Êsai 14 - Nau Brah Ndu Ngơi 2023

Nau plơ̆ sĭt tă bơh ntŭk ƀư dĭk

¹ Ngăn yơh, Brah Yêhôva mra yô̆ nđach ma Yakôb jêh ri hôm du tơ̆ đŏng săch Israel. Păng mra ăn ma khân păng gŭ tâm bri khân păng nơm. Phung bu năch mra tâm rnglăp đah khân păng jêh ri mra gŭ ndrel đah ngih Yakôb.

² Phung ndŭl mpôl bunuyh mra njŭn leo phung Israel plơ̆ sĭt ta ntŭk khân păng nơm. Ta neh Brah Yêhôva, ngih Israel mra pit rvăn phung ndŭl mpôl bunuyh aơ jêng phung oh mon bu klâu jêh ri oh mon bu ur. Phung Israel mra nhŭp phung hŏ nhŭp jêh khân păng, jêh ri chiă uănh phung tŭn jot jêh khân păng.

Nau mbơh lor ma nau rai roh bri Babilôn

³ Tât nar Brah Yêhôva ăn ma khân may nau rlu bơh nau rêh ni, nau rŭng răng toyh, jêh ri nau pah kan hŏt rgănh bu nchâp khân may ƀư,

⁴ khân may mra lah nau mưch rmot aơ ma hađăch Babilôn pô aơ: “Nơm tŭn jot lĕ tât nôk phat dôih jêh! Nau păng ji nuih nglĕ dŭt jêh!

⁵ Brah Yêhôva nkê̆ch lơi jêh mâng jra phung ƀai Jêh ri mâng jra hađăch phung chiă uănh,

⁶ Jêng phung mâu rlu dong phung ndŭl mpôl bunuyh Tâm nau ji nuih Chiă uănh lĕ bri dak tâm nau ji nuih, Jêh ri nau ƀư mhĭk mâu geh nơm dơi king ôh.

⁷ Aơ lĕ neh ntu geh nau rlu tâm nau đăp mpăn; Troh mprơ ma nau răm maak!

⁸ Kŏ tât tơm si chiprơ răm maak yor ma may, Tơm si sêdar ta klơ yôk Liban lah pô aơ: ‘Ntơm bơh may bê̆ch tŭp, Mâu geh du huê nơm văch tât kăl hên ôh!’

⁹ Ƀon phung khĭt jru âk râk ƀư mpât đŏng yorlah may Gay chuă vơt may tât. Păng hŏ rlay phung phan bunuyh khĭt yor may, Jêng lĕ rngôch phung kôranh chiă uănh ta klơ neh ntu; Păng hŏ ƀư lĕ rngôch hađăch lĕ bri dak Dâk bơh sưng hađăch khân păng.

¹⁰ Lĕ rngôch khân păng Mra lah ma may pô aơ: ‘Aơ, may huơi tâm ban ma hên, May jêng jêh tâm ban ma hên!

¹¹ Nau lư geh ndrel ma nteh gong rêng loih may Bu hŏ djôt leo jŭr tâm ƀon phung khĭt da dê. Rhai ƀư sưng bê̆ch may, Bi ndrŭng rvơng ƀư nah ntâk!’”

¹² Hơi mănh mbing ôi, kon bu klâu ƀhit rvi ang, Mâm ƀư may tŭp jêh tă bơh trôk! Hơi nơm ƀư rai lĕ bri dak, Mâm ƀư bu n'glưh lơi may ta neh!

¹³ May nơm lah jêh tâm nuih n'hâm pô aơ: “Gâp mra hao ta klơ trôk, Gâp mra n'hao sưng hađăch gâp Prêh lơn ma lĕ mănh mbing Brah Ndu. Gâp mra gŭ ta klơ yôk nau tâm rƀŭn Âk ngai tât ma mpeh pa lơ

¹⁴ Gâp mra hao prêh lơn ma ndâr tŭk, Ƀư ma gâp tâm ban ma Nơm Dŭt Prêh.”

¹⁵ Ƀiălah bu mra djôt leo may jŭr ta ƀon phung khĭt, Trŭnh nglĕ dŭt blat brŏng jru!

¹⁶ Đơ phung saơ may Mra njrăng uănh may jêh ri ôp: “Di lĕ bunuyh aơ jêng nơm hŏ ƀư rplay neh n'găr mpât, Ƀư mpât n'gơ ma lĕ bri dak,

¹⁷ Ƀư ma neh ntu plơ̆ jêng bri rdah, Rlă nkhŭt lĕ ƀon Jêh ri mâu pơk mpông ndrung ma phung bu krŭng ta ndrung ƀơh?”

