mpôl băl bunuyh he uănh geh nau kâp gân, jêh ri nchuăt tât gay tâm rklaih bơh hađăch bri Asiri, aƀaơ ri păng hŏ jêng nâm bu kơt nĕ yơh! He mâm he dơi klaih?’”