Daniel 3 - Nau Brah Ndu Ngơi 2023

Pe bu klâu ndăm Hêbrơ bu klŭp tâm ŭnh năk

¹ Hađăch Nêbukatnetsar ƀư du mlâm rup mah prêh bar jât pơh met, dĭ rkăng bar met pơh jêh ri rdâk ta neh lâng Dura, jêng tâm n'gor bri Babilôn.

² Hađăch Nêbukatnetsar kuăl tâm rgum phung kôranh nkual, phung kôranh nchră, phung kôranh toyh, phung kôranh n'hut uănh, phung kôranh chiă uănh ngih drăp, phung kôranh phat dôih, phung kôranh nchih samƀŭt, jêh ri lĕ rngôch phung kôranh tâm n'gor bri văch rƀŭn nhhơr rup hađăch Nêbukatnetsar rdâk jêh.

³ Pôri phung kôranh nkual, phung kôranh nchră, phung kôranh toyh, phung kôranh n'hut uănh, phung kôranh chiă uănh ngih drăp, phung kôranh phat dôih, phung kôranh nchih samƀŭt jêh ri lĕ rngôch phung kôranh chiă uănh tâm n'gor bri tâm rƀŭn gay ma nau rƀŭn nhhơr rup hađăch Y-Nêbukatnetsar rdâk jêh. Dôl khân păng dâk tanăp rup Nêbukatnetsar rdâk jêh,

⁴ geh kôranh ƀư brah nau rƀŭn mbơh huy: “Aơ jêng nau ntăm ma lĕ rngôch ntil phung ƀon lan, lĕ bri dak, lĕ nau ngơi:

⁵ Tơlah khân may tăng bâr nŭng, bâr n'hôm, bâr gong rêng, dĭng vưt, rlet, gong rêng loih, gâr jê̆ jêh ri lĕ rngôch gong kreh huy khân may chon mon muh măt yơk mbah ma rup mah hađăch Nêbukatnetsar rdâk jêh.

⁶ Mbu mâu chon mon muh măt yơk mbah pôri bu mra klŭp ro tâm nklang năk ŭnh hit.”

⁷ Yor ri, tăng jêh bâr nŭng, bâr dĭng, bâr gong rêng, dĭng vưt, gong rêng loih, bâr rlet jêh ri ăp ntil gong kreh huy lĕ rngôch ntil phung, lĕ bri dak, lĕ nau ngơi, chon mon muh măt da dê jêh ri yơk mbah ma rup mah hađăch Nêbukatnetsar rdâk jêh.

⁸ Rnôk nây, ƀaƀă geh phung Kaldê văch ŭch phong phung Yuđa.

⁹ Khân păng lah ma hađăch Nêbukatnetsar pô aơ: “Ơ hađăch, ăn may gŭ rêh n'ho ro!

¹⁰ May nơm hŏ ntrŭnh nau ntăm pô aơ lĕ rngôch bunuyh tăng jêh bâr uh nŭng, bâr dĭng, bâr gong rêng, dĭng vưt, gong rêng loih, gâr jê̆ jêh ri lĕ gong kreh huy, chon mon muh măt yơk mbah ruh mah;

¹¹ mbu nơm mâu chon mon muh măt yơk mbah rup nây bu mra klŭp ta nklang năk ŭnh hit.

¹² Pôri ta aơ geh ƀă phung Yuđa, phung may ăn chiă uănh kan n'gor bri Babilôn, jêng Y-Sadrak, Y-Mêsăk jêh ri Y-Abetnêgô, mâu chrê ôh ma may. Ơ hađăch, phung nây mâu pah kan ma phung brah may ôh, mâu lĕ yơk mbah ma rup mah may rdâk jêh.”

¹³ Rnôk nây, hađăch Nêbukatnetsar ma nau ji nuih ngăn ntăm bu nhŭp Y-Sadrak, Y-Mêsăk jêh ri Y-Abetnêgô. Pe bunuyh nây bu njŭn tât tanăp hađăch.

¹⁴ Hađăch Nêbukatnetsar lah ma khân păng: “Ơ, Y-Sadrak, Y-Mêsăk, Y-Abetnêgô, di lĕ khân may mâu pah kan ma lĕ brah gâp jêh ri mâu yơk mbah ma rup mah gâp rdâk jêh?

¹⁵ Aƀaơ, tơlah khân may tăng bâr nŭng, bâr dĭng, bâr gong rêng, dĭng vưt, gong rêng loih, gâr jê̆ jêh ri ăp ntil gong kreh huy khân may rơm ndrăp chon mon muh măt yơk mbah ma rup gâp ƀư jêh mra jêng ueh; ƀiălah tơlah khân may mâu chon mbah ôh bu mra klŭp khân may tâm năk ŭnh hit, rlong uănh mbu brah dơi tâm rklaih khân may bơh ti gâp?”