¹⁸ Lĕ rngôch hađăch ăp bri lah gŭ bê̆ch, Bu tâp ăp nơm tâm môch khân păng nơm tâm nau bu yơk.

¹⁹ Ƀiălah bu mƀăr may padih môch, Tâm ban ma n'gĭng nse ƀơ̆ ƀơch, Tâm ban ma ao phung bu nkhĭt, ntâp ma đao, Bu nklơ̆ tŭp ta lĕ glo lŭ tâm dâng ntu, Tâm ban ma du săk jăn khĭt bu jot plên tâm dâng jâng!

²⁰ May mâu mra dơi tâp ndrel ma phung hađăch tâm môch, Yorlah may hŏ ƀư rai jêh bri may Jêh ri nkhĭt jêh phung ƀon lan. Noi deh phung mhĭk Mra mro mrăng mâu dơi nkah tât ôh.

²¹ Yor nau kue mbơ̆ chô khân păng, Nkra hom du ntŭk tâm nkhĭt ma phung kon sau khân păng; Klach lah khân păng plơ̆ dâk jêh ri sŏk pit neh, Jêh ri ndâk ƀon toyh khân păng lam klơ neh ntu!

²² Brah Yêhôva ma phung tahan lah: “Gâp mra dâk tâm rdâng ma khân păng. Gâp mra ƀư rai amoh Babilôn jêh ri phung hôm klen, nđâp ma phung kon sau jêh ri phung sau se,” Brah Yêhôva lah pônây.

²³ “Gâp mra ƀư ăn bri dak nây jêng ntŭk blŏ gŭ, jêng ntŭk dak nglau; jêh ri Gâp mra dŏng mpêh ƀư rai lơi păng jêh ri pih kloh bri nây.” Brah Yêhôva ma phung tahan lah pônây.

Nau mbơh lor ma nau rmal bri Asiri

²⁴ Brah Yêhôva ma phung tahan hŏ sơm ton pô aơ: “N'hêl nanê̆ nau Gâp hŏ dăp mra tât ngăn, Nau Gâp hŏ ƀư păng mra nâp.

²⁵ Gâp mra ƀư rai phung tahan Asiri tâm bri Gâp; Gâp mra jot plên păng ta klơ yôk Gâp. Mâng mbăk păng mra dơi sŏk lơi bơh phung ƀon lan Gâp, Mbăk jâk păng mra dơi sŏk lơi bơh săng nglik khân păng.”

²⁶ Nây jêng nau dăp ƀư hŏ tâm nal jêh Ma lĕ rngôch neh ntu; Nĕ jêng nting tur hŏ yơr luh Ta klơ lĕ bri dak.

²⁷ Yorlah Brah Yêhôva ma phung tahan hŏ dăp jêh Mbu nơm chalơi? Ti Păng yơr jêh Mbu nơm dơi rhuăt lơi?

Nau mbơh lor ma nau rmal phung Philistin

²⁸ Năm hađăch Ahas khĭt, nau mbơh lor aơ hŏ dơi mbơh:

²⁹ “Ơ lĕ rngôch phung Philistin, lơi răm maak ndal ôh, Yorlah mâng rvĕ dong may lĕ nkê̆ch deh jêh, Yorlah tă bơh noi deh bêh mra luh du mlâm bêh vǐt, Jêh ri kon păng mra jêng du mlâm bêh ŭnh mpăr.

³⁰ Rnôk nây, phung o ach lơn mra joi saơ ndơ sông sa, Phung pưt ndơ mra lâng bê̆ch tâm nau đăp mpăn. Ƀiălah Gâp mra ƀư ma noi deh may khĭt ma nau sa sât ji ngot, Jêh ri đơ phung hôm klen bu mra nkhĭt.

³¹ Ơ mpông mpêr! Nhĭm nhhiăng hom! Ơ ƀon toyh, lŭng nter hom! Ơ lĕ phung Philistin, rai lôch hom! Yorlah geh du nau nhhŭk ŭnh tât tă bơh mpeh pa lơ, Mâu geh du huê chalơi phung tahan păng nơm.”

³² Moh nau mra plơ̆ lah ma phung mbơh bơh bri dak aơ? Plơ̆ lah hom pô aơ: “Brah Yêhôva rdâk jêh Siôn, Jêh ri phung o ach tâm phung ƀon lan Păng mra dơi joi ntŭk nde.”