Daniel 6 - Nau Brah Ndu Ngơi 2023

Y-Daniel tâm trôm ntu yau mŭr

¹ Hađăch Darius tâm nal sâm dơm ăn du rhiăng bar jât bunuyh kôranh nkual gay chiă uănh lam ƀon bri hađăch,

² jêh ri klơ khân păng geh pe nuyh kôranh toyh, du huê tâm pe nuyh nây jêng Y-Daniel. Phung kôranh nkual mbơh kan ma pe nuyh kôranh toyh aơ gay lơi ăn geh nau mhĭk tât ma ngih hađăch ôh.

³ Y-Daniel geh nau lư n'găr lơn ma bar hê kôranh toyh êng jêh ri phung kôranh nkual yorlah păng geh huêng brah lơn; hađăch mĭn ŭch n'hao păng ăn chiă uănh lĕ ƀon bri hađăch.

⁴ Pôri, phung kôranh toyh jêh ri phung kôranh nkual joi nau ngơi tih Y-Daniel tâm kan bri dak. Ƀiălah khân păng mâu dơi saơ du ntil nau tih ôh tâm păng mâu lah du ntil nau gay dơi nduyh, yorlah păng jêng răp jăp, mâu geh du ntil nau kue mâu lah geh tih ôh.

⁵ Pônây khân păng nây lah: “He mâu mra saơ du ntil nau gay ma phong Y-Daniel aơ, knŏng he joi tâm nau păng tĭng nau vay Brah Ndu păng”.

⁶ Phung kôranh toyh jêh ri phung kôranh nkual ndrel hăn tanăp hađăch jêh ri lah: “Hađăch Darius gŭ rêh n'ho ro!

⁷ Lĕ rngôch phung kôranh toyh tâm ƀon bri hađăch, phung kôranh ntang, phung kôranh nkual, phung kôranh nchră jêh ri phung kôranh chiă uănh dăn da dê ma hađăch ƀư nau ntrŭnh jêh ri ăn du luh nau vay buay ktang mâu dơi ƀư tâm pe jât nar tơlah mbu nơm vơl ma brah mâu lah ma bunuyh êng padih may, ơ hađăch, nơm nây mra klŭp tâm trôm ntu yau mŭr.

⁸ Aƀaơ aơ, ơ hađăch ƀư hom nau buay nây jêh ri nchih amoh tâm samƀŭt gay ma nau vay mâu dơi rgâl ôh tĭng nâm nau vay phung Mêdơ jêh ri phung Persi nây.”

⁹ Hađăch Darius nchih amoh tâm samƀŭt jêh ri nau vay buay nây.

¹⁰ Tơlah Y-Daniel gĭt hađăch nchih amoh jêh tâm samƀŭt pôri păng lăp tâm ngih, hao tâm du jrô prêh, ntŭk geh mpông bloh jê̆ rle ma ƀon Yêrusalem. Ta nây, pe tơ̆ ăp nar păng chon kômâk mbơh sơm jêh ri mprơ tâm rnê ma Brah Ndu nâm bu păng vay ƀư ntơm saơm tât aƀaơ.

¹¹ Rnôk nây, phung nây tâm rnglăp ndrel jêh ri saơ Y-Daniel mbơh sơm jêh ri vơl dăn ma tanăp Brah Ndu păng.

¹² Khân păng văch dăn tanăp hađăch jêh ri lah ma hađăch ma nau buay ƀư: “Ơ hađăch, mâu di hĕ may nchih amoh jêh ma du nau vay buay dôl pe jât nar mbu nơm mbơh sơm ma brah mâu lah bunuyh êng padih may bu mra klŭp nơm nây tâm trôm ntu yau mŭr nây hĕ?” Hađăch plơ̆ lah: “Di yơh, tĭng nâm nau vay phung Mêdơ jêh ri phung Persi, mâu dơi tâm rgâl ôh.”

¹³ Khân păng plơ̆ lah ma hađăch: “Tâm phung bu nă tă bơh Yuđa geh Y-Daniel mâu chrê ma may ôh. Ơ hađăch, nđâp lah ma nau buay may nchih amoh jêh, păng ăt mbơh sơm pe tơ̆ ăp nar.”

¹⁴ Tơlah tăng nau nây hađăch ji nuih n'hâm ngăn jêh ri joi trong gay ma tâm rklaih Y-Daniel. Kŏ tât nar nhâp hađăch ăt hôm gŭ joi trong tâm rklaih păng.

