Daniel 7 - Nau Brah Ndu Ngơi 2023

Lĕ nau tâm saơ Y-Daniel ( 7:1 – 12:13 ) Nau tâm saơ rơh nguay Y-Daniel: Puăn mlâm mpô mpa

¹ Năm rơh nguay rnôk rô̆ hađăch Belsasar, n'gor bri Babilôn, dôl gŭ bê̆ch ta klơ sưng bê̆ch, Y-Daniel saơ nau mbơi jêh ri nau tâm saơ tâm bôk păng. Păng nchih gay nkoch tay nau mbơi nây.

² Y-Daniel lah: “Dôl măng, tâm nau tâm saơ, gâp saơ sial lam puăn njônh trôk ƀư mpât dak mƀŭt.

³ Puăn mlâm mpô mpa toyh hao bơh dak mƀŭt; du mlâm jêng êng êng.

⁴ Mpa bri rơh nguay tâm ban ma yau mŭr ƀiălah geh năr klang ƀŭng. Gâp uănh kŏ tât lĕ năr păng bu nkê̆ch pă, bu pư păng bơh neh jêh ri ăn păng dâk râng ma bar mlâm jâng tâm ban ma bunuyh; bu ăn ma păng nau mĭn bunuyh.

⁵ Aơ geh du mlâm mpô mpa êng mpơl, mpô mpa rơh bar, tâm ban ma kau, păng gŭ nkêng mpeh du đah, trôm mbung păng glŏm pe gâl nting rpaih ta nklang neng păng. Bu lah ma păng: ‘Dâk hom, sa âk puăch.’

⁶ Jêh ma nây, gâp hôm uănh pôri, geh du mlâm mpô mpa êng tâm ban ma yau brăch, ta ndŭr kơi geh puăn plơp năr sĭm. Mpô mpa geh puăn mlâm bôk jêh ri dơi ăn nau chiă uănh.

⁷ Jêh ma nây, tâm nau tâm saơ dôl măng gâp saơ tay du mlâm mpô mpa rơh puăn, uănh janh, krit ngăn jêh ri ktang ngăn. Păng geh neng loih toyh; păng rvăn jêh ri ƀư nchah, jêh nây jot plên ma jâng ndơ hôm e. Păng jêng êng đah lĕ mpô mpa tât lor jêh ri păng geh jât mlâm nke.

⁸ Dôl gâp mĭn ma lĕ nke nây, pôri geh du mlâm nke êng, jê̆ lơn, hon ta nklang nke nây; pe mlâm tâm lĕ nke geh lor bu tŏk lŏk lơi lĕ tanăp măt păng. Nke jê̆ aơ geh âk măt tâm ban ma măt bunuyh jêh ri mbung ngơi ma nau sưr.

⁹ Gâp uănh kŏ tât Lĕ sưng hađăch dơi dăp ueh djrêp, Geh Nơm Gŭ Rêh Bơh Rnôk Kăl E gŭ ta klơ nây. Ao Păng nglang nâm bu pler, Sŏk ta klơ bôk Păng nâm bu rsau biăp kloh. Sưng hađăch Păng jêng mpiăt ŭnh Geh lĕ jâng ndeh ŭnh sa hit.

¹⁰ Tanăp măt Păng, Du n'hor dak krong ŭnh hoch. Rbăn rbăn nuyh pah kan ma Păng Rmưn rmưn gŭ tanăp Păng Phung phat dôih ntơm phat dôih, Ndrom samƀŭt hŏ pơk jêh.

¹¹ Rnôk nây, gâp gŭ uănh yor geh lĕ nau ngơi nau sưr bơh lĕ nke nây ngơi. Gâp hôm uănh kŏ tât bu nkhĭt mpô mpa nây, săk jăn păng bu ƀư rai jêh ri ƀư sĭnh ŭnh.

¹² Lĕ mpô mpa hôm e ăt bu sŏk lơi nau dơi chiă uănh ƀiălah dơi njong jŏ nau rêh ntop du rô̆ jêh ri du gưl.

¹³ Tâm lĕ nau tâm saơ dôl măng Gâp saơ geh du huê tâm ban ma kon bunuyh Văch ndrel ma ndâr tŭk bơh trôk. Nơm nây văch dăch Jêh ri bu njŭn tât na năp măt Nơm Gŭ Rêh Bơh Rnôk Kăl E.

