Êsai 10 - Nau Brah Ndu Ngơi 2023

Nau mbơh lor ma Yuđa

¹ Rêh ni ngăn ma phung nchih nau vay mâu sŏng, Phung nchih nau vay dăp mâu di,

² Gay pit sŏk nau geh phung mâu geh nau ktang Jêh ri sŏk roh nau di bơh phung o ach tâm phung ƀon lan Gâp, Plăch rgâl phung bu ur ndrô sai jêng mpa sa ma khân păng, Jêh ri phung kon đơi jêng ndơ pit sŏk!

³ Moh nau khân may mra ƀư tơlah tât nar tâm rmal, Lah nau ƀư rai tât ma khân may bơh ngai? Ntŭk êp khân may mra du gay ma geh nau kơl? Ta ntŭk khân may mra prăp nau ndrŏng khân may?

⁴ Khân păng knŏng hôm ƀư du ntil kan jêng păn ta nklang phung bu nă Jêh ri cha lôt ta nklang phung khĭt. Nđâp lah pônây, nau ji nuih Kôranh Brah ê hŏ du ôh Jêh ri ti Păng ăt hôm yơr.

Nau Brah Yêhôva phat dôih phung Asiri

⁵ Rêh ni ngăn ma Asiri, mâng rpăt nau Gâp ji nuih! Mâng jra tâm ti păng jêng nau Gâp ji nuih!

⁶ Gâp njuăl păng hăn tâm rdâng đah bri dak mâu blau yơk ma Brah Ndu ôh, Gâp ntăm păng hăn tâm lơh đah phung ƀon lan nsônh ăn Gâp ji nuih, Gay ntŭng ndô ndơ, pit sŏk Jêh ri jot khân păng tâm ban ma neh bŏk ta trong.

⁷ Ƀiălah Asiri mâu gĭt vât pônây ôh, Nuih n'hâm păng mâu mĭn kơt nây; Păng ŭch ƀư rai Jêh ri ngluh lơi dŭt âk bri dak.

⁸ Yorlah păng lah: “Mâu di hĕ phung kôranh tahan gâp jêng hađăch da dê?

⁹ Mâu di hĕ Kalnô mra tâm ban ma Karkêmis, Hamat mra tâm ban ma Arpat, Samari mra tâm ban ma Damas lĕ?

¹⁰ Tâm ban ma ti gâp hŏ kuăn lĕ rngôch bri dak geh rup brah, Rup brah khân păng âk rlau lơn ma ƀon Yêrusalem jêh ri ƀon Samari,

¹¹ Mâu di hĕ Gâp mra ƀư ma ƀon Yêrusalem jêh ri ma rup brah păng Tâm ban ma gâp hŏ ƀư jêh ma ƀon Samari jêh ri ma rup brah păng?”

¹² Ƀiălah dôl Kôranh Brah hŏ ƀư jêh lĕ kan Păng ta klơ yôk Siôn jêh ri ta ƀon Yêrusalem, Păng lah: “Gâp mra tâm rmal lĕ nau kan nuih n'hâm n'hao êng jêh ri măt nau hưn n'hao êng nơm hađăch Asiri.

¹³ Yorlah hađăch Asiri lah pô aơ: ‘Gâp ƀư lĕ nau nây ma nau ktang tâm ti gâp Jêh ri ma nau blau mĭn gâp, yorlah gâp geh nau gĭt mĭn. Gâp lĕ ngroh lơi jêh n'har bri neh phung ndŭl mpôl bunuyh, Jêh ri pit in lĕ jay ndơ khlay khân păng. Tâm ban ma du huê janh ktang, Gâp hŏ n'glưh nsot phung hađăch

¹⁴ Ti gâp hŏ sŏk jêh drăp ndơ phung mpôl băl bunuyh Tâm ban ma nhŭp sĭm tâm rsuăn; Gâp hŏ rgum sŏk lĕ drăp ndơ ta neh, Tâm ban ma bu rgum sŏk tăp iăr lĕ me chalơi jêh; Mâu geh bunuyh mpât năr, Hă trôm mbung, mâu lah huăch ôh!’ ”

¹⁵ Sung tâm rnê păng nơm rlau lơn ma nơm djôt sung, Mâu lah ndruih tâm rnê păng nơm rlau lơn ma nơm djôt ndruih lĕ? Nau nây tâm ban ma mâng rpăt gai rlơ̆ nơm yơr mâng rpăt, Mâng jra chông nơm kuăn mâng jra!

