Daniel 8 - Nau Brah Ndu Ngơi 2023

Nau tâm saơ rơh bar Y-Daniel: Biăp nkuăng jêh ri be nkuăng

¹ Năm rơh pe rnôk hađăch Belsasar chiă uănh geh du nau tâm saơ mpơl tât ma gâp, Y-Daniel. Nau tâm saơ aơ tât pakơi nau tâm saơ gâp saơ jêh lor.

² Tâm nau tâm saơ, gâp saơ gâp dôl gŭ ta ƀon ngih hađăch Susa, tâm n'gor bri Êlam, jêh ri tâm ban lĕ nau tâm saơ, gâp saơ gâp dôl gŭ êp kêng dak krong Ulai.

³ Gâp n'gơr măt uănh jêh ri saơ du mlâm biăp nkuăng geh bar mlâm nke gŭ ta meng kơh dak krong. Lĕ bar mlâm nke prêh da dê, ƀiălah du mlâm prêh lơn ma du mlâm ri; jêh ri nke prêh lơn hon pakơi lơn.

⁴ Rnôk nây, Gâp saơ biăp nkuăng sŏk nke gĕ mpeh nhâp nar, mpeh pa lơ jêh ri mpeh pa dâng. Mâu geh du mlâm mpô mpa dơi tâm rdâng đah păng ôh jêh ri mâu dơi geh ndơ klaih bơh ti păng ôh. Păng ƀư tĭng nâm păng ŭch jêh ri ƀrư̆ nar văch ma toyh ktang.

⁵ Dôl gâp nchrâng mĭn uănh pôri, du mlâm be nkuăng văch tă bơh mpeh nhâp nar, hăn rgăn lam neh ntu jâng mâu nđĭl ta neh ôh. Be nkuăng nây geh du mlâm nke toyh rô̆ ta vah vang bar măt.

⁶ Păng tât ntŭk biăp nkuăng geh bar mlâm nke gâp saơ jêh gŭ ta meng kơh dak krong. Păng ji nuih ngăn rduh leo ma biăp nkuăng.

⁷ Gâp saơ păng hăn dăch biăp nkuăng jêh ri ji nuih ngăn gĕ biăp nkuăng ƀư deh lơi bar mlâm nke. Biăp nkuăng mâu hôm dơi geh nau ktang tâm rdâng ôh; be ƀư prah păng ta neh jêh ri jot ta klơ, jêh ri mâu geh bunuyh dơi tâm rklaih biăp nkuăng bơh păng ôh.

⁸ Be nkuăng plơ̆ jêng dŭt toyh ngăn. Ƀiălah nôk păng jêng ktang pôri nke toyh nây pă, jêh ri ta ntŭk nke deh nây geh puăn mlâm nke rô̆ luh tĭng mpeh sail puăn njônh trôk.

⁹ Bơh du mlâm tâm lĕ nke nây hon du mlâm nke jê̆ jêh nây jêng văch toyh ngăn, rlet mpeh pa dâng, mpeh nhâp nar jêh ri rlet ma n'gor bri chrêk rmah.

¹⁰ Păng văch ma toyh tât ma phung tahan tâm trôk, ƀư ăn ma du kô̆ tâm phung tahan jêh ri du kô̆ tâm phung mănh tŭp ta neh ntu, jêh nây jot plên klơ khân păng.

¹¹ Păng n'hao păng nơm jêng tâm ban ma Kôranh Chiă Uănh ma phung tahan, mƀăr lơi ndơ ƀư brah gŭch nhhơr ƀaƀơ bơh Păng jêh ri ƀư rai ntŭk kloh ueh Păng.

¹² Yor nau ƀai bu jao phung tahan ăn ma păng ndrel ndơ ƀư brah gŭch nhhơr ƀaƀơ. Nke nây klŭp lơi nau ngăn ta neh. Păng dơi jêng tâm lĕ kan păng ƀư.

¹³ Rnôk nây gâp tăng du huê nơm kloh ueh ngơi, jêh ri du huê nơm kloh ueh êng lah ma nơm kloh ueh dôl ngơi pô aơ: “Nau tâm saơ ma ndơ ƀư brah gŭch nhhơr ƀaƀơ, ma nau ƀai njŭn leo tât nau rai yot, ma nau jao ntŭk kloh ueh ma phung tahan gay ma jot plên tâm dâng jâng păng, mra ndah jŏ hôm jong?”