¹⁴ Nơm Gŭ Rêh Bơh Rnôk Kăl E ăn ma nơm nây nau dơi chiă uănh, Nau chrêk rmah jêh ri ƀon bri hađăch. Ma lĕ rngôch phung ƀon lan, lĕ rngôch bri dak, lĕ rngôch nau ngơi Pah kan ma nơm nây da dê. Nau Păng chiă uănh jêng nau dơi n'ho ro, Mâu mra rlau lôch ôh, Jêh ri ƀon bri hađăch Păng mâu mra rai ôh, Mâu mra rai ôh.”

Nau rblang lĕ nau tâm saơ

¹⁵ “Gâp, Y-Daniel, huêng gâp rŭng răng, lĕ nau tâm saơ tâm bôk ƀư ma gâp klach ngăn.

¹⁶ Gâp hăn dăch du huê tâm phung gŭ dâk ta nây jêh ri ôp n'hêl ngăn ma lĕ rngôch nau aơ. Nơm nây rblang ăn ma gâp kơt aơ:

¹⁷ ‘Puăn mlâm mpô mpa toyh nây jêng puăn nuyh hađăch mra chiă uănh ta neh ntu.

¹⁸ Ƀiălah phung kloh ueh Nơm Dŭt Prêh mra sŏk dơn ƀon bri hađăch jêh ri chiă uănh ƀon bri hađăch nây n'ho ro kŏ tât n'ho ro mâu blau lôch ôh.’

¹⁹ Rnôk nây, gâp ŭch gĭt nau nanê̆ ma mpô mpa rơh puăn, jêng êng đah lĕ mpô mpa êng, janh dŭt n'hâm ngăn đah neng loih jêh ri nheh kông. Păng kăp sa rvăn, nchah hăch jêh ri sŏk jâng jot lĕ ndơ hôm e klen.

²⁰ Tâm ban lĕ gâp ŭch gĭt đŏng ma jât mlâm nke ta klơ bôk păng jêh ri ma nke êng hon ƀư ma pe mlâm nke tŭp tanăp măt păng, jêng nke geh măt jêh ri mbung ngơi nau sưr jêh ri uănh păng tâm ban ma ktang lơn ma lĕ nke êng.

²¹ Dôl gâp gŭ uănh, nke nây tâm lơh đah phung kloh ueh jêh ri dơi đah khân păng,

²² kŏ Nơm Gŭ Rêh Bơh Rnôk Kăl E tât gŭ, ndâk nau phat dôih gay koh dŏng phung kloh ueh Nơm Dŭt Prêh, jêh ri tât rnôk phung kloh ueh sŏk dơn ƀon bri hađăch.

²³ Bunuyh nây rblang ma gâp: ‘Mpô mpa rơh puăn Mra jêng ƀon bri hađăch rơh puăn ta neh ntu, Êng ngăn ma lĕ rngôch ƀon bri hađăch ri; Ƀon bri hađăch nây mra sa rvăn, Jot plên jêh ri nchah rai lĕ rngôch neh ntu.

²⁴ Jât mlâm nke jêng jât hađăch Mra luh bơh ƀon bri hađăch nây. Ƀiălah mra geh du huê hađăch luh văch pakơi, Êng ngăn đah phung hađăch lor, Jêh ri mra n'glưh lơi pe hađăch.

²⁵ Hađăch aơ mra ngơi djơh ma Nơm Dŭt Prêh, Ƀư huănh hươi phung kloh ueh Nơm Dŭt Prêh. Hađăch ŭch mĭn rgâl rnôk jêh ri nau vay. Phung kloh ueh bu mra jao tâm ti hađăch nây Kŏ tât du gưl, bar gưl jêh ri n'gul gưl.

²⁶ Ƀiălah phung phat dôih mra phat dôih Jêh ri nau dơi chiă uănh păng bu mra sŏk lơi Gay nkhĭt lơi jêh ri ƀư rai n'ho ro nau dơi nây.

²⁷ Rnôk nây, ƀon bri hađăch nây, nau dơi chiă uănh Jêh ri nau toyh ma lĕ rngôch ƀon bri hađăch tâm neh ntu Mra dơi ăn ma ƀon lan phung koh ueh Nơm Dŭt Prêh. Ƀon bri hađăch Păng jêng ƀon bri hađăch n'ho ro Jêh ri lĕ rngôch nau dơi chiă uănh pah kan jêh ri tông bâr Păng da dê.’

²⁸ Nau nkoch bri lôch ta aơ. Bi gâp, Y-Daniel, lĕ nau mĭn ƀư ma gâp rŭng răng ngăn, muh măt rgâl jêng êr; ƀiălah gâp ăt djôt prăp lĕ nau nây tâm nuih n'hâm.”