Êsai 16 - Nau Brah Ndu Ngơi 2023

Môap roh jêh nau kâp gân

¹ Njuăl hom kon biăp Ăn ma kôranh chiă uănh nkual neh, Bơh ƀon Sêla rgăn bri rdah, Tât ta yôk kon bu ur Siôn

² Ta ntŭk thơl dak krong Arnôn Bu mprơh phung bu ur Môap Tâm ban ma kon sĭm bu ntrŭt du tă bơh rsuăn.

³ Khân păng kuăl gay bu kơl: “Dăn sâm ntĭm an, dăn ăn nau tâm nal, Ta nar nklang bôk, dăn gui may nkŭm hên tâm ban ma dôl măng; Dăn pôn lơi phung bu nsot, Jêh ri lơi dĭng phong ma phung nchuăt du!

⁴ Dăn ăn phung Môap bu nsot jêh Gŭ ndrel ma khân may; Ăn may jêng ntŭk khân păng krap Bơh nơm ƀư rai. Yorlah nơm tŭn jot mâu hôm, Nau ƀư rai lôch jêh; Jêh ri nơm tŭn jot bơh neh bu nkhĭt jêh.

⁵ Nôk nĕ, sưng hađăch mra dơi nâp tâm nau ueh, Tâm rmlak Y-Đavit mra geh du huê nơm chiă uănh Gŭ tâm sưng hađăch nây ma nau răp jăp; Păng mra joi nau di. Jêh ri gơnh ƀư nau sŏng.”

⁶ Hên tăng jêh nau sưr rlau phung Môap, Păng sưr ngăn! Păng hưn, sưr rlau jêh ri mưch bu; Nau păng ngơi hưn jêng dơm dam!

⁷ Yor nây, Môap mra nhĭm nhhiăng, Lĕ rngôch bunuyh nhĭm da dê yor ma Môap. Ăn khân may nhĭm hom, rđêng nđor hom Yor ƀănh play krăk ƀâu tă bơh ƀon Kir-Harêset!

⁸ Yor neh mir Hêsbôn hŏ nhop kro jêh, Jêh ri đang krăk ƀâu Sipma kơt nây đŏng; Phung kôranh chiă uănh lĕ bri dak Hŏ chôk lĕ jêh reh tơm krăk ƀâu ueh, N'gĭng păng jong tât ta Jaser, Jêng bĭk ta bri rdah; Nkeh păng ntoch jong Tât kơh tê̆ dak mƀŭt.

⁹ Yor nây, ndrel ma nau nhĭm nhhiăng Jaser, Gâp nhĭm ma đang krăk ƀâu Sipma. Ơ Hêsbôn, Êlêaleh, Gâp mra djrah dak măt ta khân may, Yor nau troh nter nơm plên play krăk ƀâu dôl pĕ play tâm yan vai, Jêh ri yan rek khân may mâu hôm geh ôh!

¹⁰ Bu hŏ sŏk lơi jêh nau răm maak Bơh đang tơm sa play; Jêh ri tâm đang krăk ƀâu Mâu lĕ hôm geh nau troh răm maak, Mâu geh nơm jot play krăk ƀâu tâm ntu păt ndrănh; Gâp hŏ ƀư roh jêh nau troh răm maak ma nơm jot play krăk ƀâu.

¹¹ Yor ri, nuih n'hâm Gâp nđêng tâm ban ma gong rêng loih yor bri Môap, Nuih n'hâm Gâp yor Kir-Hêres nđêng kơt nây đŏng.

¹² Nôk nây, nđâp lah phung Môap hŏt rgănh hăn ta ntŭk prêh, Lăp tâm ntŭk ngih mbah păng gay mbơh sơm, ăt jêng dơm dam!

¹³ Aơ yơh jêng nau Brah Yêhôva hŏ lah jêh ma Môap ntơm ƀơh saơm.

¹⁴ Ƀiălah aƀaơ, Brah Yêhôva lah pô aơ: “Tâm pe năm đŏng, tĭng nau kơp bunuyh kan nkhôm, nau chrêk rmah Môap jêh ri phung bunuyh âk râk păng mra plăch jêng ndơ bu mưch rmot; phung hôm klen mra jêng djê̆ ngăn jêh ri rdja.”