¹⁵ Ƀiălah phung nây ndrel hăn tât tanăp hađăch jêh ri lah: “Ơ hađăch, ăn may gĭt tĭng nau vay phung Mêdơ jêh ri phung Persi, lĕ rngôch nau buay mâu lah nau ntrŭnh hađăch ƀư jêh mâu dơi tâm rgâl ôh.”

¹⁶ Ta nây ro, tĭng nau hađăch ntăm, bu njŭn Y-Daniel tât jêh ri klŭp păng tâm trôm ntu yau mŭr. Hađăch lah ma Y-Daniel: “Ăn Brah Ndu may jêng Nơm may pah kan ƀaƀơ mra sâm rklaih may!”

¹⁷ Bu djôt du mlâm lŭ tât rdâl bâr trôm ntu. Hađăch tâp pŏng ma ndơ hađăch jêh ri tâp pŏng phung kôranh păng gay mâu ăn rgâl du ntil nau tât ma Y-Daniel đŏng ôh.

¹⁸ Jêh nau nây, hađăch sĭt ta ngih hađăch păng, jêh ri ât sông sa tâm măng nây mâu dăn phung êng văch ƀư maak ma păng ôh. Păng mâu dơi bê̆ch ôh.

¹⁹ Ƀhit ang hađăch dâk, hăn ndal ta trôm ntu yau mŭr.

²⁰ Tơlah păng tât dăch bâr trôm ntu, păng sŏk ma bâr rngot kuăl Y-Daniel. Hađăch kuăl: “Ơ Y-Daniel, oh mon Brah Ndu gŭ rêh mro mrăng! Brah Ndu may pah kan ƀaƀơ, mra dơi rklaih may bơh yau mŭr lĕ?”

²¹ Y-Daniel plơ̆ lah ma hađăch: “Ăn nau ueh ma may gŭ rêh n'ho ro!

²² Brah Ndu gâp njuăl jêh tông mpăr Păng tât jêh ri rdêp lơi mbung yau mŭr yor ri khân păng mâu ƀư mhĭk ma gâp ôh, yorlah tanăp măt Păng dơi kơp gâp jêng mâu geh nau tih ôh. Ơ hađăch, tanăp măt may tâm ban lĕ gâp mâu mâp ƀư tih ôh.”

²³ Hađăch dŭt maak ngăn jêh ri đă bu chông Y-Daniel hao bơh trôm ntu yau mŭr. Pôri Y-Daniel du luh tă bơh ntŭk nây, jêh ri ta săk jăn păng mâu geh sôt ôh yorlah păng rnơm nsing ma Brah Ndu păng.

²⁴ Tĭng nâm hađăch ntăm, jêh ri phung hŏ phong nchơt Y-Daniel ndrel ma ur kon khân păng bu djôt klŭp tâm ntu yau mŭr. Tơlah khân păng mâu hŏ tât tâm dâng ntu pôri yau mŭr hŏ nhŭp jêh ri hêk nkê̆ch lĕ nting khân păng.

²⁵ Rnôk nây hađăch Darius nchih samƀŭt ma lĕ rngôch phung ƀon lan, lĕ bri dak, lĕ nau ngơi nau gŭ lam neh ntu: “Ăn nau ueh ma khân may dơi geh nau đăp mpăn âk rmeh!

²⁶ Gâp ăn samƀŭt nau ntrŭnh pô aơ ta lam ntŭk tâm ƀon bri hađăch gâp lĕ rngôch bunuyh mra yơk mbah jêh ri râm nsâr klach tanăp Brah Ndu Y-Daniel Yorlah Păng jêng Brah Ndu gŭ rêh mro mrăng Jêh ri hôm gŭ rêh n'ho ro. Ƀon bri hađăch Păng mâu blau rai lôch ôh, Nau Păng chiă uănh mra dŭt toyh mâu blau lôch ôh.

²⁷ Păng tâm chuai jêh ri rklaih, Ƀư lĕ nau mbên nau khlay ndâp tâm trôk jêh ri ta neh ntu; Păng nơm tâm rklaih Y-Daniel Bơh neng nheh yau mŭr.”

²⁸ Y-Daniel geh nau tâm n'hao dôl rnôk hađăch Darius jêh ri hađăch Sirus, phung Persi.