Êsai 19 - Nau Brah Ndu Ngơi 2023

Nau mbơh lor ma Êjipt

¹ Nau mbơh lor ma Êjipt: “Aơ, Brah Yêhôva ncho ta klơ ndâr tŭk, Ngăch tât ta Êjipt. Phung rup brah bri Êjipt râm sâr da dê tanăp Păng, Nuih n'hâm phung Êjipt klach krit.

² Gâp mra ƀư ăn ma phung Êjipt tâm rdâng đah phung Êjipt nơm; Bu mra ŭch tâm lơh đah oh nâu khân păng, Phung chiau meng tâm rdâng ndrăng phung chiau meng, Ƀon aơ tâm rdâng đah ƀon ri, Ƀon bri hađăch aơ tâm rdâng đah ƀon bri hađăch ri.

³ Phung Êjipt mra roh lĕ nuih n'hâm, Gâp mra ƀư tâm vĭ nau khân păng tâm nchră. Rnôk nây, khân păng mra ôp phung rup brah, Phung n'hŭm, phung gru rƀên, jêh ri phung mbơh nau mra tât.

⁴ Gâp mra jao phung Êjipt Tâm ti du huê phung kôranh mhĭk, Du huê hađăch djơh mhĭk mra chiă uănh khân păng.” Kôranh Brah jêng Brah Yêhôva ma phung tahan lah kơt nây.

⁵ Dak mƀŭt mra suăt, Dak krong mra sơh jêh ri kro.

⁶ Dak n'hong jê̆ mra plơ̆ jêng ƀâu ôm, N'hor dak ta bri Êjipt mra sơh mbrơi jêh ri kro; Treng jêh ri rpho kro klêu da dê.

⁷ Lĕ ndrêch gơ̆ njŏ kơh dak krong Jêh ri dak krong Nil, Nđâp ma lĕ rngôch ndơ bu srih ta lŏ mra kro da dê, Sial rdu ndơ nây, mâu hôm geh ôh.

⁸ Phung seng ka mra nhĭm nhhiăng, Lĕ rngôch phung chê̆ ndar tâm dak krong Nil mra rđêng nđor; Jêh ri phung nthăng nhuăl tâm lĕ n'hor dak rdja nuih da dê.

⁹ Phung ƀư brai mhay rhên Jêh ri phung ƀư brai nglang prêng da dê.

¹⁰ Lĕ phung tanh Êjipt dĭl da dê, Lĕ rngôch phung pah kan nkhôm mra rngot da dê.

¹¹ Phung kôranh tâm ƀon Sôan knŏng jêng rluk mâl; Phung nchră geh nau blau mĭn Pharaôn mpơl lĕ nau mĭn brŭt ndrăng. Mâm dĭng khân may janh lah ma Pharaôn: “Gâp jêng kon bu klâu phung njêh, Jêng kon sau phung hađăch rnôk kăl e”?

¹² Pôri mbah ntŭk gŭ phung njêh may? Ăn khân păng nkoch gay ma may gĭt Lĕ nau Brah Yêhôva ma phung tahan hŏ nal jêh Gay tâm rdâng đah Êjipt.

¹³ Phung kôranh tâm ƀon Sôan jêng jêh phung rluk, Phung kôranh ƀon Nôp tŭp tâm nau ndơm; Phung ƀư lŭ tơm tâm phung mpôl khân păng Hŏ ƀư vĭ ma Êjipt

¹⁴ Brah Yêhôva hŏ ƀư lŭk rlăk ta nklang khân păng Du huêng brah ƀư vĭ, Păng ƀư ma Êjipt vĭ tâm lĕ nau kan, Nâm bu bunuyh nhŭl ndrănh ƀah hăn ndĭt ndĭu ƀă hok.

¹⁵ Tâm bri Êjipt bu mâu hôm dơi kơl ôh, Gĭt lah bôk mâu lah chiăng, nau kan toyh mâu lah kan jê̆.

¹⁶ Tâm nar nây, phung Êjipt mra tâm ban ma phung bu ur râm nsâr klach kir dôl khân păng saơ ti Brah Yêhôva ma phung tahan yơr, yơr tâm rdâng đah khân păng.

¹⁷ Rnôk nây, bri Yuđa mra jêng du nau klach krit ma bri Êjipt. Ăp tơ̆ bu nkah ma Yuđa lĕ rngôch bu klach da dê, yorlah nau dăp dơm Brah Yêhôva ma phung tahan ŭch ƀư nau tâm rmal ma Êjipt.

Êjipt, Asiri jêh ri Israel geh nau ueh uĭn

¹⁸ Tâm nar nây, tâm bri Êjipt mra geh prăm rplay ƀon toyh ngơi nau bri Kanaan jêh ri ton săk ma amoh Brah Yêhôva ma phung tahan. Tâm prăm rplay ƀon nây, geh du ƀon bu mra kuăl jêng Ƀon Ƀư Rai.

¹⁹ Tâm nar nây, mra geh du nơng ƀư brah prăp ma Brah Yêhôva ta nklang bri Êjipt, jêh ri du meh n'gâng prăp ma Brah Yêhôva ta n'har neh păng.

²⁰ Nĕ jêng nau mbên jêh ri nau mbơh ma Brah Yêhôva ma phung tahan tâm bri Êjipt. Dôl khân păng kuăl dăn ma Brah Yêhôva yor bu tŭn jot, Păng mra njuăl ma khân păng du huê nơm sâm rklaih tât gay king n'gang jêh ri rklaih khân păng.

²¹ Brah Yêhôva mra ƀư ma phung Êjipt gĭt năl Păng; jêh ri tâm nar nây, phung Êjipt mra gĭt năl Brah Yêhôva. Khân păng mra nhhơr mpa ƀư brah jêh ri ndơ ƀư brah gay yơk mbah ma Păng; khân păng mra ton ma Brah Yêhôva jêh ri ƀư nanê̆ ngăn nau nây.

²² Brah Yêhôva mra dong bri Êjipt; jêh dong ƀư bah tay khân păng đŏng. Khân păng mra sĭt ma Brah Yêhôva. Păng mra iăt nau khân păng mbơh sơm jêh ri ƀư bah khân păng.

²³ Tâm nar nây, mra geh du trong toyh bơh bri Êjipt tât ta bri Asiri; phung Asiri mra hăn ta bri Êjipt, jêh ri phung Êjipt hăn ta bri Asiri. Phung Êjipt ndrel phung Asiri mra hăn yơk mbah Brah Yêhôva.

²⁴ Tâm nar nây, bri Israel mra ndrel ma bri Êjipt jêh ri bri Asiri jêng pe bri ăn nau ueh uĭn ta nklang neh ntu,

²⁵ yorlah Brah Yêhôva ma phung tahan hŏ ăn nau ueh uĭn ma khân păng. Păng lah: “Nau ueh uĭn ma bri Êjipt jêng phung ƀon lan Gâp, bri Asiri jêng kan ti Gâp ndâk, bri Israel jêng drăp ndơn gâp!”