Êphêsô 2 - Nau Brah Ndu Ngơi 2023

Nau dơi rklaih bơh nau yô̆

¹ Khân may khĭt jêh yor lĕ nau ƀư tih jêh ri nau tih khân may nơm,

² jêng lĕ nau khân may hŏ tă tĭng dôl hôm rêh tĭng nâm nau mơng ta neh ntu aơ, tông tĭng nơm chiă uănh tâm ndâr tŭk, jêng brah dôl pah kan tâm lĕ phung kon mâu tông bâr.

³ Lĕ rngôch he gŭ tâm phung nây, hŏ geh tơ̆ he gŭ rêh tĭng lĕ nau nglay săk kơnh ŭch, tĭng groi lĕ nau nglay săk ŭch jêh ri nau mĭn. Pônây, tĭng nau ơm geh ta nglay săk, he jêng kon ma nau ji nuih tâm ban lĕ rngôch bunuyh êng.

⁴ Ƀiălah Brah Ndu, jêng Nơm ndrŏng nuih n'hâm yô̆ nđach, yor Păng rŏng he ma nau rŏng dŭt prêh,

⁵ pôri nôk he lĕ khĭt jêh yor lĕ nau tih he, Păng ƀư ăn he dâk rêh tay ndrel ma Brah Krist — nây jêng tă bơh nau yô̆ yơh khân may dơi geh nau tâm rklaih —

⁶ jêh ri tâm Brah Yêsu Krist, Brah Ndu hŏ ƀư ăn he dâk rêh tay jêh ri gŭ ndrel ma Păng ta lĕ ntŭk klơ trôk,

⁷ gay mpơl ma lĕ rnôk dăch tât gĭt năl nau rmeh ler mâu blau dŭt tâm nau yô̆ Păng, tă bơh nau ueh Păng ăn jêh ma he tâm Brah Yêsu Krist.

⁸ Yor nau yô̆, jêh ri nau chroh yơh khân may geh nau rklaih, nau aơ mâu luh tă bơh khân may ôh, ƀiălah jêng ndơ bơh Brah Ndu ăn;

⁹ mâu đŏng di tă bơh nau khân may kan, pônây mơ lơi ăn geh bunuyh tâm rnê ma păng nơm.

¹⁰ Yorlah he jêng kan bơh ti Păng, dơi rhăk njêng tâm Brah Yêsu Krist gay ƀư lĕ nau kan ueh Brah Ndu nkra jêh bơh lor gay ma he kơt ƀư.

Tâm rnglăp ndrel tâm Brah Krist

¹¹ Pôri kah gĭt hom kăl e ri khân may jêng phung bu năch tĭng nâm nglay săk, jêh ri phung koh ntâu ma ti bunuyh tâm nglay săk kuăl khân may jêng phung mâu koh ntâu.

¹² Kah gĭt hom rnôk nây, gŭ ta neh ntu aơ, khân may mâu geh Brah Krist ôh; mâu geh nau dơi jêng phung ƀon lan Israel ôh, jêng bu năch ma nau tâm rnglăp bơh nau ton, mâu geh nau kâp gân, mâu geh Brah Ndu ôh.

¹³ Ƀiălah tâm Brah Yêsu Krist, khân may jêng phung kăl e ri gŭ ngai, aƀaơ aơ khân may gŭ dăch jêh yor mham Brah Krist.

¹⁴ Yor Păng jêng nau đăp mpăn he, Păng yơh tâm rnglăp lĕ bar mpôl jêng nguay, ƀư rlâm jêh mpêr nkhah king he.

¹⁵ Bơh săk jăn Păng nơm, Păng hŏ chalơi nau vay ndrel ma nau vay ntăm jêh ri nau ntrŭnh, gay bơh bar mpôl, Păng rhăk njêng jêng du kon bunuyh mhe tâm Păng nơm, kơt nây nau đăp mpăn dơi jêng;

¹⁶ jêh ri bơh si tâm rkăng, Păng tâm rnglăp lĕ bar ăn ma Brah Ndu tâm nguay săk jăn; bơh nau nây, mra ƀư rai nau rlăng.

¹⁷ Lah ndrĭ, Păng văch jêh mbơh nkoch nau đăp mpăn ma khân may jêng phung gŭ ngai, jêh ri nau đăp mpăn ma phung gŭ dăch.

¹⁸ Yorlah tă bơh Păng lĕ bar mpôl he dơi văch ta Brah Ndu Mbơ̆ tâm nguay Brah Huêng Ueh.

¹⁹ Pônây, khân may mâu hôm jêng phung bu năch ôh mâu lĕ jêng bunuyh gŭ njưh đŏng, ƀiălah jêng phung ƀon ndrel ma phung kloh ueh jêh ri jêng phung bunuyh tâm rnăk vâl Brah Ndu;

²⁰ bu ndâk njêng khân may klơ mbon phung kôranh oh mon jêh ri phung nơm mbơh lor jêh ri Brah Yêsu Krist yơh jêng lŭ njônh ngih.

²¹ Tâm Păng, lĕ kô̆ ta ngih tâm rnglăp ndrel, jêh ri jêng du mlâm ngih kloh ueh tâm Kôranh Brah.

²² Tâm Păng yơh, khân may dơi ndâk njêng ndrel đah ngih nây, gay jêng ntŭk gŭ ma Brah Ndu tâm Brah Huêng Ueh.