Êsai 1 - Nau Brah Ndu Ngơi 2023

Nau ngơi gleh ( 1:1-31 )

¹ Tâm rnôk Y-Usia, Y-Jôtham, Y-Ahas jêh ri Y-Hêsêkia jêng phung hađăch Yuđa, Y-Êsai, kon bu klâu Y-Amôt, dơn nau tâm saơ ma bri dak Yuđa jêh ri ma ƀon Yêrusalem.

Nau nduyh ma ndŭl mpôl tâm rdâng

² Ơ lĕ ndâr trôk gŭ iăt hom, ơ neh ntu rkêng tôr iăt hom! Yorlah Brah Yêhôva lah pô aơ: “Gâp hŏ mât mơh jêh oh kon, ăn khân păng toyh kuăng, Ƀiălah khân păng tâm rdâng jêh đah Gâp.

³ Ndrôk hôm gĭt năl nơm mât păng, Seh bri hôm gĭt năl hip gơ̆ kôranh păng; Ƀiălah phung Israel mâu gĭt ôh, Phung ƀon lan Gâp mâu gĭt vât ôh.”

⁴ Rêh ni yơh ma bri dak ƀư nau tih, Phung ƀon lan ƀư nau tih jâk jêr Noi deh ƀư mhĭk, Phung kon gŭ ƀư nau ƀơ̆ ƀơch! Khân păng chalơi jêh Brah Yêhôva, Mưch rmot ma Nơm Kloh Ueh Israel, Plơ̆ jêng bu êng jêh ri nkhah du.

⁵ Mâm ƀư khân may ŭch tâm rdâng ƀaƀơ Gay ŭch bu rmal đŏng bơh? Lam bôk sôt rmanh da dê, Nuih n'hâm chah rai da dê.

⁶ Bơh mpang jâng tât ta bôk, Mâu geh du ntŭk bah ôh, Lĕ ntŭk sôt jêh ri ntŭk môr bŭr Jêh ri lĕ ntŭk mhe sôt, Mâu hŏ jĭr ôh, mâu lĕ mâp put, Mâu lĕ mâp mhĭng ma dak ngi ôlive jêh ri piăch.

⁷ Bri dak khân may jêng rngot njăp, Lĕ ƀon toyh khân may bu su ma ŭnh Phung bu năch sŏk pit neh khân may, Tanăp măt khân may, Ƀư bri khân may jêng rngot njăp lah phung bu năch tŭn jot.

⁸ Bu chalơi kon bu ur Siôn Tâm ban ma du mlâm ndưp tâm đang krăk ƀâu, Tâm ban ma du mlâm nkơp gak tâm mir rpŭng, Tâm ban ma du rplay ƀon bu nchueng jêh.

⁹ Tơlah Brah Yêhôva ma phung tahan Mâu lơi ma he du phung djê̆ hôm rêh, Pôri he he hŏ jêng nâm bu ƀon Sôdôm, Jêh ri tâm ban ma ƀon Gômôrơ jêh.

¹⁰ Ơ phung chiă uănh ƀon Sôdôm, Gŭ iăt hom nau Brah Yêhôva ngơi! Ơ phung ƀon lan Gômôrơ, Rkêng hom tôr iăt nau vay Brah Ndu he!

¹¹ Brah Yêhôva lah “Âk râk ndơ khân may ƀư brah mâu geh khlay ôh ma Gâp? Gâp hŏ dĭl jêh đah ndơ ƀư brah gŭch ma biăp nkuăng, Jêh ri ngi mpô mpa lay. Gâp mâu maak ôh ma mham ndrôk nkuăng, Mâu lah kon biăp jêh ri be nkuăng.

¹² Lah khân may văch tanăp Gâp, Mbu nơm dăn nau aơ bơh ti khân may, Gay ma khân may jot ndring ngih Gâp?

¹³ Lơi hôm njŭn ôh ndơ ƀư brah rnih môi mâu khlay! Gâp tâm rmot ma ndơ ƀâu kah, Ma nau rƀŭn khay mhe luh, ma nar saƀat jêh ri ma lĕ nau tâm rƀŭn toyh. Gâp mâu hôm dơi dơn ôh nau ƀư tih ƀaƀơ jêh ri lŏ hăn nau tâm rƀŭn yơk.

