Daniel 5 - Nau Brah Ndu Ngơi 2023

Nau nhêt sa hađăch Belsasar. – Ƀon bri hađăch Kaldê rlâm rai.

¹ Hađăch Belsasar nkra nau nhêt sông toyh ma du rbăn nuyh kôranh păng. Hađăch nhêt ndrănh tanăp khân păng.

² Dôl nhêt ndrănh, hađăch Belsasar đă bu njŭn ma păng kachok khăl ƀư ma mah jêh ri prăk hađăch Nêbukatnetsar hŏ sŏk jêh bơh ngih brah ta ƀon Yêrusalem, gay ma hađăch jêh ri phung kôranh toyh, phung ur păng jêh ri phung ur yông păng dŏng nhêt ndrănh.

³ Bu njŭn kachok khăl ma mah hŏ sŏk bơh ngih brah, nây jêng ngih Brah Ndu, ta ƀon Yêrusalem; hađăch jêh ri phung kôranh toyh, phung ur păng jêh ri ur yông păng dŏng kachok khăl nây gay nhêt ndrănh.

⁴ Khân păng nhêt ndrănh n'ho tâm rnê ma phung brah ƀư ma mah, ma prăk, ma kông, ma loih, ma tơm si jêh ri ma lŭ.

⁵ Nôk nây ro, geh nglau ti mpang ti bunuyh tâm mpơl, nchih ta klơ mpir ngih hađăch, tâm jâng ŭnh kađen; hađăch saơ mpang ti nây dôl gŭ nchih.

⁶ Rnôk nây muh măt păng êr, nau păng mĭn rŭng răng, nting nđăng ra ai, bar đah kômâk râm nsâr.

⁷ Hađăch nter huy ntrŭnh nau ntăm kuăl rgum phung n'hŭm, phung Kaldê jêh ri phung gru rƀên. Hađăch ngơi ma phung njêh n'gor bri Babilôn: “Mbu dơi răk rplay samƀŭt aơ jêh ri rblang ma gâp nau tâm mpơl pôri mra dơi nsoh ao chăng ĭr gâp, văn mah rval ta trô ko jêh ri ăn păng jêng kôranh mrô pe chiă uănh tâm ƀon bri hađăch.”

⁸ Rnôk nây, lĕ rngôch phung njêh hađăch tât da dê, ƀiălah khân păng mâu dơi răk rplay samƀŭt nây ôh, mâu lĕ dơi tâm mpơl nau rblang ma hađăch.

⁹ Hađăch Belsasar rŭng răng ngăn, muh măt păng êr lơn, jêh ri phung kôranh păng mâu gĭt moh ƀư.

¹⁰ Tăng nau phung hađăch jêh ri phung kôranh toyh păng ngơi, mê̆ hađăch lăp tâm jrô sông sa. Mê̆ păng lah: “Ơ hađăch gŭ rêh n'ho ro! Lơi ăn nau may mĭn geh nau rŭng răng, muh măt jêng êr!

¹¹ Tâm ƀon bri hađăch may geh du huê bunuyh geh huêng brah phung brah Brah Ndu kloh ueh gŭ tâm păng. Tâm rnôk mbơ̆ may, bu saơ tâm nơm nây geh nau ang, nau gĭt rbăng jêh ri blau mĭn, tâm ban ma nau blau mĭn Brah Ndu. Mbơ̆ may jêng Y-Nêbukatnetsar, njêng jêh nơm nây ƀư kôranh ma phung rƀên, phung pol, phung Kaldê, jêh ri phung n'hŭm.

¹² Yorlah tâm Y-Daniel, nơm hađăch ntơ amoh Beltisasar, geh huêng brah ueh, geh nau gĭt mĭn jêh ri nau gĭt rbăng gay ma rblang nau mbơi, rblang nau ndâp, nkra lĕ ntil nau, yor ri aƀaơ ăn bu kuăl Y-Daniel, gay păng mra rblang nau nây.”

¹³ Rnôk nây, bu njŭn Y-Daniel tât tanăp hađăch. Hađăch lah ma Y-Daniel: “May hĕ jêng Y-Daniel, du huê tâm phung bu nă Yuđa mbơ̆ gâp hŏ nhŭp tă bơh n'gor bri Yuđa?

¹⁴ Gâp tăng bu lah may geh huêng phung brah gŭ tâm may yor ri may geh nau ang, nau gĭt rbăng jêh ri nau blau mĭn êng lơn.

¹⁵ Phung njêh, phung pol, hŏ kuăl văch tanăp gâp gay ma răk nau nchih aơ jêh ri rblang păng ma gâp, ƀiălah khân păng mâu dơi rblang nau nây ôh.

