Êsai 17 - Nau Brah Ndu Ngơi 2023

Nau mbơh lor ma nau phat dôih Damas

¹ Nau mbơh lor ma Damas: “Aơ, ƀon Damas mâu hôm mra jêng du rplay ƀon toyh ôh Păng mra jêng du mbŭch ndơ rai.

² Lĕ ƀon Arôer mra jêng rngot njăp Jêh ri mra jêng ntŭk ma phung biăp bê̆ch rlu, Mâu geh nơm ƀư ma khân păng râm sâr ôh.

³ Pôih mra roh lĕ bơh bri Êphraim, Ƀon bri hađăch Damas ăt mâu hôm đŏng; Rnoh bunuyh hôm klen bơh bri Aram Ăt mra jêng tâm ban ma nau chrêk rmah phung Israel.” Brah Yêhôva ma phung tahan lah kơt nây.

⁴ “Tâm nar nây, nau chrêk rmah Yakôb mra n'hŭch, Săk jăn lay mra jêng rgay.

⁵ Nau nây mra tât ma păng tâm ban ma nơm rek kuăn lĕ nkong ba Jêh nây sŏk ti păng koh ndrŏng ba; Jêh ri nâm bu nôk bu mban ba Tâm rlŭng Rêphaim.

⁶ Mra hôm klen djê̆ ndrŏng ba mban; Tâm ban nôk bu rgu tơm ôlive, Hôm klen bar pe play Ta chiông n'gĭng dŭt prêh, Mâu lah puăn prăm play Ta lĕ n'gĭng âk play.” Yêhôva Brah Ndu Israel lah pônây.

Phung ƀon lan hôm klen tâm Israel plơ̆ sĭt ma Brah Ndu

⁷ Tâm nar nây, phung bunuyh mra mĭn ma Nơm Rhăk Njêng khân păng, jêh ri măt khân păng nge nger uănh ta Nơm Kloh Ueh Israel.

⁸ Khân păng mâu mra mĭn ôh ma lĕ nơng ƀư brah jêng kan ti khân păng nơm ƀư, jêh ri khân păng mâu hôm uănh ma lĕ ndơ nglau ti khân păng njêng jêh, gĭt lah rup brah Asêrim mâu lah nơng ƀư brah nhhơr ndơ ƀâu kah.

⁹ Tâm nar nây, lĕ rngôch ƀon nâp khân păng mra jêng tâm ban ma lĕ ntŭk bu chalơi jêng rngot njăp tâm bri mâu lah ta klơ n'gơn yôk, jêng lĕ ntŭk bu chalơi jêng rngot njăp tanăp phung kon Israel; nĕ jêng ntŭk rngot njăp.

¹⁰ Yorlah may chuêl jêh Brah Ndu nơm tâm rklaih may, Mâu kah gĭt ôh ma Lŭ Toyh ntŭk may du krap. Yor nây nđâp lah may tăm jêh đang tơm si dŭt ueh, Ƀư đŏng ntil play krăk ƀâu bu năch;

¹¹ Ta nar may tăm, may saơ păng văch ma toyh, Tâm kêng ôi, găr ntil chăt nse jêh ri dang kao; Ƀiălah tâm nar geh nau rngot ji ngăn Pôri yan kăch roih roh lĕ!

¹² Ơ, phung ndŭl mpôl bunuyh âk râk ƀư nteh drơu drơu! Khân păng ngrông tâm ban ma nteh rbuh dak mƀŭt! Nteh drơu drơu tâm phung ndŭl mpôl bunuyh Ngrông tâm ban ma nteh âk dak leng hoch!

¹³ Ngăn, phung mpôl băl bunuyh lŭng nter tâm ban ma âk n'hong dak nkhŭt djhu djhut, Ƀiălah nôk Kôranh Brah nduyh, khân păng nchuăt du ngai, Jêh ri bu nsot khân păng tâm ban ma sial khôm njŏk nja ta klơ yôk, Tâm ban ma ndruyh neh tâm phŭt chuănh.

¹⁴ Ta kêng măng, aơ, geh nau klach krit, Êlor ma tât ƀring ang ôi, mâu hôm saơ khân păng ôh. Nĕ jêng ndơ phung sŏk ntŭng, Jêng mrô nal prăp ma phung ntŭng ndơ he.