Êphêsô 6 - Nau Brah Ndu Ngơi 2023

Nau kan phung kon jêh ri mbơ̆ mê̆

¹ Hơi phung kon, tông hom ma mê̆ mbơ̆ khân may nơm tâm Kôranh Brah, yorlah aơ jêng nau di ngăn.

² “Yơk hom ma mbơ̆ mê̆ khân may” — nây jêng nau vay ntăm tal nguay, geh nau ton ndrel —

³ “gay ma khân may geh nau ueh uĭn jêh ri gŭ rêh jŏ năm ta neh ntu aơ.”

⁴ Hơi phung mbơ̆, lơi ƀư ma oh kon khân may ji nuih, ƀiălah mât rong hom khân păng tâm di keh jêh ri nau ntĭm nti tâm Kôranh Brah.

Nau vay kan kôranh, bunuyh dĭk bu

⁵ Hơi phung bunuyh dĭk bu, klach râm sâr hom, sŏk nuih n'hâm nau ngăn tông bâr ma kôranh ta neh ntu, tâm ban tông bâr ma Brah Krist,

⁶ mâu di tông bâr knŏng tanăp măt ôh, nâm bu khân may joi nau maak ma bunuyh, ƀiălah nâm bu phung dĭk Brah Krist, lĕ nuih n'hâm ƀư nau Brah Ndu ŭch.

⁷ Pah kan hom ma nuih n'hâm lŏng tâm ban pah kan ma Kôranh Brah, mâu di pah kan ma bu ôh,

⁸ yorlah khân may gĭt jêh geh tơ̆ jêng dĭk, geh tơ̆ jêng kon me, ăp nơm mra geh nau nkhôm bơh Kôranh Brah tĭng nâm nau ueh păng ƀư jêh.

⁹ Hơi phung kôranh, ăn khân may ƀư tâm ban lĕ đah khân păng, jêh ri lơi thăm rmat ma khân păng ôh. Khân may gĭt jêh khân may nơm jêh ri khân păng geh du huê kôranh ndrel tâm trôk, jêh ri Păng mâu gŭ du ding ma bu ôh.

Ndơ tâm lơh phung chroh Brah Krist

¹⁰ Nglĕ dŭt, ăn khân may ktang tâm Kôranh Brah jêh ri rnơm ma nau ktang brah Păng.

¹¹ Ndrăp hom lĕ rngôch ndơ tâm lơh tă bơh Brah Ndu gay ma khân may dơi nâp tâm rdâng đah lĕ nau nchră phung brah mhĭk.

¹² Yorlah nau he tâm lơh, mâu di tâm rdâng đah nglay săk jêh ri mham ôh, ƀiălah tâm rdâng đah lĕ nau chiă uănh, đah nau ktang, đah phung kôranh geh nau dơi klơ neh ntu ngo aơ, jêh ri đah phung brah mhĭk gŭ lĕ ntŭk ta klơ trôk.

¹³ Yor nây, ndrăp hom lĕ rngôch ndơ tâm lơh Brah Ndu, gay tâm nar mhĭk, khân may dơi tâm rdâng; jêh ri tơlah dơi lĕ rngôch jêh, khân may dơi gŭ nâp ngăn.

¹⁴ Pô ri, gŭ nâp hom, văn rse bŭt ma nau ngăn, nsoh ao loih ma nau sŏng srăng,

¹⁵ nsoh ntâu jot ma nau ndrăp bơh Nau Mhe Mhan Ueh đăp mpăn,

¹⁶ dŏng nau chroh ƀư khêl ƀaƀơ; tă bơh nĕ khân may dơi nhhât lĕ rngôch hăr ŭnh phung brah mhĭk.

¹⁷ Ndô hom môk nau tâm rklaih jêh ri djôt đao Brah Huêng Ueh, jêng nau ngơi Brah Ndu.

¹⁸ Dŏng ƀaƀơ nau mbơh sơm, vơh vơl, jêh ri mbơh sơm tâm Brah Huêng Ueh. Gay dơi geh nau ntrâng aơ, srôih hom, rngeh njrăng, jêh ri mbơh sơm ma lĕ rngôch phung kloh ueh.

¹⁹ Dăn mbơh sơm đŏng ma gâp, gay tơlah gâp hă mbung, Brah Ndu ăn ma gâp geh nau nti lah, jêh ri gâp nănh mbơh nau khlay ndâp bơh Nau Mhe Mhan Ueh;

²⁰ yor Nau Mhe Mhan Ueh nây, gâp jêng nơm mbơh tâm rse rvăk. Dăn mbơh sơm hom gay ma gâp geh nau janh mbơh Nau Mhe Mhan Ueh nây nâm bu ăn gâp ngơi.

Njuăl Y-Tikikus nsong. Nau mbah khâl nglĕ dŭt samƀŭt

²¹ Gay ma khân may dơi gĭt aƀaơ aơ mâm nau rêh gâp jêh ri moh nau kan, Y-Tikikus, oh nâu hên rŏng ngăn ngên jêh ri bunuyh pah kan răp jăp tâm Kôranh Brah, mra nkoch bri lĕ ntil ndơ ma khân may.

²² Gâp njuăl păng hăn ma khân may di tâm nau ŭch gay ma khân may gĭt mâm nau tât ma hên aƀaơ aơ, jêh ri gay n'hao nuih khân may.

²³ Dăn nau đăp mpăn, nau rŏng jêh ri nau chroh tă bơh Brah Ndu jêng Mbơ̆, jêh ri tă bơh Kôranh Brah jêng Brah Yêsu Krist, gŭ ndrel phung oh nâu.

²⁴ Dăn nau yô̆ gŭ ndrel ma lĕ rngôch phung rŏng ma Kôranh Brah he jêng Brah Yêsu Krist ma nau rŏng mâu blau rai.