Êphêsô 4 - Nau Brah Ndu Ngơi 2023

II. Nau gŭ ngao tâm Phung Ngih Brah Ndu, tâm mpôl bunuyh jêh ri tâm rnăk vâl ( 4:1 – 6:24 ) Du Ngih Brah Ndu, âk nau blau jêh ri nau pah kan

¹ Pôri, jêng du huê bunuyh gŭ ndrung tâm Kôranh Brah, gâp vơh vơl ma khân may gŭ rêh hom du nau rêh tâm di ma nau Brah Ndu kuăl jêh khân may.

² Ăn dŭt dêh rhêt, rdơ̆ rbăn jêh ri nau srôih, ăn khân may ŭn nuih ndrăng khân may tâm nau rŏng.

³ Srôih prăp nau tâm rnglăp tâm Brah Huêng Ueh ma rse nau đăp mpăn.

⁴ Geh knŏng du săk jăn, du Brah Huêng Ueh, tâm ban đŏng hŏ kuăl khân may văch ma du nau kâp gân;

⁵ geh knŏng nguay Kôranh Brah, du nau chroh, du nau ƀaptem;

⁶ geh knŏng nguay Brah Ndu, Mbơ̆ ma lĕ rngôch bunuyh, Păng gŭ ta klơ lĕ rngôch bunuyh, ta nklang lĕ rngôch bunuyh jêh ri tâm trôm lĕ rngôch bunuyh.

⁷ Ƀiălah nau yô̆ hŏ ăn jêh ma ăp nơm tâm phung he tĭng nau keh tâm pă bơh Brah Krist ăn.

⁸ Yor ri, geh nau nchih: “Păng hao ntŭk prêh jêh, njŭn leo âk ngăn phung bu nă, jêh ri ăn lĕ nau blau ma kon bunuyh.”

⁹ Tơlah ngơi “Păng hŏ hao klơ” moh nau bu ntĭt, lah mâu di jêng Păng jŭr jêh tâm lĕ ntŭk dêh rlau lơn tâm dâng neh ntu?

¹⁰ Nơm jŭr jêh jêng Nơm hao jêh lĕ ta klơ ma lĕ ndâr trôk gay ƀư bêng lĕ ntil ndơ.

¹¹ Păng yơh ăn ma ƀaƀă phung jêng kôranh oh mon, ƀaƀă phung jêng nơm mbơh lor, ƀaƀă phung êng jêng ma nơm mbơh nkoch Nau Mhe Mhan Ueh, ƀaƀă phung êng êng đŏng jêng nơm nti jêh ri kôranh nti,

¹² gay ndrăp phung kloh ueh ma nau pah kan jêh ri ndâk njêng săk jăn Brah Krist,

¹³ kŏ tât nôk lĕ rngôch phung he dơi geh nau tâm rnglăp tâm nau chroh jêh ri tâm nau gĭt năl Kon Brah Ndu, gay plơ̆ jêng bunuyh văch ma toyh, dơi ăn nŭm nau dăng ktang tâm ban ma Brah Krist nơm.

¹⁴ Kơt nây, he mâu mra hôm jêng kon se ôh, geh nau rpuh njach jêh ri rdu tĭng sial khôm nau nti nklă, tă bơh nau plĕch rlăm kon bunuyh jêh ri lĕ nau blau nklă khân păng ndơm mƀruh.

¹⁵ Ƀiălah Păng ŭch he ngơi nau ngăn tâm nuih n'hâm rŏng, dĭng he văch ma toyh tâm ăp kô̆ rle tât ma Brah Krist, jêng bôk;

¹⁶ Yor Păng, lĕ săk jăn tâm rnglăp jêh ri nkrêp nâp tă bơh lĕ rse tâm gop. Nôk ăp kô̆ ƀư kan tâm di ri mơ săk jăn mra văch ma toyh, jêh ri tâm n'hao tâm njêng êng păng nơm tâm nau rŏng.

Nau rêh mhe tâm Brah Krist

¹⁷ Pôri, tâm Kôranh Brah, gâp lah jêh ri nkah khân may lơi gŭ rêh nâm bu phung bu năch ôh, yorlah khân păng gŭ rêh tĭng nau mĭn dơm dam khân păng nơm.

¹⁸ Nau mĭn khân păng ngo klĕng, gŭ ngai đah nau rêh Brah Ndu, yor nau rluk mâl gŭ tâm khân păng, jêh ri nuih n'hâm khân păng men dăng.

¹⁹ Khân păng roh lĕ nau gĭt mĭn, mƀơk khân păng nơm tâm nau ƀai, kơnh ŭch ƀư lĕ rngôch ndơ ƀơ̆ ƀơch.

²⁰ Ƀiălah nây mâu di jêng lĕ nau khân may nti tă bơh Brah Krist.

²¹ Yorlah khân may tăng jêh ma nau Păng jêh ri khân may nti jêh tâm Păng di nâm nau ngăn tâm Brah Yêsu.

²² Pôri, khân may doh chalơi hom bunuyh ơm jêng ndơ nau rêh rnôk kăl e, ơm jêng tih mhĭk jêh yor lĕ nau kơnh ŭch mƀruh nchơt;

²³ tă bơh Brah Huêng Ueh rgâl mhe nau mĭn khân may,

²⁴ jêh ri nsoh bunuyh mhe, jêng bunuyh dơi rhăk njêng jêh tĭng rup Brah Ndu tâm nau ngăn sŏng srăng jêh ri nau kloh ueh.

²⁵ Pôri yơh, ăp nơm tâm khân may mƀăr lơi hom nau mƀruh nchơt, “Ngơi hom ngăn ma phung chiau meng,” yorlah he jêng kô̆ săk jăn ndrăng he da dê.

²⁶ Tơlah khân may duh nuih, lơi ƀư tih ôh; lơi ji nuih tât nar nhâp,

²⁷ lơi dĭng njêng du ntŭk găl ăn brah mhĭk.

²⁸ Nơm vay ntŭng, lơi hôm ntŭng ôh; ƀiălah ueh lơn srôih, sŏk ti păng nơm ƀư nau sŏng srăng, gay sâm kơl ma bunuyh pưt kƀah.

²⁹ Lơi ăn du nau ngơi mhĭk luh tă bơh trôm mbung khân may ôh, ƀiălah tơlah khư ngơi, ngơi hom lĕ nau ngơi ueh, geh nau ndâk njêng gay djôt leo nau ueh tât ma phung gŭ iăt.

³⁰ Khân may lơi ƀư rngot Brah Huêng Ueh Brah Ndu; yor tâm Păng, khân may geh nau tâp pŏng tât ma nar tâm chuai.

³¹ Ngroh lơi hom bơh khân may lĕ nau khek, nuih n'hâm hăt janh, nau ji nuih, nau nter, nau suai rak, ndrel ma lĕ nau djơh mhĭk.

³² Ăn khân may gŭ ngao tâm nau ueh jêh ri nau rdơ̆ rbăn, yô̆ an ndrăng khân may nâm bu Brah Ndu yô̆ an jêh ma khân may tâm Brah Krist.