Êsai 18 - Nau Brah Ndu Ngơi 2023

Nau mbơh lor ma nau phat dôih phung Kus

¹ Rêh ni ngăn ma bri neh rtuh năr nteh drơu drơu, Jêng bri neh đah ri dak krong bri Kus;

² May njuăl nơm mbơh dŏng rkĭt ƀư ma rpho găn dak mƀŭt, Hăn ta klơ mpiăt dak! Ơ phung mbơh hăn ngăch, Hăn hom ta du bri dak geh phung mpôl jong jêh ri ntâu pler, Tât ma du phung ƀon lan êp ngai ăt bu klach, Du bri dak ktang jêh ri vay tŭn jot, Jêng bri dak geh âk dak krong tâm pă.

³ Ơ lĕ rngôch phung gŭ tâm neh ntu, Jêng phung rêh ta klơ neh! Lah bu n'hao jêh n'ha kơ ta klơ yôk, Ăn khân may uănh hom! Lah bu uh nŭng, Ăn khân may iăt!

⁴ Yorlah nau Brah Yêhôva lah jêh ma gâp tâm ban pônây: “Bơh ntŭk Gâp dôl gŭ, Gâp mra gŭ rlăk uănh Tâm ban ma duh gring nar nchrat, Tâm ban thŭl dak ngom dôl duh nar yan rek.

⁵ Êlor yan rek tât, nôk yan kao lôch jêh, Jêh ri kao jêng jêh lĕ rkŭm play krăk ƀâu dŭm, Bu mra sŏk nhuĕ koh lĕ n'gĭng nse, Koh mƀăr lĕ n'gĭng pŭm.

⁶ Bu mra chalơi lĕ khân păng Ăn ma sĭm joi mpa ta klơ yôk Jêh ri ma mpô mpa ta klơ neh. Sĭm joi mpa mra sa khân păng dôl yan vai, Lĕ rngôch mpô mpa ta neh mra sa khân păng dôl tâm yan sĭt puh.”

⁷ Tâm rnôk nây, phung ƀon lan jong jêh ri ntâu pler, jêng phung bunuyh bu klach, nđâp lah gŭ êp mâu lah ngai, du bri dak ktang jêh ri vay tŭn jot, bri dak geh âk dak krong nkhah, khân păng yơh mra njŭn ndơ nhhơr ma Brah Yêhôva ma phung tahan, ta ntŭk prăp ma amoh Brah Yêhôva ma phung tahan gŭ, jêng yôk Siôn.