Êsai 15 - Nau Brah Ndu Ngơi 2023

Nau mbơh lor ma nau phat dôih Môap

¹ Nau mbơh lor ma Môap: Tâm du măng, A Môap bu lơh jêh ri roh rai! Tâm du măng, Kir-Môap bu ƀư rai jêh ri roh rai lôch!

² Phung Dibôn hăn hao jêh ta ntŭk yơk mbah Ta lĕ ntŭk prêh gay nhĭm nhhiăng. Phung Môap nhĭm nhhiăng Ma Nêbô jêh ri Mêdêba; Lĕ rngôch plưn bôk da dê Jêh ri têp kang poih lĕ.

³ Tâm trong sâng, khân păng nsoh ao ƀau; Ta klơ chor jây jêh ri tâm lĕ ntŭk rgum băl, Lĕ rngôch bunuyh nhĭm nhhiăng da dê, dêh rhêt jêh ri luh dak măt.

⁴ Hêsbôn jêh ri Êlêaleh lŭng nter, Bu tăng bâr khân păng tât ta Jahas. Yor nây, phung tahan bri Môap lung nter; Huêng khân păng râm nsâr.

⁵ Nuih n'hâm gâp lŭng nter yor Môap; Bunuyh khân păng nchuăt du tât ta ƀon Sôar jêh ri ƀon Êglat-Sêlisija. Yorlah ta dor yôk Luhit Khân păng ƀă hao ƀă nhĭm; Tâm trong Hôrônaim, Khân păng lŭng nter yor nau ƀư rai.

⁶ Lĕ n'hor dak ta Nimrim Hŏ suăt jêh; Gơ̆ hŏ kro jêh, mâu hôm geh gơ̆ nse, Mâu hôm geh tơm si ndrêh ôh.

⁷ Yor nây, drăp ndơ dơi sŏk Jêh ri drăp ndơ khlay prăp nkrem jêh, Khân păng rdeng leo tât ta N'hor dak Tơm Si Yôr.

⁸ Bu tăng bâr nhĭm nter huy Jŭm bri Môap; Bu tăng nau lŭng nter tât ta Êlaim, Jêh ri bu tăng nau lŭng nter tât ta ƀon Bêr-Êlim.

⁹ Lĕ n'hong dak tâm bri Dimôn bêng ma mham; Ƀiălah Gâp hôm ntop nau mhĭk ta klơ Dimôn, Mprơh yau mŭr tĭng ban phung Môap lĕ klaih Jêh ri phung hôm klen tâm n'gor.