¹⁶ Yor nây, Kôranh Brah jêng Brah Yêhôva ma phung tahan Mra ƀư ma phung janh ktang hađăch nây plơ̆ jêng rgay grol; Jêh ri tâm dâng nau chrêk rmah hađăch nây, Ŭnh mra sa tâm ban ma du mbŭch ŭnh su.

¹⁷ Nau ang phung Israel mra jêng ŭnh, Nơm Kloh Ueh khân păng mra jêng du mpiăt ŭnh, Mra su ma ŭnh jêh ri su lơi rtau lok jêh ri pih pŭm Knŏng tâm du nar.

¹⁸ Bi ma nau ueh bri krŏng jêh ri mir tơm play hađăch nây, Păng mra ƀư rai lĕ rngôch, nđâp ma huêng jêh ri săk jăn, Tâm ban ma bunuyh mâu hôm geh suan hăn ndĭt ndĭu.

¹⁹ Đơ si hôm tâm krŏng mra hôm e djê̆, Du huê kon se ăt dơi geh đŏng kơp rnoh păng.

Phung Israel hôm e klen mra rmal nau tih

²⁰ Tâm nar nây, phung Israel hôm e jêh ri phung hôm gŭ rêh klen tâm ngih Yakôb mra mâu hôm rnơm ôh ma phung hŏ dong khân păng; ƀiălah khân păng mra rnơm ngăn ma Brah Yêhôva jêng Nơm Kloh Ueh Israel.

²¹ Ƀaƀă phung hôm e klen, jêng phung ƀon lan hôm e klen Yakôb, mra plơ̆ tay ma Brah Ndu nau brah.

²² Hơi Israel, nđâp lah phung ƀon lan may mra jêng âk tâm ban ma choih tâm dak mƀŭt, knŏng du kô̆ hôm e klen mra plơ̆ sĭt. Bu tâm nal jêh nau ƀư rai, nau di mra ăp ntŭk.

²³ Yorlah Kôranh Brah jêng Yêhôva ma phung tahan hŏ tâm nal jêh nau ƀư nau rai lôch ta lam neh ntu.

²⁴ Yor nây, Kôranh Brah jêng Brah Yêhôva ma phung tahan lah tâm ban pônây: “Ơ phung ƀon lan Gâp dôl gŭ ta Siôn, lơi klach ôh ma phung Asiri lah khân păng dong khân may ma mâng rpăt jêh ri yơr mâng khân păng tâm rdâng đah khân may, tâm ban ma phung Êjipt hŏ ƀư jêh.

²⁵ Yorlah hôm knŏng ƀât lât đŏng, phat dôih tâm rmal mra lôch; jêh ri nau Gâp ji nuih mra rle mpeh khân păng gay ƀư rai khân păng.

²⁶ Brah Yêhôva ma phung tahan mra rpăt mâng ta khân păng, nâm bu hŏ lơh jêh phung Madian ta lŭ Ôrep; Păng mra yơr mâng ta klơ dak mƀŭt tâm ban ma Păng hŏ ƀư jêh ta Êjipt.

²⁷ Tâm nar nây, mbăk jâk khân păng mra sŏk lơi tă bơh săng nglik may bu mra sŏk lơi, mâng mbăk khân păng bu mra sŏk lơi tă trô ko; mâng mbăk mra đoh jêh yorlah may jêng lay jêh.”

²⁸ Khân păng tât jêh ta Ayat, rgăn lĕ Migrôn, Bun ndô ndơ ta Mikmas.

²⁹ Hăn rgăn yôk, khân păng lah: “He mra ndâk vâl bok bê̆ch măng ta Gêba.” Rama râm nsâr, Gibêa ƀon Y-Sôl nchuăt du!

³⁰ Ơ kon bu ur ƀon Galim, nter hom ăn huy! Ơ phung Laisa, rkêng tôr iăt hom! Yô̆ nđach ngăn ma phung Anathôt!

³¹ Matmêna du krap, Phung ƀon lan Gêbim joi ntŭk gŭ krap.

³² Nar aơ yơh, khân păng mra nsrŭng ta Nôp, Rtuh ti păng tâm rdâng ta yôk kon bu ur Siôn, Jêh ri tâm rdâng đah gôl Yêrusalem!

³³ Aơ, Kôranh Brah jêng Brah Yêhôva ma phung tahan, Mra dŏng nau dơi krit ngăn koh lơi n'gĭng tơm si; Đơ tơm si hưn mra kăl cha lôt, Đơ tơm si prêh toyh bu mra hŭch lơi.

³⁴ Păng mra kăl si pŭm toyh tâm krŏng ma sung, Jêh ri bri Liban mra cha lôt tanăp Nơm Geh Nau Brah.