¹⁶ Gâp tăng bu lah may dơi rblang jêh ri nkra nau jêr jŏk. Pôri, tơlah may dơi rŏ rplay samƀŭt nchih jêh ri rblang ma gâp, pôri may mra dơi nsoh ao chăng ĭr, văn rvang mah ta trô ko jêh ri ăn may jêng kôranh mrô pe tâm ƀon bri hađăch.”

¹⁷ Tanăp hađăch, Y-Daniel plơ̆ lah: “Ăn may prăp ma may nơm lĕ ndơ ăn nây, jêh ri ăn nau nkhôm ma nơm êng! Ƀiălah, gâp mra răk rplay samƀŭt nchih nây jêh ri rblang ma may.

¹⁸ Ơ hađăch, Brah Ndu Nơm Dŭt Prêh ăn jêh ƀon bri hađăch, nau dơi dŭt prêh, nau chrêk rmah, jêh ri nau rnam ăn ma mbơ̆ may jêng Y-Nêbukatnetsar.

¹⁹ Yorlah Brah Ndu ăn nau dơi chiă uănh jêng toyh Kôranh Brah ăn jêh mbơ̆ may ma lĕ rngôch phung ƀon lan, bri dak, lĕ rngôch nau ngơi klach râm sâr da dê tanăp hađăch nây. Păng ŭch nkhĭt lơi mbu nơm păng ŭch jêh ri păng om gŭ rêh mbu nơm păng ŭch, păng ŭch n'hao mâu lah n'glưh mbu nơm păng ŭch.

²⁰ Ƀiălah tơlah nuih n'hâm jêng sưr, nuih n'hâm dăng ktang, pôri păng ƀư ma nau brơl; yor nây bu n'glưh jêh păng bơh sưng hađăch jêh ri sŏk lơi nau chrêk rmah.

²¹ Bu nsot păng bơh tâm nklang phung bunuyh; nau mĭn jêng nâm bu nau mĭn mpô mpa, mra gŭ ndrel ma seh bri, sa gơ̆ nâm bu ndrôk jêh ri săk jăn păng bĕ ma dak ngom bơh trôk, kŏ tât păng gĭt Brah Ndu Nơm Dŭt Prêh chiă uănh tâm ƀon bri hađăch kon bunuyh jêh ri ma mbu nơm Păng ndâk tĭng nơm Păng ŭch.

²² Bi may, ơ hađăch Belsasar, kon bu klâu păng nây, nđâp lah may gĭt jêh lĕ rngôch nau nây, nuih n'hâm may ăt mâu ŭch tông yơk djê̆ lê̆ ôh.

²³ Ƀiălah, may n'hao êng may nơm tâm rdâng đah Kôranh Brah tâm trôk, đă bu njŭn kachok khăl bơh ngih Kôranh Brah ăn ma may nhêt ndrănh ma phung kôranh may, phung ur may jêh ri phung ur yông may. Hađăch tâm rnê jêh phung brah ƀư ma prăk, mah, kông, loih, si jêh ri lŭ, phung brah mâu blau saơ mâu gĭt tăng mâu gĭt rbăng ôh, ƀiălah mâu yơk mbah ôh ma Brah Ndu jêng nơm djôt tâm ti Păng n'hâm nsôr jêh ri lĕ rngôch trong may.

²⁴ Pôri yơh, Păng hŏ njuăl nglau ti aơ tât nchih rplay samƀŭt aơ.

²⁵ Rplay samƀŭt hŏ nchih jêh kơt aơ: MÊNÊ, MÊNÊ, TÊKEL, UPARSIN.

²⁶ Aơ nau rblang rplay samƀŭt nây: Mênê jêng: Brah Ndu hŏ kơp jêh ri lôch mrô nar hađăch;

²⁷ Têkel jêng: Hađăch bu hŏ dơm jêh ta klơ njing jêh ri saơ djê̆ mâu tŏng.

²⁸ Pêres jêng: Ƀon bri hađăch may bu tâm pă jêh nây ăn ma phung Mêdơ jêh ri phung Persi.”

²⁹ Hađăch Belsasar ta nây ro đă djôt ao chiăng ĭr nsoh ma Y-Daniel; sâm văn kông mah ta trô ko jêh ri mbơh păng jêng kôranh mrô pe tâm ƀon bri hađăch.

³⁰ Măng nây ro, bu nkhĭt Belsasar, hađăch phung Kaldê.

³¹ Y-Darius, bunuyh Mêdơ, chiă uănh ƀon bri hađăch păng, Y-Darius geh prao jât ma bar năm jêh.