¹⁶ Y-Sadrak, Y-Mêsăk jêh ri Y-Abetnêgô plơ̆ lah ma hađăch: “Ơ hađăch Nêbukatnetsar, hên mâu ŭch mbơh ôh nau aơ ma may.

¹⁷ Tơlah bu klŭp hên tâm ŭnh năk, pônây ơ hađăch, Brah Ndu nơm hên yơk mbah mra dơi tâm rklaih hên klaih bơh ŭnh năk jêh ri bơh ti may.

¹⁸ Ƀiălah tơlah Păng mâu tâm rklaih ôh, pôri dăn hađăch, ăn may gĭt hên mâu pah kan ma phung brah may ôh jêh ri mâu yơk mbah ma rup mah may rdâk jêh.”

¹⁹ Rnôk nây, Nêbukatnetsar ji nuih pal muh măt, uănh ma Y-Sadrak, Y-Mêsăk, Y-Abetnêgô jêh ri đă su ŭnh năk duh pơh tơ̆ ktang lơn tĭng nâm bu vay ƀư.

²⁰ Păng mprơh phung ktang lơn tâm phung tahan chăp Y-Sadrak, Y-Mêsăk jêh ri Y-Abetnêgô klŭp tâm năk ŭnh hit.

²¹ Pe phung bu klâu nây bu chăp ro nđâp ma kho gleh, ao jâr, ao gleh ndrel lĕ ao hađăch êng jêh ri klŭp ta nklang năk ŭnh hit.

²² Yor nau hađăch ntăm ndal ngăn, ŭnh năk duh ngăn yor nây mpiăt ŭnh sa nkhĭt phung tahan klŭp Y-Sadrak, Y-Mêsăk jêh ri Y-Abetnêgô.

²³ Bi pe nuyh jêng Y-Sadrak, Y-Mêsăk, Y-Abetnêgô, hôm e chăp tŭp ta nklang năk ŭnh hit.

²⁴ Rnôk nây, hađăch Nêbukatnetsar hih rdâl, dâk ndal ro, ôp ma phung kôranh tâm nchră: “Mâu di hĕ he klŭp jêh ta nklang ŭnh năk pe nuyh?” Khân păng plơ̆ lah: “Ngăn yơh, ơ hađăch.”

²⁵ Hađăch lah tay: “Ri, gâp saơ puăn nuyh mâu geh chăp hăn ta nklang ŭnh mâu geh nau sôt ôh; jêh ri muh măt nơm rơh puăn nây jêng nâm bu du huê kon bu klâu phung brah.”

²⁶ Jêh nây hađăch Nêbukatnetsar hăn dăch bôk mpông năk ŭnh hit jêh ri kuăl nteh huy: “Hơi Y-Sadrak, Y-Mêsăk, jêh ri Y-Abetnêgô, jêng oh mon Brah Ndu Dŭt Prêh, luh hom jêh ri văch ta aơ!” Y-Sadrak, Y-Mêsăk jêh ri Y-Abetnêgô luh ro tă bơh ŭnh năk.

²⁷ Phung kôranh nkual, phung kôranh chiă uănh, phung kôranh toyh, jêh ri phung kôranh tâm nchră ma hađăch tâm rgum jêh ri saơ ŭnh mâu dơi ƀư mhĭk ma săk jăn phung pe nuyh nây ôh; ăt mâu geh du brai sŏk ta bôk khân păng, kho ao khân păng ŭnh mâu geh rôt ôh, nđâp ma ƀâu ŭnh ăt mâu krêp lĕ tâm khân păng.

²⁸ Hađăch Nêbukatnetsar lah: “Tâm rnê ma Brah Ndu Y-Sadrak, Y-Mêsăk, jêh ri Y-Abetnêgô, Nơm njuăl jêh tông mpăr Păng văch jêh ri tâm rklaih phung oh mon Păng. Khân păng gĭt rnơm nsing ma Păng, janh tâm rgâl nau hađăch ntăm, jêh ri sân săk jăn gay mâu pah kan jêh ri yơk mbah ma brah êng ôh padih Brah Ndu khân păng nơm.

²⁹ Yor nây, gâp ăn samƀŭt nau ntrŭnh aơ: Lĕ rngôch mbu phung ƀon lan, mbu bri dak, mbu nau ngơi geh nau ngơi mhĭk ma Brah Ndu Y-Sadrak, Y-Mêsăk, Y-Abetnêgô bu mra choh săk jăn khân păng, jêh ri ngih khân păng mra jêng mbŭch djah; yorlah mâu geh brah êng ôh mra dơi tâm rklaih tâm ban pônây.”

³⁰ Hađăch n'hao kan ma Y-Sadrak, Y-Mêsăk jêh ri Y-Abetnêgô tâm n'gor bri Babilôn.