¹⁴ Nơm nây plơ̆ lah: “Kŏ tât bar rbăn pe rhiăng mhaơ jêh ri ôi; lôch nây ntŭk kloh ueh mra dơi ƀư kloh ueh.”

Nau rblang nau tâm saơ

¹⁵ Tơlah gâp, jêng Y-Daniel, saơ jêh nau tâm saơ nây jêh ri dôl tĭng joi ŭch gĭt rbăng jêh ri di nôk aơ đŏng geh nâm bu du huê bunuyh rup bu klâu gŭ tanăp gâp.

¹⁶ Gâp tăng bâr du huê nuyh bu klâu kuăl bơh ta nklang dak krong Ulai lah pô aơ: “Gabriel, rblang hom ma bunuyh aơ gĭt rbăng nau tâm saơ.”

¹⁷ Nơm nây, văch êp ro ntŭk gâp gŭ dâk. Saơ nơm nây tât, gâp klach ngăn jêh ri păn muh măt ta neh. Ƀiălah nơm nây lah ma gâp: “Hơi kon bunuyh, gĭt rbăng hom nau tâm saơ aơ di ma rnôk nglĕ dŭt.”

¹⁸ Dôl nơm nây hôm ngơi ma gâp pôri gâp lăp tâm nau bê̆ch hăk ngăn, măt chŭn ta neh. Ƀiălah păng pah ta gâp ăn gâp gŭ dâk,

¹⁹ jêh ri lah: “Aơ, gâp mra ăn may gĭt moh nau mra tât ta nglĕ dŭt nau ji nuih, yorlah nau nây di ma rnôk nglĕ dŭt tâm nal jêh.

²⁰ Biăp nkuăng may saơ jêh geh bar mlâm nke jêng phung hađăch Mêdơ jêh ri hađăch Persi.

²¹ Be nkuăng jêng hađăch n'gor bri Grek, jêh ri nke toyh hon ta vah vang bar măt jêng hađăch lor lơn.

²² Bi nke deh jêh ri puăn mlâm nke êng hon ntrok ta ntŭk nây, nây jêng puăn ƀon bri hađăch luh tă bơh bri dak nây ƀiălah mâu geh nau ktang kơt bri dak nây ôh.

²³ Ta nglĕ dŭt rnôk khân păng chiă uănh, Tơlah nau ƀai hŏ rlau jêh, Du huê hađăch geh muh măt janh ƀai, âk nau ndơm mƀruh plĕch rlăm ngăn, Mra luh mpơl.

²⁴ Nau dơi hađăch nây jêng bĭk rơ̆, ƀiălah mâu di ôh yor nau ktang păng nơm. Hađăch nây mra ƀư lĕ nau rai yot toyh Jêh ri dơi jêng tâm lĕ kan păng ƀư. Hađăch nây ăt ƀư rai phung dăng ktang Ndrel ma phung ƀon lan kloh ueh.

²⁵ Tă bơh nau plĕch rlăm, Hađăch nây ƀư dơi jêng lĕ nau nchră ndơm. Hađăch mra geh nuih n'hâm sưr n'hao êng păng nơm, Hađăch ƀư rai ndal âk bunuyh, Jêh ri janh hao tâm rdâng đah Kôranh ma lĕ kôranh. Ƀiălah hađăch nây bu mra ƀư rai Nđâp tơlah mâu yor tă bơh ti kon bunuyh ôh.

²⁶ Nau tâm saơ tâm lĕ mhaơ jêh ri lĕ ôi hŏ mbơh jêh jêng nau nanê̆ ngăn. Ƀiălah ăn may mra prăp ndâp nau tâm saơ aơ, yorlah păng jêng ndơ ma rnôk kăndơ̆.”

²⁷ Rnôk nây, gâp, Y-Daniel, rgănh suan ngăn jêh ri ji kuet tâm âk nar. Jêh nau nây gâp dâk jêh ri pah kan ma hađăch. Gâp hih rhâl ma nau tâm saơ nây jêh ri ăt mâu dơi gĭt rbăng lĕ ôh nau khlay.