Êphêsô 1 - Nau Brah Ndu Ngơi 2023

Nau mbah jô̆ khâl

¹ Y-Pôl, tĭng nâm nau Brah Ndu ŭch jêng kôranh oh mon Brah Yêsu Krist, nchih njuăl ma phung kloh ueh gŭ ta ƀon Êphêsô, jêng phung răp jăp tâm Brah Yêsu Krist.

² Dăn nau yô̆ jêh ri nau đăp mpăn tă bơh Brah Ndu, Mbơ̆ he, jêh ri tă bơh Kôranh Brah jêng Brah Yêsu Krist ăn ma khân may.

I. Nau tâm rklaih bơh nau chroh hŏ tâm nal jêh ( 1:3 – 3:21 ) Nau ueh maak tâm Brah Krist

³ Tâm rnê ma Brah Ndu, Mbơ̆ Kôranh Brah he jêng Brah Yêsu Krist, Păng ăn ma he tâm Brah Krist ăp ntil nau ueh maak tâm nau rêh huêng gŭ tâm lĕ ntŭk klơ trôk.

⁴ Nđâp ma êlor nau rhăk njêng neh ntu, Păng săch jêh he tâm Brah Krist gay ma he jêng kloh ueh jêh ri mâu geh nau nduyh tanăp Păng.

⁵ Tâm nau rŏng, Păng tâm nal jêh ma he jêng kon mât rong Păng tă bơh Brah Yêsu Krist, tĭng nau ŭch ueh tâm nau mĭn Păng,

⁶ gay ma tâm rnê ma nau yô̆ chrêk rmah Păng hŏ ăn jêh ma he tâm Kon Păng rŏng ngăn ngên!

⁷ Yorlah tâm Brah Krist, he geh nau tâm chuai tă bơh mham Păng, geh nau yô̆ an nau tih tĭng nâm nau rmeh ler tâm nau yô̆ Păng,

⁸ jêng nau yô̆ Păng ăn âk rmeh ma he. Ndrel ma lĕ rngôch nau blau mĭn jêh ri nau gĭt rbăng,

⁹ Păng ƀư ăn he gĭt nau khlay ndâp tâm nau Păng ŭch, tĭng nâm nau ŭch ueh Păng hŏ nal jêh tâm Brah Krist,

¹⁰ gay tât nôk bêng rĭng, rgum lĕ rngôch ndơ tâm Brah Krist, nđâp ndơ klơ trôk jêh ri ndơ tâm neh ntu.

¹¹ Tâm Păng đŏng, he dơi săch jêng phung sŏk dơn ndơn drăp hŏ tâm nal jêh tĭng nau Brah Ndu dăp, Nơm ƀư lôch lĕ ntil ndơ tĭng nau Păng ŭch,

¹² gay ma he, jêng phung bunuyh lor lơn kâp gân tâm Brah Krist, tâm rnê ma nau chrêk rmah Păng.

¹³ Tâm Păng, khân may jêng phung tăng jêh nau ngơi ngăn, jêng Nau Mhe Mhan Ueh ma nau tâm rklaih khân may. Tâm Păng đŏng, khân may chroh jêh, jêh ri tâp pŏng jêh ma Brah Huêng Ueh nâm bu nau ton.

¹⁴ Nơm nây jêng nau mbơh ton ma drăp ndơn he kŏ tât nôk phung bunuyh jêng phung Păng dơn nau tâm chuai, gay tâm rnê ma nau chrêk rmah Păng.

Nau mbơh sơm ma phung Êphêsô

¹⁵ Yor ri, nôk gâp tăng ma nau khân may chroh tâm Kôranh Brah jêng Brah Yêsu Krist, jêh ri ma nau khân may rŏng đah lĕ rngôch phung kloh ueh,

¹⁶ gâp yor ma khân may, mâu rlu nhhơr nau lah ueh, ăp tơ̆ mbơh sơm gâp kah gĭt ƀaƀơ ma khân may.

¹⁷ Gâp vơl dăn ma Brah Ndu Kôranh Brah he jêng Brah Yêsu Krist, jêng Mbơ̆ nau chrêk rmah, ăn ma khân may huêng nau blau mĭn jêh ri nau tâm mpơl, gay khân may gĭt năl Păng.

¹⁸ Gâp dăn đŏng Păng sol ang măt nuih n'hâm khân may, gay ma khân may gĭt năl moh nau kâp gân tâm Kôranh Brah kuăl jêh khân may văch, mâm nau ndrŏng tâm drăp ndơn chrêk rmah Păng tâm phung kloh ueh,

¹⁹ jêh ri ntŭk ta nau brah dŭt toyh mâu hôm blau veh Păng đah he, jêng phung chroh, tĭng nau ƀư tâm nau brah dŭt prêh Păng.

²⁰ Nây jêng nau brah Păng ăn tât tâm Brah Krist nôk ƀư ma Brah Krist dâk rêh tay tă bơh nau khĭt jêh ri dơm Păng gŭ mpeh pa ma Păng tâm lĕ ntŭk klơ trôk,

²¹ rlau lơn ma lĕ rngôch nau chiă uănh, nau dơi, nau ktang, nau dơi chiă uănh, jêh ri ma lĕ rngôch amoh, mâu knŏng tâm rnôk aơ ôh, ƀiălah nđâp ma rnôk dăch tât đŏng.

²² Păng dơm jêh lĕ rngôch ndơ tâm dâng jâng Brah Krist jêh ri njêng Brah Krist jêng bôk ma lĕ ntil ndơ yorlah Phung Ngih Brah Ndu.

²³ Phung Ngih Brah Ndu jêng săk jăn Păng, jêng nau bêng ler tă bơh Nơm ƀư rĭng lĕ ntil ndơ tâm lĕ rngôch.