¹⁴ Gâp tâm rmot ma lĕ nau rƀŭn khay mhe Jêh ri ma lĕ nau rƀŭn nhêt sông tĭng nâm khân may tâm nal jêh. Khân păng ƀư jâk gâp Lĕ nau rƀŭn nây plơ̆ jêng kan jâk jêr ma Gâp,

¹⁵ Yor ri, lah khân may yơr klơ, Gâp mra nkŭm măt gâp ma khân may. Nđâp tơlah khân may mbơh sơm âk, Gâp mâu iăt ôh. Yor ti khân may pung mham.

¹⁶ Rao ƀư kloh hom khân may nơm! Mƀăr lơi hom lĕ nau mhĭk bơh măt Gâp; Lơi hom ƀư nau mhĭk.

¹⁷ Nti hom ƀư nau ueh, Tĭng joi nau di, Kơl an bunuyh bu tŭn jot, Phat dôih nau di ma kon đơi, Ngơi n'gang nau rlăch nchră ma bu ur ndrô.”

¹⁸ Brah Yêhôva lah: “Văch hom aƀaơ, ăn he sek uănh ndrel: Nđâp tơlah nau tih khân may chăng nâm bu chăng rhŏnh, Mra jêng nglang tâm ban ma pler; Nđâp tơlah păng chăng rhưch nâm bu bok chăng, Mra jêng nglang tâm ban ma rsau biăp.

¹⁹ Tơlah khân may ŭch jêh ri tông bâr, Khân may mra dơi sa play kao ueh lơn tâm bri.

²⁰ Ƀiălah tơlah khân may dun jêh ri tâm rdâng, Đao gưm mra ƀư rai khân may; Yor bâr mbung Brah Yêhôva hŏ ngơi jêh.”

Nau mhĭk tâm ƀon toyh

²¹ Vư! Ƀon răp jăp Hŏ plơ̆ jêng bu ur văng tĭr! Păng bêng ma nau di, Jêh ri jêng ntŭk nau sŏng srăng gŭ tâm păng. Ƀiălah aƀaơ aơ bêng ma phung nkhĭt bunuyh!

²² Prăk may rgâl jêng mƀum, Ndrănh krăk ƀâu may tâm lŭk lai đah dak.

²³ Phung chiă uănh may jêng phung tâm rdâng, Tâm rnglăp ndrel ma đah phung ntŭng. Ăp nơm rŏng ma drăp blŏl, Jêh ri nchuăt tĭng nau nkhôm. Khân păng mâu phat dôih nau di ma phung kon đơi, Mâu lĕ khân păng chrê ma nau phong dôih bu ur ndrô.

²⁴ Yor nây, Kôranh Brah jêng Brah Yêhôva ma phung tahan, Nơm Nau Brah Israel lah: “Ơ! Nuih n'hâm Gâp mra maak rmal ma phung tâm rdâng đah Gâp, Jêh ri plơng bôk phung rlăng đah Gâp.

²⁵ Gâp mra yơr ti tâm rdâng tay đah may, Ƀư ăn may kloh lĕ ndŏk nâm bu ƀư kloh mah, Jêh ri sŏk lơi lĕ ndruyh ndrak bơh may.

²⁶ Gâp mra ndâk tay phung kôranh phat dôih may tâm ban nôk lor, Jêh ri phung kôranh nchră may tâm ban ma ntơm saơm. Jêh nau nây, bu mra rnha ma may jêng ƀon sŏng srăng, Jêng ƀon răp jăp.”

²⁷ Bu mra tâm chuai ƀon Siôn ma nau di, Jêh ri phung ƀon lan tâm ƀon toyh rmal nau tih mra dơi tâm chuai bơh nau sŏng srăng.

²⁸ Ƀiălah phung tâm rdâng jêh ri phung geh nau tih mra rai yot, Bi ma phung chalơi Brah Yêhôva mra rai lôch lĕ.

²⁹ Pôri may mra bêk yor ma tơm si Khân may rŏng; Jêh ri đit prêng yor ma ntŭk n'gar trao Khân may săch jêh.

³⁰ Yorlah khân may mra tâm ban ma tơm n'ho kro n'ha, Tâm ban ma n'gar trao mâu geh dak ôh.

³¹ Bunuyh ktang mra tâm ban ma rse mhay bu ƀư brai, Nau kan păng tâm ban ma mprănh ŭnh, Lĕ bar ŭnh mra sa ndrel n'grŭp, Mâu geh nơm dơi buh nhhât.